Milinkievič źjechaŭ, a Pucin sychodzić
Haspadar Kramla najeŭsia ŭłady. U Biełarusi jaje ŭsim mała.
Apošnim časam byłomu adzinamu kandydatu dajuć dychtu z usich bakoŭ. Voś i niezaležnyja sacyjolahi ŭlili łyžku dziohciu. Paviedamili, što za paŭhoda jahony rejtynh źjechaŭ napałovu: z 20,4% da 11,6%. Na siońnia pakazčyk, mabyć, jašče bolej ścipły.
Zrešty, ździŭlaje nia heta. Rasčaravańnie naiŭnych šarahovych demakrataŭ zrazumiełaje. Ciažka zrazumieć inšaje: praciah zaklinańniaŭ pra niepaźbiežnaść chutkaj mirnaj revalucyi. Padajecca, usio ž bližejšy da iściny palitolah Alaksandar Rar, śćviardžajučy: scenar kalarovych revalucyjaŭ, "što jašče hod-dva tamu razhladaŭsia Eŭropaj jak niejki šaniec dziela demakratyzacyi krainaŭ byłoha SSSR, zaraz siabie ŭžo vyčarpaŭ".
Asensavańnia ž toj novaj realnaści, u jakoj apynulisia apanenty ŭłady paśla sakavika, u ichnim asiarodździ amal što niama. Zatoje Milinkieviču dajuć vyśpiatkaŭ ź niejkaj sadysckaj apantanaściu. Hałoŭny redaktar "Biełaruskich navinaŭ" Kiryła Paźniak zadajecca rytaryčnym pytańniem: našto ŭ apazycyjnym lahery tak skubucca za sakołku lidera? Bo sapraŭdy: kamu ni daj, da vybaraŭ 2011 hodu zašmalcujuć darešty...
A voś Pucin, na dumku maskoŭskaha publicysta Leanida Radzichoŭskaha, apošnim časam kłopat pra vybary vykinuŭ z hałavy. "Adviazaŭsia" nastolki, što dazvoliŭ sabie navat fryvolna pavinšavać izrailskaha kalehu sa zhvałtavańniem dziesiaci kabietaŭ.
Pavodle versii Radzichoŭskaha, haspadar Kramla raźniavoliŭsia z taje pryčyny, što ćviorda vyrašyŭ dla siabie: sychodžu!
Biełaruskija naziralniki padstaŭ dla analahičnaj versii pakul što nia mohuć razhledzieć i ŭ mikraskop. Va ŭsiakim razie, vinšavańni zamiežnym kaleham z rezydencyi na Karła Marksa, 38 iduć vyklučna pratakolnyja. Dy i ŭvohule tam žartavać nia lubiać.
Kamientary