Dziaržduma padtrymała Miadźviedzieva

Adnosiny Maskvy i Minska nie pavinny vykarystoŭvacca ŭ jakaści raźmiennaj maniety padčas pieradvybarnaj kampanii ŭ Biełarusi — takaja sutnaść zajavy «Ab situacyi ŭ rasijska-biełaruskich adnosinach», pryniataj 6 kastryčnika Dziarždumaj RF.

«Antyrasijskaja rytoryka, jakaja vykarystoŭvajecca zaraz kiraŭnictvam Respubliki Biełaruś, vyklikaje ździŭleńnie i poŭnaje nieprymańnie ŭ rasijskaha naroda, idzie ŭrazrez z ahulnahistaryčnym losam ruskaha i biełaruskaha narodaŭ, supiarečyć duchu šmatviakovych kulturnych i ekanamičnych suviaziaŭ, našamu ładu žyćcia i myśleńnia», — cytuje dakumient RIA Novosti.

Deputaty Dziarždumy padtrymali pazicyju, vykazanuju na hety kont prezidentam Rasii Dźmitryjem Miadźviedzievym.

U zajavie adznačajecca, što pierad Rasijaj i Biełaruśsiu «stajać stratehičnyja zadačy», i heta nakładvaje na abiedźvie dziaržavy «asablivuju adkaznaść», najpierš za raźvićcio intehracyjnych pracesaŭ u miežach SND, ADKB, JeŭrAzES i Mytnaha sajuza.

«Rasija, — padkreślivajecca ŭ zajavie Dziarždumy, — była i zastajecca ćviordym prychilnikam sajuznaha budaŭnictva. Kanjunkturnyja palityčnyja intaresy, jakija stali brać vierch padčas pieradvybarnaj kampanii ŭ Respublicy Biełaruś, nie pavinny pryvieści da padryvu sajuźnickich stratehičnych adnosin pamiž našymi krainami, ubić klin u ciesny sajuz dvuch braterskich narodaŭ».

Inicyjataram pryniaćcia zajavy vystupiŭ kiraŭnik kamiteta Dziarždumy pa spravach SND Alaksiej Astroŭski.

«Toje, što prahučała z vusnaŭ kiraŭnika biełaruskaj dziaržavy, — heta biahučy palityčny momant, kanjunktura, jakaja źviazana ź biahučaj palityčnaj kampanijaj, što prachodzić ciapier na terytoryi braterskaj dziaržavy», — ličyć jon.

«Taksama, na žal, treba kanstatavać, što toje, što prahučała, źjaŭlajecca ŭ tym liku sprobaj niekatorych sił na Zachadzie, jakija niastomna praciahvajuć sprabavać razburyć tyja intehracyjnyja pracesy, što isnujuć na ŭsioj pastsavieckaj prastory i pamiž našymi dziaržavami», — dadaŭ Astroŭski.

Jon taksama padkreśliŭ, što, «pavodle infarmacyi, jakaja pastupaje ŭ kamitet z roznych kampietentnych krynic, u hetym udzielničaje i źbiehły rasijski pradprymalnik Barys Bierazoŭski».

1 kastryčnika na pres-kanfierencyi dla rasijskich rehijanalnych ŚMI Alaksandr Łukašenka rascaniŭ svaje adnosiny ź Dźmitryjem Miadźviedzievym i Uładzimiram Pucinym jak «drennyja, kali nie skazać horš». Adkaznaść za heta jon uskłaŭ na «kučku vysokapastaŭlenych rasijskich čynoŭnikaŭ».

4 kastryčnika Dźmitryj Miadźviedzieŭ u svaim videabłohu raźmiaściŭ zvarot, u jakim zajaviŭ, što kiraŭnictva Biełarusi sprabuje zrabić z Maskvy adnaho z hałoŭnych vorahaŭ Minska. Miadźviedzieŭ adznačyŭ, što pieradvybarnaja kampanija Łukašenki pabudavana vyklučna na antyrasijskich siužetach, a taksama nazvaŭ niesumlennymi pavodziny biełaruskich uład u situacyi z pryznańniem niezaležnaści Abchazii i Paŭdniovaj Asiecii.

U toj ža dzień pres-sakratar prezidenta RF Natalla Cimakova zajaviła, što adnosiny z kiraŭnictvam Biełarusi zajšli ŭ tupik i ŭžo nie buduć raniejšymi, ale palityčnyja kantakty buduć praciahvacca.

• 0
• 0
• 0
• 0
• 0
• 0
• 0
• 0