Siońnia kampanija «Pravaabaroncy za svabodnyja vybary» abnarodavała papiaredniuju spravazdaču pa vynikach nazirańnia za farmavańniem učastkovych vybarčych kamisij.
Ahulnyja vysnovy, što zrabili pravaabaroncy, nastupnyja:
Niekatoryja pazytyŭnyja navacyi, jakija źjavilisia ŭ vybarčym zakanadaŭstvie ŭ studzieni 2010 hodu, nie źmianili sutnaści pracesu farmavańnia kamisij: tatalny kantrol z boku vykankamaŭ, jakija źjaŭlajucca častkaj uładnaj «vertykali».
Z 84 084 pradstaŭnikoŭ, vyłučanych u skład 6 346 učastkovych vybarčych kamisijaŭ palityčnymi partyjami, hramadzkimi abjadnańniami, pracoŭnymi kalektyvami, tolki 1 073 vyłučalisia apazycyjnymi palityčnymi partyjami.
Vidavočna dyskryminacyjnaje staŭleńnie vykankamaŭ da pradstaŭnikoŭ ad apazycyjnych partyj: z 1073 pradstaŭnikoŭ ad hetych partyj u skład učastkovych vybarkamaŭ uvajšli tolki 183 čałavieki, abo 17,1%. U toj ža čas siaredniestatystyčnaja «prachodnaść» pradstaŭnikoŭ u skład učastkovych vybarkamaŭ skłała 84,3%; pradstaŭnikoŭ ad lajalnych uładzie partyj — 87,7%, a pradstaŭnikoŭ ad čatyroch najbujniejšych praŭradavych hramadzkich abjadnańniaŭ i adnaho praŭradavaha prafsajuzu — 93,2%.
U vyniku pradstaŭniki apazycyjnych partyj składajuć 0,25% ad ahulnaj kolkaści siabroŭ sfarmavanych učastkovych vybarčych kamisijaŭ i buduć pradstaŭlenyja mienš čym u 3% učastkovych vybarčych kamisijaŭ. Heta pazbaŭlaje ich efektyŭnaj mahčymaści ŭpłyvać na pracu kamisij i, adpaviedna, na klučavy aspekt vybaraŭ — arhanizacyju hałasavańnia i padliku hałasoŭ.
Pavodle dadzienych kampanii «Pravaabaroncy za svabodnyja vybary», padadziena 77 skarhaŭ na rašeńni vykankamaŭ ab farmavańni ŭčastkovych vybarčych kamisijaŭ.
