Enerhija dzielić Eŭraźviaz

Zamiest taho, kab być śviedčańniem jednaści, narada kirujučych kołaŭ Eŭraźviazu, što raspačniecca zaŭtra ŭ Łachci, moža kančatkova pierakanać Rasieju ŭ tym, što ŭ enerhietyčnych spravach EZ hłyboka raździeleny.

U piatnicu da finskaha kurortu Łachci źjeducca kiraŭniki dziaržavaŭ i ŭradaŭ EZ, zaprošanyja finami na niefarmalnuju naradu. Kulminacyjny momant narady čakajecca ŭviečary, kali na viačeru pryjedzie prezydent Rasiei Ŭładzimier Pucin.

I pamiž dalikatesami finskaj kuchni lidery EZ buduć sprabavać pierakanać rasiejskaha prezydenta ŭ nieabchodnaści źmienaŭ pryncypaŭ enerhietyčnaha supracoŭnictva.

Razmova pra pastaŭki hazu i nafty z Rasiei dla EZ nahetulki važnaja, što da minimumu buduć źviedzienyja inšyja temy – zabojstva žurnalistki Hanny Palitkoŭskaj, svaboda presy ci napružanyja ŭzajeminy Rasiei z Hruzijaj.

Čaho choča Eŭraźviaz?

Eŭrakamisija kolki dzion tamu paviedamiła, na čym musili b palahać novyja pryncypy supracoŭnictva z Rasiejaj u enerhietyčnych pytańniach. Rasieja najbujniejšy pastaŭščyk enerhietyčnaj syraviny ŭ Eŭropu – adtul pachodzić 40 adsotkaŭ nafty i 24 adsotki hazu, što vykarystoŭvajucca ŭ EZ.

Pakolki eŭrapiejskija hazavyja radoviščy vyčerpvajucca, a spažyvańnie hazu ŭzrastaje (z 277 młrd m3 u ciapierašni čas da 535 młrd m3 u 2030 h.), hetaja zaležnaść budzie tolki pavialičvacca. Brusel aceńvaje, što Eŭropa budzie vydatkoŭvać na impart hazu bolš za 50 młrd eŭra štohod!

Tamu takija kancerny, jak Shell, BP ci Total, žadajuć mieć niepasredny dostup da rasiejskich radoviščaŭ hazu i nafty – što padtrymlivajecca Bruselem. Kamisija žadaje, kab pryncypy eksploatacyi hetych radoviščaŭ byli čytelnyja i kab nie źmianialisia ŭ zaležnaści ad kapryzaŭ maskoŭskich čynoŭnikaŭ.

Kancerny taksama žadajuć złamać manapoliju «Hazpromu» i mieć mahčymaść samim transpartavać syravinu praz rasiejskija trubapravody. U abmien na takoje adkryćcio rynku – prapanuje Brusel – rasiejskija firmy zmohuć svabodna rabić investycyi ŭ Eŭropie. I, naprykład, pierajmać va ŭłasnaść dystrybucyjnyja kampanii, na jakich možna zarabić najbolšyja hrošy.

Ale Rasieja pakul što nie prymaje hetych praviłaŭ hulni. Jana admoviła ŭ ratyfikacyi specyjalnaj damovy – t.zv. Enerhietyčnaj Mapy. Rasiejcam bolš padabajecca ciapierašniaja sytuacyja, pry jakoj manapoliju na pastaŭki i adpraŭku syraviny majuć rasiejskija firmy. A dziakujučy miljardavym prybytkam jany i tak nacelvajucca na ekspansiju ŭ Eŭropie.

Demanstracyja (braku) jednaści

Brusel spadziajecca, što zdoleje naviazać Rasiei novyja praviły hulni. Adnak jamu daviadziecca pierakanać rasiejcaŭ, što Eŭropa ŭ hetaj spravie vystupaje adzinahałosna. Prablema palahaje ŭ tym, što heta nia tak.

Prykłady znajści niaciažka. Užo praź niekalki dzion paśla publikacyi prapanovy Eŭrakamisii da dyplamataŭ EZ trapiła krytyčnaja pazycyja polskaha ŭradu. Polšča ličyć, što dakument zanadta mała kaža pra «enerhietyčnuju salidarnaść».

Jość i inšyja prykłady. Roznyja krainy pa-roznamu razumiejuć słovy «dyversyfikacyja pastavak». Dla Niamieččyny hetkaj dyversyfikacyjaj akurat jość budaŭnictva paŭnočnaha trubapravodu praz Bałtyku. Dla Polščy ž heta niebiaśpiečna.

Polšča ličyć, što EZ pavinien finansavać budaŭnictva sietki trubapravodaŭ, što buduć złučać krainy EZ, kab jany mahli dapamahać adna adnoj u zdareńni kryzisu. Adnak Hišpanija chacieła b, kab hrošy EZ pajšli na raźvićcio impartu hazu z Paŭnočnaj Afryki.

«Badaj niama šancaŭ, što na naradzie ŭ Łachci budzie enerhietyčnaja adzinahałosnaść», – kaža francuski dyplamat u Bruseli.

U dadzienaj sytuacyi Rasieja moža spakojna praciahvać pravodzić adnosna Eŭropy palityku «padzialaj i panuj». I paŭtarać takija žesty, jak, naprykład, adnosna Niamieččyny, jakoj jana niadaŭna paabiacała pryvilejavanyja enerhietyčnyja suviazi. Zhodna z hetaj prapanovaj, Niamieččyna musiła była b stać hałoŭnym «dystrybutaram» rasiejskaha hazu ŭ Eŭropie.

Pucin jedzie pa pieramohu?

Finy sprabujuć vyratavać sytuacyju. Ichni premjer Maci Vanchanen moža navat vyrašyć, što padčas viačery z Pucinam uvohule nia budzie «nacyjanalnych» vystupaŭ. Pytańni rasiejskamu prezydentu budzie zadavać, naprykład, jon sam ad imia ŭsiaho EZ.

«Rasieja ŭžo viedaje pazycyi paasobnych dziaržavaŭ EZ. Nia nadta sabie ŭjaŭlaju, kab narada ŭ Łachci była vykarystanaja dla dvuchbakovych razmovaŭ. My musim pakazać siabie rasiejcam nahetulki abjadnanymi, nakolki heta mahčyma», – tłumačyć finski dyplamat.

• 0
• 0
• 0
• 0
• 0
• 0
• 0
• 0