Z sensacyjnym dakładam vystupiŭ namieśnik staršyni BSDP(H) Uładzimier Niściuk na seminary Parlamenckaj asamblei NATO pa Biełarusi, jaki prachodziŭ 13–14 kastryčnika ŭ Vilni. Prysutnyja pačuli tekst niby zredahavany ŭ Administracyi prezydenta.
Niściuk zajaviŭ: apazycyja «nia maje padtrymki ŭ narodu», ź joj «nia choča mieć spravu namenklatura», jaje «raździrajuć unutranyja supiarečnaści». Apazycyi aby (cytujem) «realizoŭvać łopajuščyjesia prajekty kštałtu apošniaha: «Milinkievič – naš prezydent». Nam pašenciła, što jon im nia staŭ, bo za im – pustata».
Adnačasova Niściuk nie škadavaŭ słovaŭ zachapleńnia kiraŭnikom Biełarusi. «A.Łukašenka – heta nie Akajeŭ, nia Kučma, nie Ševardnadze i navat nie Saakašvili. Heta – mocny, valavy, samadastatkovy i samastojny palityk. (...) Dastatkovuju vahu hetamu lideru prydajuć narastajučy ekanamičny i palityčny aljans z Kitajem i šmatlikimi krainami Paŭdniovaha Ŭschodu. (...) Sacyjalnyja prajekty, jakija stała realizujucca ci navat prosta deklarujucca ŭ krainie, harantujuć najvyšejšaj biełaruskaj uładzie na bližejšy čas pastajannuju padtrymku bolšaści žycharoŭ, pryčym nia tolki pensijaneraŭ i invalidaŭ, ale i peŭnaj častki inšych słajoŭ hramadztva: kvalifikavanych rabočych, siarednich pradprymalnikaŭ, tvorčaj, navukovaj i pedahahičnaj intelihiencyi. Jon umieje dyryžyravać nastrojami lepš za luboha postsavieckaha lidera».
Z vusnaŭ Niściuka prahučała i zvyčajnaja dla Łukašenki fraza ab tym, što kiraŭnik dziaržavy «trymaje ŭ rukach zasłon Eŭropy ad nielehalnaj mihracyi», bo praź Biełaruś nibyta štohod prachodziać 150–200 tysiačaŭ nielehałaŭ.
Niściuk kaža: hałoŭnaj pamyłkaj apazycyi apošnich dvanaccaci hadoŭ było «tupoje žorstkaje supraćstajańnie ŭładam u lubych aspektach». Jon za toje, kab palityki pačali razmaŭlać z narodam na «zrazumiełaj movie, chaj heta navat sumieś biełaruskaj i rasiejskaj». A «padtrymka nacyjanalistyčnaj apazycyi supiarečyć mentalitetu biełaruskaj nacyi».
Niściuk nia vieryć u masavy ŭdzieł hramadzianaŭ Biełarusi ŭ palitycy ŭ budučyni: «Zapeŭnivańni asobnych pradstaŭnikoŭ apazycyi, što jany vyvieduć na płošču sto tysiač čałaviek, – absalutny blef. Nia hetym treba zajmacca».
A čym ža treba? Sp.Niściuk raić: supracoŭničać z uładami: «My pavinny pasprabavać ź imi supracoŭničać. Rasiejski ekanamičny šantaž moža zblizić pazycyi ŭłady i demakratyčnych siłaŭ». Niściuk zahavaryŭ pra «kanstruktyŭnuju apazycyju», pad jakoj kiraŭnik Biełarusi zvyčajna maje na ŭvazie palitykaŭ kštałtu Siarhieja Hajdukieviča j Volhi Abramavaj.
Na dumku Niściuka, eŭrapiejcam treba vieści pieramovy «nie z radykalnymi apazycyjanerami, a z uładaj i kanstruktyŭnaj apazycyjaj». Tut U.Niściuk pierajšoŭ da kankretnych prapanovaŭ.
Pa-pieršaje, namieśnik staršyni BSDP(H) zaklikaŭ skasavać kropkavyja vizavyja i ekanamičnyja sankcyi, suprać najvyšejšaha kiraŭnictva Biełarusi, jak «biessensoŭnyja».
Pakrokavaja narmalizacyja adnosinaŭ ES ź Biełaruśsiu, na dumku Niściuka, mahła b adbycca nastupnym čynam.
2) Biełarusi viartajuć status specyjalna zaprošanaha ŭ Radu Eŭropy ŭ abmien na «chaj navat adzinkavyja źmieny ŭ vybarčaje zakanadaŭstva».
3) Eŭraźviaz adkładaje na hod-dva rašeńnie ab pazbaŭleńni Biełarusi handlovych preferencyj, a Miensk idzie na źmiakčeńnie prysudu Kazulinu.
4) Eŭrapiejskija instytuty admaŭlajucca ad finansavańnia novych prahramaŭ radyjo- i televiaščańnia na Biełaruś, a A.Łukašenka viartaje «Narodnuju volu» i «inšyja apazycyjnyja hazety» ŭ kijoski i padpisnyja katalohi.
5) Uzamien za źmiakčeńnie zakanadaŭstva pra masavyja akcyi i admienu niekatorych normaŭ Kryminalnaha i Administracyjnaha kodeksaŭ Biełaruś viartajuć u Radu Eŭropy, razmarožvajecca supraca z Eŭrasajuzam, uchvalajucca adzin-dva investycyjnyja prajekty.
Dyjaloh z A.Łukašenkam dla rašeńnia ŭsich hetych pytańniaŭ, na dumku Niściuka, musiać vieści «znakavyja asoby, jakija zmohuć vystupić dastojnymi partnerami». Heta, viadoma ž, nia lidery apazycyi i nie hramadzkija dziejačy, a eks-prezydent Litvy Alhirdas Brazaŭskas i eks-prezydenty Polščy j Łatvii (majucca na ŭvazie chiba što nie Vałensa, a Kvaśnieŭski i Ułmanis). Ich prapanujecca nadzialić mandatam adnaho z eŭrapiejskich instytutaŭ, najlepiej ABSE.
I praŭda, jak ža pa BT było b pakazać dyjaloh A.Łukašenki z A.Milinkievičam, akademikam Hareckim i Žannaj Litvinoj? U nas ža niama apazycyi, jość kučka ekstremistaŭ na datacyi Zachadu. A Brazaŭskas budzie hladziecca vielmi navat impazantna: izalacyja prarvanaja.
Prapanovy Niściuka nia jość nijakim zrucham. Pa-raniejšamu prapanujecca ihnaravać najaŭnaść u Biełarusi apazycyi i alternatyŭnaha hramadztva, biez čaho demakratyčny praces zastaniecca imitacyjaj, a pravy čałavieka nie atrymajuć zakanadaŭčych harantyj. Ale heta adstupleńnie. Vierniemsia da pramovy Niściuka na nataŭskim seminary.
Šostaje i, zdajecca, hałoŭnaje, čaho, na dumku Niściuka, čakaje Miensk: «Pieršym syhnałam moža stać uzhodnienaja pazycyja eŭrapiejskich krainaŭ u dačynieńni da rasiejskaha hazavaha šantažu Biełarusi. Treba pakazać, što nia tolki Ŭschod i Azija mohuć stać aporaj našaj biełaruskaj dziaržavie».
Ź pieršaj častkaj pramovy sp.Niściuk lohka moh by vystupić na jakim Usiebiełaruskim schodzie, a voś druhaja – jasny plan.
Pakul takija pramovy nie supravadžajucca dziejańniami, jany mała što aznačajuć. Adnak niešta jany ŭsio-taki značać: na rasiejskim kirunku bieź pieramienaŭ, i sioj-toj čakaje haračańkaj zimy.
ZP
Tyja samyja dumki U.Niściuk vykazaŭ u interviju ahienctvu «Markietynh i kansałtynh». Poŭny tekst hladziecie tut.
Kamentar BSDP(H) da vykazvańniaŭ U.Niściuka voś tut.
?
Uładzimier Niściuk: «Chiba Eŭropa nie pryzna? Łukašenki?»
Kab pastavić usie kropki nad «i» datyčna vilenskich zajavaŭ namieśnika staršyni BSDP(H) Uładzimiera Niściuka, my niepasredna źviarnulisia da aŭtara hetych słovaŭ.
«Naša Niva»: Spadar Niściuk, Vašyja vilenskija zajavy nakont mahčymaha dyjalohu miž biełaruskimi ŭładami i eŭrapiejskimi strukturami narabili mnoha šumu. Što mienavita Vy chacieli tady skazać?
Uładzimier Niściuk: Hetaja zajava nie źjaviłasia raptoŭna. Jašče try hady tamu my z Uładzimieram Padhołam padrychtavali strtehiju, jakaja była raźličanaja na pakrokavaje zbližeńnie Biełarusi z ES. Takaja patreba naśpieła paśla taho, jak u Eŭrasajuz ustupili krainy – susiedki Biełarusi. Ciapier my majem zusim inšuju sytuacyju, mianiajucca hieapalityčnyja kanfihuracyi. Havorka idzie navat pra stratu niezaležnaści, tamu taki dyjaloh prosta nieabchodny. Eŭropa ŭžo zrabiła pieršy krok da zbližeńnia, kali admoviłasia ŭvodzić suprać Biełarusi ekanamičnyja sankcyi. Łukašenka ŭ adkaz daŭ mahčymaść bolš svabodna dychać prafsajuzam. Takaja palityka budzie na karyść abodvum bakam.
«NN»: Ci budzie miesca ŭ takim dyjalohu apazycyi?
UN: A chto moža jaje hodna reprezentavać? Ciapier niama kandydatury, jakaja b zadavalniała ŭsich. Kali pierad vybarami my mieli dva apazycyjnyja centry, to ciapier takich užo čatyry ci navat bolej. U apazycyi ničoha niama, jana straciła navat toje nievialikaje, što mieła dahetul.
«NN»: Takim čynam, Vy prapanoŭvajecie, kab Eŭropa aficyjna pryznała lehitymnaść vybaraŭ 2006 hodu?
UN: A chiba jana nie pryznaje Łukašenki ciapier? Niepryznańnie jość tolki ŭ zajavach roznych eŭrakamisaraŭ, a nasamreč idzie ščylnaja praca dziełavych i finansavych kołaŭ Eŭropy ź biełaruskimi ŭładami. I toje, što Piatkievič z Kabiakovym jeduć na forum u Ženevu, ja liču pazytyŭnym krokam u hetym kirunku.
«NN»: Čamu Vy zaklikajecie Eŭraźviaz spynić finansavańnie tele- i radyjoprajektaŭ, raźličanych na Biełaruś?
UN: My dobra viedajem, jakija hrošy atrymlivajuć žurnalisty, što pracujuć u Biełastoku, Varšavie ci Berlinie, i viedajem, jak pracujuć ichnija kalehi na radzimie, kali počastu jany znachodziacca ŭ paŭžabrackim stanoviščy. Ja vystupaju za inšaje raźmierkavańnie hrošaj, što iduć z Eŭropy. U Biełarusi jość ludzi, jakija pa try i bolej hadoŭ siadziać biaz pracy, bo stracili jaje praz svaje palityčnyja pierakanańni. U pieršuju čarhu treba dapamahać mienavita im. A to polski bok vydzialaje trysta miescaŭ dla studentaŭ, dyk, prabačcie, stolki blizka nia vyhnali z VNU.
«NN»: Vy kažacie, što, kali b apazycyja pryjšła da ŭłady, jana b nie zmahła kiravać krainaj. Čym Vy heta abhruntoŭvajecie?
UN: Bo za apošnija hady apazycyja roŭnym likam ničoha nie zrabiła. Jana trymajecca jašče na tych zdabytkach, jakich u 1991 hodzie dasiahnuŭ Zianon Paźniak sa svaimi paplečnikami. Novych dasiahnieńniaŭ niama, adny niaŭdačy. Za piać hadoŭ ad času prezydenckich vybaraŭ-2001 apazycyja zhubiła 10% svaich prychilnikaŭ, i nie tamu, što jany chočuć hałasavać za Łukašenku, a tamu, što nia chočuć – za apazycyju.
«NN»: Čamu Vaša partyja nie padtrymała Vašych zajavaŭ?
UN: U nas jość prahrama «Šlach da hodnaha žyćcia», jakaja była zaćvierdžana, jašče kali Kazulin byŭ na voli. Taja prahrama ŭtrymlivaje amal usie maje siońniašnija pastulaty i zajavy. Ničoha novaha ja nie kazaŭ. Što da partyi, to ŭ nas poŭny pluralizm, my ž nie KPSS, tamu kožny maje prava vykazvać svaje pazycyi.
Hutaryŭ Źmicier Pankaviec
Fota photo.bymedia.net
