U Mahilovie šostyja sutki haładaje šmatdzietnaja maci

U Mahilovie šostyja sutki haładaje Natalla Škadun, šmatdzietnaja maci, doktar abłasnoj stancyi pieralivańnia kryvi, patrabujučy ad uładaŭ palepšyć jaje žyllovyja ŭmovy.

Jana paviedamiła, što z 1999 hoda staić na čarzie na žyllo jak šmatdzietnaja maci. U jaje piaciora dziaciej: starejšaj dačce 28 hadoŭ, a małodšamu synu — 10. Siamja pražyvaje ŭ trochpakajovaj kvatery ahulnaj płoščaj 63 kv. m.

Hetaj šmatdzietnaj siamji, zhodna z zakonam, patrebna žyllo ahulnaj płoščaj nie mienš jak 117 kv. m.

«Na praciahu ŭsich hetych hadoŭ uładami nie prapanoŭvalisia kankretnyja varyjanty žylla, — śćviardžaje šmatdzietnaja maci. — Ja rehularna zdavała ŭsie daviedki. Źviartałasia ŭ administracyju Leninskaha rajona Mahilova, i mnie było prapanavana budaŭnictva ŭ 2006 hodzie. U toj čas žyllom užo zabiaśpiečvalisia šmatdzietnyja siemji, jakija stajali na ŭliku ŭ 2005–2006 hadach. Ja pačała vyśviatlać, čamu takaja situacyja stała mahčymaj. Mnie napisali, što mianie nie zmahli znajści».

Pry hetym Natalla Škadun ukazvaje, što za hetyja hady jana paśpieła atrymać Orden Maci, jaje ŭvieś čas zaprašali na roznyja mierapryjemstvy, pryśviečanyja Dniu maci, było atrymana paśviedčańnie šmatdzietnaj siamji, zapoŭnieny pašpart šmatdzietnaj siamji. «Jany vydatna viedajuć, dzie ja žyvu, ale vydzielić žyllo nie ličać patrebnym, — upeŭniena žančyna. — Uładami metanakiravana pravodzicca praca, kab ja nie atrymała žyllo».

Načalnik adździeła budaŭnictva Mahiloŭskaha harvykankama Uładzimir Dudaraŭ nie zhodny z takim śćviardžeńniem i zajaviŭ BiełaPAN, što Natalli Škadun nieadnarazova prapanoŭvalisia roznyja varyjanty žylla, ad jakich jana admaŭlałasia. Tak, apošnim razam joj byli prapanavanyja dźvie kvatery — adna- i troch pakajovaja, raźmieščanyja ŭ adnym padjeździe na pieršym paviersie doma ŭ rajonie Mahiloŭskaj abłasnoj balnicy. Adnak jana admoviłasia z-za taho, što pobač znachodzicca śmiećciazbornik.

Natalla Škadun ukazvaje, što apošniaje prapanavanaje joj žyllo było vyviedziena z razradu sacyjalnaha žylla. Jaje aburaje jakaść unutranaha azdableńnia kvatery, dzie kryvyja ścieny i stol. Akramia taho, jana taksama admaŭlajecca žyć pobač z kantejnierami dla śmiećcia.

Žančyna adznačaje, što raniej joj prapanoŭvałasia žyllo ŭ niedabudavanych damach abo ŭ damach, budaŭnictva jakich zakansiervavana. Inšyja varyjanty žylla siamji Škadun nie prapanoŭvalisia.

U hutarcy z karespandentam BiełaPAN jana rastłumačyła, što adčuvaje siabie drenna, ale budzie praciahvać haładoŭku, padtrymlivajučy svajo žyćcio vadoj. Starejšaja dačka Natalli — Nadzieja — taksama praviała adnadzionnuju haładoŭku.

• 0
• 0
• 0
• 0
• 0