«Miadźviedzieŭ vyjaviŭ siabie chitrejšym psichołaham za Pucina»

Staršynia Rady BNR Ivonka Surviła vystupiła sa zvarotam, u jakim vykazała svajo staŭleńnie da niadaŭniaj zajavy prezydenta Rasiejskaj Federacyi Dźmitryja Miadźviedzieva.

U svaim zvarocie Ivonka Surviła adznačaje, što «jak i Pucin u 2002 hodzie, ciapierašni prezydent Rasiejskaj Federacyi Miadźviedzieŭ vyjaviŭ, što rasiejskaja palityka adnosna Biełarusi nie źmianiłasia. Maskva praciahvaje svaje namahańni prahłynuć naš kraj. Hetym razam choča heta zrabić znutry — uhavaryć biełarusaŭ, što jany i rasiejcy nia tolki «nierazryŭna źviazanyja», ale što jany hramadzianie toj samaj «sajuznaj dziaržavy». I nia tolki susiedzi, ale i «adzin narod» — piša Ivonka Surviła.

Staršynia Rady BNR adznačaje, što «niezakonny rasiejska-biełaruski sajuz byŭ prydumany maskoŭskimi stratehami supolna z Alaksandram Łukašenkam, kab Kreml moh umiešvacca va ŭnutranyja spravy susiedniaj dziaržavy. Miadźviedzieŭ vyjaviŭ siabie chitrejšym psycholaham za Pucina. Ale jamu varta było b zazirnuć u historyju dačynieńniaŭ miž našymi, byccam by „bratnimi“ narodami… Jamu varta było b pacikavicca napadam Maskvy na našuju histaryčnuju dziaržavu — Vialikaje Kniastva Litoŭskaje — u 1654 hodzie, toj „nieviadomaj vajnoj“, pra jakuju Maskva ŭsio jašče maŭčyć. Za trynaccać hadoŭ maskoŭskija ahresary tady vyrazali pałovu nasielnictva našaj krainy. Pavodle siońniašnich historykaŭ, vajna hetaja stałasia pačatkam zaniapadu našaj histaryčnaj dziaržavy. Spadaru Miadźviedzievu varta było b pacikavicca mnostvam sprobaŭ Maskvy adkryć sabie šlach u Eŭropu praz naš kraj; zachopam biełaruskich ziemlaŭ Kaciarynaj II, antyrasiejskimi paŭstańniami ŭ 19-ym stahodździ, niščeńniem Maskvoj relihijnaj i kulturnaj spadčyny, našaj movy; vyvazami ŭ Sibir pracavitaj častki biełaruskaha narodu; napadam rasiejskich balšavikoŭ u 1918 hodzie na našu maładuju dziaržavu, Biełaruskuju Narodnuju Respubliku; Słuckim Zbrojnym Čynam, kali słuččaki pajšli pamirać, kab abaranić svoj kraj ad balšavickaj navały» — nahadvaje staršynia Rady BNR.

Dalej Ivonka Surviła piša: «Varta pryhadać Kurapaty, dzie rastralali dziesiatki tysiač biełarusaŭ. Varta prypomnić taksama razburalnuju dziejnaść Chruščova, jaki ŭ 1960-yja hady źniščaŭ u Biełarusi histaryčnyja pomniki, kab ścierci našaje słaŭnaje minułaje z pamiaci narodu. Raju spadaru Miadźviedzievu zadumacca nad usim tym, što Maskva pakinuła nam u spadčynu, uklučna z Čarnobylskaj atrutaj. Raju pacikavicca „referendumam“ 1995 hodu, kali ŭ intaresach Maskvy byli źniavažanyja śviatyja biełaruskija symbali i biełaruskaja mova, a taksama padtrymkaj Kramlom antykanstytucyjnaha pieravarotu ŭ 1996 hodzie. A heta tolki niekalki prykładaŭ namahańniaŭ Maskvy histaryčna ścierci z pavierchni Ziamli susiedni, byccam by „bratni“, narod. U dadzienym vypadku Miadźviedzieŭ dałučyŭsia da hetych namahańniaŭ, karystajučysia nahodaj svajho kanfliktu z Łukašenkam», — ličyć Ivonka Surviła.

Na zaviaršeńnie svajho zvarotu z nahody vystupu rasiejskaha prezydenta staršynia Rady BNR piša:

«Treba spadziavacca, što biełarusy zrazumiejuć sapraŭdny sens jahonaj zajavy i nie daduć hetym razam siabie padmanuć. Naš najbolšy skarb — heta niezaležnaść demakratyčnaj biełaruskaj dziaržavy».

• 0
• 0
• 0
• 0
• 0
• 0
• 0
• 0