Siońnia były kandydat na pasadu prezydenta Alaksandar Kazulin pačynaje ŭ turmie haładoŭku pratestu suproć niezakonnaha, jak jon ličyć, znachodžańnia pry ŭładzie Alaksandra Łukašenki.
Siońnia były kandydat na pasadu prezydenta Alaksandar Kazulin pačynaje ŭ turmie haładoŭku pratestu suproć niezakonnaha, jak jon ličyć, znachodžańnia pry ŭładzie Alaksandra Łukašenki. U jakich umovach budzie prachodzić haładoŭka Alaksandra Kazulina i kolki moža praciahvacca hetaja akcyja?
Mety haładoŭki Alaksandar Kazulin sfarmulavaŭ miesiac tamu ŭ admysłovym liście, pieradadzienym na volu. Palityk zajaviŭ, što nia ličyć sakavickich vybaraŭ adbytymi, a tamu Alaksandar Łukašenka, na jahonuju dumku, musić pieradać abaviazki prezydenta premjeru Siarhieju Sidorskamu, ad jakoha Alaksandar Kazulin ciaham miesiaca čakaje pryznačeńnia novych vybaraŭ.
Dva dni tamu, sustrakajučysia z svajakami ŭ kalonii, były kandydat na prezydenta paćvierdziŭ namier pačać biesterminovuju haładoŭku mienavita siońnia, 20 kastryčnika. Jon skazaŭ, što ŭžo painfarmavaŭ pra heta i administracyju kalonii.
U administracyi paćvierdzili, što viedajuć pra namier Alaksandra Kazulina haładavać, ale admovilisia dać źviestki pra ŭmovy, u jakich budzie prachodzić haładoŭka. Raniej u administracyi kalonii zajaŭlali, što na čas haładoŭki pieraviaduć Alaksandra Kazulina ŭ asobnaje pamiaškańnie. Chutčej za ŭsio, u medyčnuju častku.
Jak pavodle zakonu administracyja papraŭčaj ŭstanovy maje reahavać na haładoŭku źniavolenaha? Advakat palityka Ihar Rynkievič patłumačyŭ dla Radyjo Svaboda:
(Rynkievič: ) «Ličycca, što heta nie parušeńnie turemnaha režymu, kali čałaviek admaŭlajecca ad ježy i vystaŭlaje peŭnyja patrabavańni. Ciaham troch dzion administracyja kalonii musić paviedamić vyšejšamu kiraŭnictvu i painfarmavać prakuraturu, a mienavita taho prakurora, jaki naziraje za zakonam u kalonii. Prakuror-naziralnik pavinien pryjechać, vysłuchać patrabavańni i adreahavać na ich: vykanać, kali heta pavodle zakonu i ŭ jaho kampetencyi, a kali nie, tady dakłaści dalej pa instancyi».
Ihar Rynkievič spadziajecca, što jahonaha padabaronnaha pieraviaduć u medyčnuju častku, dzie za stanam zdaroŭja budzie vieścisia nahlad. Advakat nia vyklučyŭ, što haładoŭku Kazulina mohuć prymusova spynić.
(Rynkievič: ) «Mohuć prymusova jaho skrucić i ŭvieści jamu ŭ kroŭ rastvor hlukozy. Kali ja byŭ u kalonii 10 kastryčnika, mnie pra heta namiaknuli. Maŭlaŭ, kab vyratavać žyćcio. Tym bolš, što Kazulin zajaviŭ, što budzie haładać da apošniaha: i 30, i 40 dzion».
Žonka palityka Iryna Kazulina kaža, što padtrymlivaje mužavy palityčnyja pohlady, ale jana – suprać haładoŭki. «Zdaroŭje adno», – kaža žančyna. Na apošnim spatkańni z mužam jana sprabavała adhavaryć jaho ad haładoŭki, ale heta nie ŭdałosia. Zatoje padčas hetaj sustrečy Alaksandar Kazulin bolš peŭna akreśliŭ umovu, pry jakoj jon spynić haładoŭku.
(Kazulina: ) «Ja baču, što jon najpierš aryjentavany na mižnarodny ŭzrovień. Jon skazaŭ, što spynić haładoŭku, kali pytańnie pa Biełarusi budzie razhledžanaje ŭ AAN».
Viadoma, što 19 kastryčnika Iryna Kazulina sustrakałasia z šeraham kiraŭnikoŭ biełaruskaj apazycyi, ź jakimi abmierkavała zachady palityčnaj padtrymki akcyi jaje muža.
* * *
Alaksandar Kazulin byŭ asudžany na piać z pałovaju hadoŭ źniavoleńnia – sud u Miensku paličyŭ jaho vinavatym u chulihanstvie i arhanizacyi vuličnych biesparadkaŭ 25 sakavika. Eks-kandadat na pasadu prezydenta vinavatym siabie nie pryznaje i tłumačyć pieraśled palityčnymi matyvami.
Kamientary