Ideołah Homielščyny — Niaklajevu: «Što ty ch…iu niasieš?!»

U Homieli 15 śniežnia adbylisia dźvie sustrečy vybarščykaŭ z kandydatam u prezidenty Uładzimiram Niaklajevym. U vučebna-mietadyčnym centry na mierapryjemstvie prysutničała prykładna 400 čałaviek, u DK «Fiestyvalny» — prykładna 600.

Lidar hramadzianskaj kampanii «Havary praŭdu» raskazaŭ prysutnym, čamu i ź jakoj prahramaj idzie na vybary. Havoračy pra schod na Kastryčnickaj płoščy, jon padkreśliŭ, što mierapryjemstva budzie mirnym. «My budziem damahacca daterminovych vybaraŭ, biez Łukašenki, i stvareńnia novych vybarčych kamisij», — zajaviŭ Niaklajeŭ.

«Havorać, što nas usich kormić, usim daje zarpłatu i piensii adzin čałaviek, ale heta nie tak, — skazaŭ kandydat. — Jość piensijny fond, my tudy adličvajem hrošy, ale chto viedaje, kudy jany iduć, ci bačyli vy choć raz niejkuju spravazdaču ad piensijnaha fondu? U nas siaredniaja praciahłaść žyćcia ŭ mužčyn 58 hadoŭ, značyć, nie ŭsie i da piensii dažyvajuć. A jość jašče i prezidencki fond, roŭny biudžetu krainy.

U prezidenta zapytvali: čamu ž vy hrošy hetyja ŭ biudžet nie addaście? Jon adkazaŭ: raskraduć».

Pavodle mierkavańnia Niaklajeva, hramadzianie prosta nie viedajuć, što robicca ŭ krainie, jak, chto i za jakuju sumu pryvatyzujuć pradpryjemstvy, i heta treba źmianić.

Na pytańnie z zały «Što vy nam abiacajecie?» kandydat zajaviŭ, što ŭ vypadku pieramohi na vybarach spynić «zakryvać rot chłuśnioj» i kradziež.

«Ja abiacaju, što za ŭładu trymacca nie budu, i adnaho terminu mnie dastatkova,

kab pravieści reformy i stvaryć takija ŭmovy, pry jakich Biełaruś nie vierniecca da dyktatury», — skazaŭ Niaklajeŭ.

Kamientujučy zajavy ab tym, što jon zaklikaje da niezakonnych dziejańniaŭ na Kastryčnickaj płoščy, Niaklajeŭ adznačyŭ, što heta nie jon havaryŭ pra piratechniku i vybuchovyja prystasavańni, a kiraŭnik Administracyi prezidenta. «Chaj toj, chto havaryŭ, za heta i adkazvaje», — ličyć kandydat.

Jon padkreśliŭ, što ŭkładańni ŭ dabro, spraviadlivaść i praŭdu zaŭsiody ekanamična vyhadnyja, a ekanomika i palityka — instrumienty vyrašeńnia sacyjalnych prablem.

Padčas pramovy Niaklajeva ŭ DK «Fiestyvalny» z zały razdaŭsia hučny kryk: «Što ty ch…iu niasieš?!».

Kandydat zrabiŭ zaŭvahu i zaklikaŭ da paradku.

Miascovyja apazicyjaniery apaznali taho, chto kryčaŭ. Heta byŭ načalnik hałoŭnaha ŭpraŭleńnia ideałahičnaj pracy Homielskaha abłvykankama Anatol Kaciła, pra što było zajaŭlena sa sceny. «Voś jaki ŭzrovień kultury ŭ našych ideałahičnych rabotnikaŭ», — skazaŭ Niaklajeŭ.

Na sustrečy prysutničaŭ načalnik adździeła achovy pravaparadku i prafiłaktyki Savieckaha RAUS Homiela Siarhiej Jarucič. Karespandent BiełaPAN pacikaviŭsia ŭ jaho,

čamu jon nie pryciahnuŭ da adkaznaści hramadzianina, jaki vykazvaŭsia nie litaraturna, na što Jarucič adkazaŭ, što jon tut jak hramadzianin i jon nie čuŭ, što ŭ zale łajalisia niecenzurna.

• 0
• 0
• 0
• 0
• 0
• 0
• 0
• 0