Traŭmujecca radzimka? Terminova vydalajcie!

Takija vidy złajakasnych novaŭtvareńniaŭ jak rak skury i miełanoma, mohuć raźvivacca nie tolki ź pihmientnych nievusaŭ (radzimak), ale i na «hołym " miescy. Tamu kali na skury źjaviłasia jazvačka, ci ŭščylnieńnie, ci miesca, jakoje łuščycca, i hetaja prablema nie źnikaje na praciahu dvuch-troch tydniaŭ, a taksama kali nievus źmianiŭsia, skažam, u pamiery ci kolery, treba nieadkładna pakazacca ankołahu.

Dla prafiłaktyki raku skury i miełanomy chirurh-ankołah adździaleńnia rekanstruktyŭna-adnaŭlenčaj chirurhii RNPC ankałohii i miedycynskaj radyjałohii imia M. M. Alaksandrava, kandydat miedycynskich navuk Hienadź RYMDZIONAK rekamienduje mieć na ŭvazie: čym bolš pihmientnych nievusaŭ i čym bolšych jany pamieraŭ, tym vyšej ryzyka zachvareć na rak skury ci miełanomu. Adnak tut važny i taki momant, jak traŭmatyzacyja: nievusy nielha ni nacirać adzieńniem, ni pačesvać. Kali ž ubierahčy radzimku ad traŭmy nie ŭdałosia, treba vydalić jaje paśla kansultacyi ŭ ankołaha. Naohuł vydaleńnie nievusaŭ, źmieščanych u traŭmaniebiaśpiečnych miescach, ličycca prafiłaktykaj raku i miełanomy.

Pavodle słoŭ zahadčyka adździeła rekanstruktyŭna-adnaŭlenčaj chirurhii Respublikanskaha navukova-praktyčnaha centra ankałohii i miedycynskaj radyjałohii imia M. M. Alaksandrava, kandydata miedycynskich navuk Alaksandra ŽUKAŬCA, jak praviła, rak skury sustrakajecca na šostym-siomym dziasiatku žyćcia, a pałova vypadkaŭ miełanomy prypadaje na ŭzrost da piacidziesiaci hadoŭ. Miełanoma ličycca taksama najbolš častym złajakasnym utvareńniem u žančyn maładoha ŭzrostu.

Pakolki nasielnictva ŭ našaj krainie, z adnaho boku, maje pieravažna 1 i 2 hrupy fotatypaŭ skury, a z druhoha — absalutnaja bolšaść suajčyńnikaŭ majuć pihmientnyja nievusy, naściarožanaść u dačynieńni da skury, svabodnaj ad ankapatałohii, pavinna być va ŭsich. Zachvaralnaść na rak skury i miełanomu raście nie tolki ŭ Aŭstralii, ale i ŭ šerahu inšych krain śvietu, u tym liku ŭ Biełarusi. Pryčym za apošnija dziesiać hadoŭ u nas nazirajecca faktyčna padvajeńnie kolkaści vypadkaŭ raku skury. Adnak kali ŭ raźvitych krainach padobnyja prablemy vyjaŭlajucca hałoŭnym čynam na 1 stadyi, to ŭ nas davoli časta sustrakajucca zapuščanyja formy. Rańni rak, pavodle ajčynnych padychodaŭ, — heta puchlina dyjamietram da 2 sm, a rańniaja miełanoma maje taŭščyniu da 2 mm.

Adnym z važniejšych faktaraŭ raźvićcia ankałohii skury źjaŭlajecca intensiŭnaje ultrafijaletavaje apramieńvańnie. Asabliva niebiaśpiečnyja soniečnyja apioki. Pakolki absalutnaja zabarona znachodžańnia na adkrytym soncy — miera zusim nie efiektyŭnaja, značyć, pavinny być choć niejkija abmiežavańni. Toje ž datyčycca i salaryjaŭ, pakolki dla skury nie maje značeńnia — naturalnaje apramieńvańnie abo štučnaje. Ankołahi adnosiać salaryi da kancerahiennych faktaraŭ.

• 0
• 0
• 0
• 0
• 0
• 0
• 0
• 0