Pieršakłaśnicu vyklučyli sa škoły za toje, što jana śpiavała na ŭrokach

Sioleta siamihadovaja Aryjana pajšła ŭ siaredniuju škołu №11 Hrodna, ale pravučyłasia tam usiaho piać dzion. Pa słovach baćkoŭ, dyrektar skazaŭ, što dziciaci nie miesca ŭ zvyčajnym kłasie.

Psichołahi ž ličać: piedahohi prosta nie hatovyja da taho, što ŭ našym hramadstvie źjaŭlajucca «niezvyčajnyja» dzieci.

Dazvolcie pradstavicca: Aryjana Jurjeŭna.

U tym, što Aryjana padajecca niezvyčajnaj, pierakanałasia karespandent Dźviery ŭ šmatpaviarchoŭcy pa vulicy Biełuša adkryła dziaŭčynka mocnaha ciełaskładu, z doŭhaj rusaj kasoj: «Dobry dzień, raspranajciesia, dazvolcie mnie vam dapamahčy. Mama, padaj viešałku. Jakoje ŭ vas pryhožaje palito», — pačała junaja surazmoŭca. Baćki ledź paśpiavali za dačkoj, jakaja praciahvała ździŭlać vietlivaściu: «Davajcie projdziem u zału, siadajcie. Dazvolcie pradstavicca: kličuć mianie Aryjana Jurjeŭna, heta maja siamja».

Na hetym, na žal, razmova była skončana. Aryjana Jurjeŭna prapanavała pracierci maje akulary i paśla hetaha pierastała zusim źviartać uvahu na navakolnych: na imia nie adhukałasia, na pytańni nie adkazvała, tancavała i napiavała pieśniu z multfilma. «Voś takoje ŭ nas dzicia», — prosiačy prabačeńnia, vymaviła Taćciana.

Dzicio vyvučali baćki i miedyki

Jak vyjaviłasia, takija pavodziny dziciačyja psichołahi tłumačać słovam «hipieraktyŭnaść». Praŭda, z udakładnieńniem: heta nie miedycynski dyjahnaz, a asablivaści niervovaj sistemy, pry jakich usie intelektualnyja funkcyi zachoŭvajucca. Pierad škołaj ź dziaŭčynkaj zajmalisia psichołahi i defiektałohii. Pa słovach mamy, Aryjana navučyłasia zajmacca adnoj spravaj na praciahu 45 chvilin z adpačynkam na pieramieny. Mahła čytać pa składach, umieła ličyć. Ale svaje ŭmieńni ŭ kłasie tak i nie pakazała. Na piaty dzień, kali baćki aburylisia čystym pracoŭnym sšytkam pieršakłaśnicy, ich adrazu ž paklikali da dyrektara. Pa słovach baćki dziaŭčynki Juryja, administracyja škoły była nastrojena kateharyčna: dziciaci treba zajmacca doma. Usio tamu, što dziaŭčynka nie słuchałasia nastaŭnika, chadziła pa kłasie i śpiavała pieśni.

«Kali my padavali dakumienty ŭ škołu, papiaredzili, što takija pavodziny praciahniecca dva-try miesiacy. Mienavita stolki doŭžycca pieryjad adaptacyi ŭ takich dziaciej. Tak było ŭ Aryjany i ŭ dziciačym sadzie», — rastłumačyła maci dziaŭčynki.

U śpieckłasie budzie lepš?

Usio b ničoha, ale vučycca doma Aryjanie nie rajać śpiecyjalisty — jana pavinna znachodzicca ŭ kalektyvie i pryvykać žyć u socyjumie. «Daviałosia znoŭ źviarnucca ŭ Centr karekcyjnaha raźvićcia, u jakim kamisija da navučalnaha hoda pryznała Aryjana prydatnaj da navučańnia ŭ zvyčajnaj škole. Paprasili dać rekamiendacyju ŭ kłas dla dziaciej ź ciažkaściami ŭ navučańni», — raspaviali baćki. Ciapier jany advoziać Aryjana ŭ śpieckłas na bazie siaredniaj škole № 12 pa vulicy Papoviča.

Baćki, źviartalisia sa skarhaj u adździeł adukacyi administracyi Kastryčnickaha rajona. Mietadyst Alaksandra Leaniec ŭpeŭnienaja, što ŭ śpiecyjalnaj hrupie dziaŭčyncy budzie lepš: «Aryjanie patrebny indyvidualny padychod, jaki nastaŭnik nie zmoža dać, kali ŭ kłasie jašče dvaccać dziaciej. Zasvoić materyjał dapamoža śpiecyjalnaja prahrama, jakaja praduhledžvaje zapaminańnie u hulniach i raźvivajučych mietodykach».

Školnicu byccam padmianili

Dyrektar SŠ № 11 Viktar Kapuścin zapeŭnivaje, što raiŭ nadomnaj navučańnie dla Aryjany, kali paskardzilisia mamy i taty astatnich dziaciej: dzieciam zaminała chadžeńnie dziaŭčynki pa kłasie. U astatnim jaho słovy razychodziacca z apoviedam baćkoŭ Aryjany: pajšoŭ im nasustrač, pakidaŭ jašče na miesiac, prapanavaŭ matematyku i ruskuju movu vyvučać doma, a na malavańnie i fizkulturu prychodzić u škołu. Dy da taho ž niepracujučuju mamu z vyšejšaj adukacyjaj klikaŭ u vychavacieli.

Kali ciapierašniaja nastaŭnica Aryjany Taćciana Mielaniec apisvaje Aryjanu, zdajecca, što dzicia padmianili: režym nie parušaje, na ŭrokach słuchaje, časam napiavaje piesieńku ź lubimaha multfilma «Škoła čaraŭnic», u jakoj abiacaje pieramahčy złaślivych viedźmaŭ Tryks.

Ci mahła Aryjana raźličvać na ahulnaadukacyjnuju škołu?

Namieśnik načalnika Upraŭleńnia ahulnaj siaredniaj adukacyi Ministerstva adukacyi RB Valancina Majeŭskaja:

— Pa zakonie «Ab adukacyi» navat kali rekamiendavana śpiecyjalnaja škoła, a baćki chočuć u ahulnaadukacyjnuju, to ich dzicia pavinny tudy pryniać i vučyć: padabajecca heta nastaŭnikam ci nie.

Mierkavańnie śpiecyjalista

Psichołah Valancina Bahasłoŭskaja:

— Vypuskniki univiersiteta abaranili nie adzin dypłom pa prablemie hipieraktyŭnych dziaciej. Źjava adnosna novaja, ale chutka raspaŭsiudžvajecca. Daviedziena, što pry zaniatkach z defiektołaham i školnym psichołaham takija dzieci supakojvajucca i stanoviacca zvyčajnymi da čaćviortaha-piataha kłasa.

• 0
• 0
• 0
• 0
• 0
• 0
• 0
• 0