U Bresckim dziaržaŭnym techničnym univiersitecie skasavali rašeńnie pra admienu zaniatkaŭ u čaćvier i piatnicu.
U Bresckim dziaržaŭnym techničnym univiersitecie skasavali rašeńnie pra admienu zaniatkaŭ u čaćvier i piatnicu. Jak nam paviedamili studenty, pieramienu patłumačyli tym, što “da prarektara pryjšli naziralniki na vybarach i stali pahražać mižnarodnym skandałam”.
Admienu raniejšaha rašeńnia možna vytłumačyć krytykaj «pierahibaŭ na miescach» Alaksandram Łukašenkam. U sieradu jon zajaviŭ na naradzie sa svaim štabam i siłavikami: «Niama nijakaj nieabchodnaści siońnia padšturchoŭvać ludziej da daterminovaha hałasavańnia».
Źviartajučysia da kiraŭnika svajho vybarčaha štaba Alaksandra Radźkova i člena štaba Viktara Šejmana, Łukašenka skazaŭ: «Raźbiaryciesia, kali łaska, u štabie. Źviažyciesia z Administracyjaj prezidenta i ŭdakładnicie jašče raz, nakolki adpaviadajuć sapraŭdnaści tyja zajavy (tam niama faktaŭ) hetak zvanych apazicyjanieraŭ ab tym, što ŭłady honiać ludziej tabunom na daterminovaje hałasavańnie».
Jak paviedamlali «Našaj Nivie» studenty Bresckaha dziaržaŭnaha politechničnaha ŭniviersiteta, u ich byli admienienyja zaniatki ŭ čaćvier i piatnicu. Dekany zahadali studentam daterminova prahałasavać, a paśla hetaha — jechać damoŭ.
Supracoŭniki ŭniviersiteta paćvierdzili nam hetuju infarmacyju, ale paviedamili buduć vychodzić na pracu, jak i ŭ zvyčajnyja dni.
Zvanok ad imia studenta ŭ dekanat budaŭničaha fakulteta paćvierdziŭ: zaniatkaŭ nasamreč nie budzie. Ab pryčynach nie paviedamili ničoha. «Nie budzie, i ŭsio». U toj ža čas na ekanamičnym fakultecie na pytańnie adkazvać nie stali, tolki imknulisia vyśvietlić asobu surazmoŭcy. A na architekturnym roblena aburalisia: «Chto vam skazaŭ?».
Rektar BDPU Piatro Pojta jość davieranaj asobaj Alaksandra Łukašenki. Jon ža ŭznačalvaje abłasnuju arhanizacyju «Biełaj Rusi».
Na papiarednich vybarach u Biełarusi daterminova hałasavaŭ 31% vybarcaŭ. Dla paraŭnańnia: va Ukrainie i Rasii hetaja ličba nikoli nie pieravyšała 1–2%. Jak stała viadoma sa śviedčańniaŭ padpałkoŭnika milicyi Mikałaja Kazłova, daterminovaje hałasavańnie vykarystoŭvajecca dla falsifikacyi vynikaŭ narodnaha vyjaŭleńnia voli. Kazłova zvolnili paśla taho, jak jon sprabavaŭ pieraškodzić ukidu biuleteniaŭ u skrynku ŭ časie daterminovaha hałasavańnia.
Ciapier čytajuć
Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie8
Kamientary