Ivan Šyła: Dobra, što kampanijaj zajmajucca maładyja

Moładzievy lider Ivan Šyła ciapier navučajecca ŭ Polščy, ale pry hetym jon uvachodzić u dźvie inicyjatyŭnyja hrupy i krytykuje kandydataŭ Sańnikava i Niaklajeva.

«NN»: Kaho z kandydataŭ vy padtrymlivajecie i čamu?

IŠ:

Z usich kandydataŭ impanuje Aleś Michalevič.

Na moj pohlad, u hetaj vybarčaj kampanii jon maje najbolš realistyčnuju metu, jakaja pradvyznačaje davoli adekvatnuju pazicyju palityka. Maju na ŭvazie žadańnie atrymać dośvied arhanizacyi ahulnabiełaruskaj kampanii, stvareńnia ŭłasnaha imidžu ŭpłyvovaha palityka i, ułasna, kamandy dla nastupnych prezidenckich vybaraŭ.

Važna ahułam i dla nacyjanał-demakratyčnych siłaŭ mieć svaich kandydataŭ, udzielničać u vybarčaj honcy i nabiracca dośviedu i ŭ toj ža momant, zaśviedčyć najaŭnaść u biełaruskaj palitycy ŭ situacyi, kali važnuju rolu pačali adyhravać siły, nastrojenyja na šlach u Jeŭropu praz uschodniuju miažu.

Biezumoŭna, padtrymlivaju i Ryhora Kastusiova

i razumieju, nakolki važna novamu kiraŭnictvu BNF prademanstravać zdolnaść partyi mieć ułasnaha kandydata. Viadoma, chočacca być idealistam-ramantykam i z hetaha punktu hledžańnia

Kastusioŭ idealny kandydat, bo podpisy źbirajucca biaspłatna.

Adnak, u toj ža momant, adsutnaść resursaŭ jość i minusam kandydata, bo tolki na hruncie kaštoŭnaściaŭ naŭrad ci možna mieć vykanalny płan dziejańniaŭ na dalejšych etapach vybarčaj kampanii. Ale vielmi dobra, što kampanijaj zajmajucca mienavita maładyja palityki i hramadskija dziejačy. Idealisty i ramantyki vučacca vykonvać składanyja zadačy ŭ składanych umovach. Dla partyi i ahułam demakratyčnaha ruchu heta budzie važny zdabytak.

«NN»: Vy ŭvachodzicie ŭ jakuju-niebudź inicyjatyŭnuju hrupu?

IŠ: Z tych pryčynaŭ i ŭvachodžu ŭ inicyjatyŭnyja hrupy hetych palitykaŭ. Choć prapanovy byli praktyčna ad usich vyłučencaŭ u kandydaty. Ale, na žal, uvachodžańnie hetaje dekłaratyŭnaje, bo na dadzieny momant atrymoŭvaju adukacyju ŭ Polščy.

«NN»: Za kaho ŭžo padpisalisia i čamu mienavita za hetych ludziej? (kali ŭžo byli ŭ Biełarusi kaniešnie paśla pačatku zboru podpisaŭ)?

IŠ:

Pastaviŭ podpis tolki za Andreja Sańnikava, bo jahonyja paplečniki arhanizavali pikiet niepasredna na čyhunačnym vakzale i daviałosia pierad adjezdam ich spatkać.

Choć, u pryncypie, nie padtrymlivaju kaardynatara Chartyi-97 z mnohich pryčynaŭ. Najpierš — raptoŭnaja źmiena pazicyi, spadzievy na demakratyzacyju praz Rasieju, što nie było ŭłaściva jamu jašče dva hady tamu. Dyj ahułam składajecca ŭražańnie, što Sańnikaŭ robić usie, kab spadabacca Rasiei. Miarkuju, hetaha jamu nie ŭdasca i paśla vybaraŭ daviadziecca znoŭ z nadziejaj hladzieć u raniejšym, zachodnim kirunku. Dyj niejak nie razumieju, jak možna pretendavać na tytuł demakratyčnaha kandydata, kali kiruješ zakrytaj hramadskaj strukturaj nieviadomymi mietadami 14 hod, a stvorany pry joj sajt, choć i jość papularny, ale daloki ad pluralizmu i abjektyŭnaści. Apraŭdańnie takoj pazicyi najaŭnaściu režymu — nie apraŭdańnie dla mianie.

Viadoma, z mocnych kandydataŭ nie možna abminuć Uładzimiera Niaklajeva. Jon sapraŭdy maje najbolš prafiesijnuju i masavuju kamandu. Ale, niajasnaja pazicyi nie vyklikaje davieru. Ja nieadnarazova pra heta havaryŭ i navat atrymaŭ u vieraśni adkaz paeta — pryhožyja dekłaracyi i abiacańni. Pahadžusia z acenkaj Čałaha: «Čałaviek moža havaryć pra ŭsio, ale pry hetym — ni pra što. Pazicyjanavańnia niama nijakaha, naohuł. 

Ni adnaho kankretnaha pytańnia, ni adnaho peŭnaha adkazu, dzie b tam ni było». Nieviadomaje pachodžańnie hrošaj, tatalnaja płata vałancioram, abyjakavaść pry rekrutavańni — techničnyja momanty, jakija sapraŭdy biantežać.

Palityčnyja — pryznańnie Abchazii, tyja ž spadzievy na demakratyzacyju praz Rasieju, mahčymyja intehracyjnyja prajekty z uschodnim susiedam.

I jak ja ni staraŭsia, nie baču palityka ŭ paecie,

na žal. Mienavita takoje mierkavańnie skłałasia ŭletku paśla sustrečy z maładafrontaŭcami. I takim, na žal, zastajecca. Dy jaho kamanda siońnia razam tolki praz najaŭnaść srodkaŭ. Na zaŭtra na praŭdu možna budzie i zabycca, kali ziavicca inšy trend pad šyldaj pieramienaŭ u hramadstvie i z tymi ž koštami na raspaŭsiud ulotak, naprykład.

«NN»: Jakija vašyja ŭražańni ad pačatku pieradvybarčaj kampanii? Jak heta bačycca ź inšaj krainy?

IŠ: Ahulnyja ŭražańni ad zboru podpisaŭ — praźmiernaja demakratyčnaść pracesu ŭ paraŭnańni z papiarednimi vybarami. Miarkuju, što i ahułam kampanija zmoža hetym roźnicca ad papiarednich. Ale, niekatoryja momanty musiać zastacca niaźmiennymi — padlik hałasoŭ i pryznačeńnie łajalnych siabraŭ vybarčych kamisij. Ryzykavać uziatymi ŭ kredyt televizarami i mašynami na płošču nia pojduć.

Choć ludzi i bolš aktyŭna staviać podpisy. Prynamsi, maju takoje adčuvańnie (i dla mianie heta niečakana — vierahodna, što prajhraju butelku viski, bo spračaŭsia na niemahčymaść inicyjatyŭnaj hrupy adnaho z kandydataŭ asilić płanku ŭ sto tysiač :).

Ale nie dumaju, što nastroi ludziej buduć kanviertavacca ŭ dziejańni. Niekalki miesiacaŭ adnosna svabodnaj vybarčaj kampanii nie zmohuć dać kandydatam mahčymaść harantavać elektaratu dziejsnaha prezidenta stabilnaje zaŭtra. Heta ŭ pryncypie niemahčyma zaraz, bo čałaviek musić mieć kankretnyja dasiahnieńni ŭ vačoch ludziej i być hierojem dnia siońniašniaha, a, nie, naprykład, namieśnikam ministra ŭ 1996-m ci ctaršyniom chryścijanskaj pradprymalnickaj inicyjatyvy. Majučy apazicyjnaje rename, zadača nievykanalnaja. I, na moj pohlad, sprava nie ŭ adzinstvie apazicyi. Pierakanany, što sami kandydaty nie majuć ujaŭleńnia, što rabić u vypadku pieramohi. Mienavita na hetych sapraŭdy apraŭdanych strachach, trymajecca dziejsnaja ŭłada.

Tamu, dobra, što roznyja palityčnyja siły biaruć udzieł, bo aktyŭnaja dziejnaść, spadziajusia, daje i ŭjaŭleńni i dośvied dla budučyni. I, chaciełasia b kab nieŭzabavie pačałasia padrychtoŭka da vybaraŭ parłamienckich.

• 0
• 0
• 0
• 0
• 0
• 0