Hiermanija: Praces zbližeńnia Biełarusi i ES «mocna paciarpieŭ»

Hiermanija zaniepakojenaja parušeńniami padčas vybarčaha pracesu i razhonam demanstracyi apazicyi ŭ Biełarusi. Kiraŭnik MZS Hiermanii Hida Viestervele nazvaŭ nieprymalnym źbićcio i aryšty apazicyjanieraŭ, jakija chacieli skarystacca pravam svabodnaha volevyjaŭleńnia.

Pradstaŭnik urada Hiermanii Štefen Zajnbiert zajaviŭ, u svaju čarhu, što kraina vielmi zaniepakojenaja padziejami ŭ Biełarusi. «Šmat što pakazvaje na toje, što nie byli vykananyja mižnarodnyja standarty, jakija datyčać praviadzieńnia svabodnych i spraviadlivych vybaraŭ. Asablivuju tryvohu vyklikaje toje, što bolšaść apazicyjnych kandydataŭ znachodziacca pad aryštam, a niekatoryja byli paranienyja padčas aryštu», — zajaviŭ jon. Zajnbiert padkreśliŭ, što fiederalny ŭrad zaklikaje nieadkładna vyzvalić apazicyjnych palitykaŭ i žurnalistaŭ. Pavodle jaho słovaŭ, prezidenckija vybary 19 śniežnia byli «testam dla dalejšych adnosin pamiž ES i Biełaruśsiu, tamu praces uzajemnaha zbližeńnia «mocna paciarpieŭ».

Upaŭnavažany pa pravach čałavieka i humanitarnaj dapamozie Markus Loninh vykazaŭ abureńnie dziejańniami biełaruskaj milicyi suprać demanstrantaŭ, jakija zmahajucca za svabodnyja i spraviadlivyja vybary.

«Toje, što Alaksandr Łukašenka dazvalaje bić svaich hramadzian i kandydataŭ ad apazicyi, a milicyja svaimi dziejańniami pieraškadžaje žurnalistam raskazvać pra hetyja padziei, demanstruje aŭtarytarnaje myśleńnie režymu ŭ Minsku»,

Niezadavolenaść padziejami ŭ Minsku vykazali i deputaty Bundestahu i niamieckija ekśpierty. Na dumku ekśpierta Niamieckaj asacyjacyi zamiežnaj palityki Mary-Leni Maj, razhon demanstracyi ŭ Minsku śviedčyć pra toje, što dla Łukašenki zbližeńnie ź ES nie źjaŭlajecca pryjarytetam. «Zamiest hetaha jon skancentrujecca na partniorstvie z Rasijaj», — zajaviła jana ŭ intervju RAR.

Padziei ŭ Minsku asudzili vysokapastaŭlenyja asoby Polščy, Francyi, Jeŭraparłamienta. Nahadajem, što pavodle dadzienych biełaruskaha CVK, Alaksandr Łukašenka atrymaŭ kala 80% hałasoŭ vybarščykaŭ pry jaŭcy bolš čym u 90%. Misija ABSIE nazvała padlik hałasoŭ nie adpaviednym demakratyčnym standartam. Prychilniki apazicyi, pratestujučy suprać falsifikacyi vynikaŭ vybaraŭ, 19 śniežnia vyjšli na akcyju pratestu, jakaja była razahnanaja AMAPam. Lik zatrymanych idzie na sotni, mnohija źbityja. U pryvatnaści, kandydat u prezidenty Uładzimir Niaklajeŭ byŭ špitalizavany, pryčym paśla jaho vykrali ź lakarni nieviadomyja ŭ cyvilnym. Niekalki kandydataŭ ad apazicyi byli aryštavanyja, ich miescaznachodžańnie nieviadomaje.

• 0
• 0
• 0
• 0
• 0
• 0
• 0
• 0