Pradstaŭniki demsił patrabujuć pakarać tych, chto ŭžyŭ represii

Pradstaŭniki demakratyčnych sił Biełarusi zajaŭlajuć ab salidarnaści z aryštavanymi ŭdzielnikami akcyi 19 śniežnia i patrabujuć pryciahnuć da adkaznaści asob, jakija dapuścili represii.

Pra heta havorycca ŭ sumiesnaj zajavie lidaraŭ palityčnych partyj i hramadskich abjadnańniaŭ.

Zajava padpisana 21 śniežnia ŭ Minsku paśla sumiesnaj pres-kanfierencyi pradstaŭnikoŭ apazicyi. Podpisy pad dakumientam pastavili eks-kandydat u prezidenty ad Partyi BNF Ryhor Kastusioŭ, lidar ruchu «Za Svabodu» Alaksandr Milinkievič, staršynia minskaj arhanizacyi Partyi BNF Viktar Ivaškievič, namieśnik staršyni Ab`iadnanaj hramadzianskaj partyi Leŭ Marholin, lidar arhkamiteta pa stvareńni ruchu salidarnaści «Razam!» Viačasłaŭ Siŭčyk i lidar Partyi BNF Alaksiej Janukievič.

Zajavu taksama maje namier padpisać lidar Biełaruskaj partyi levych «Spraviadlivy śviet» Siarhiej Kalakin, jaki nie zmoh prysutničać pa stanie zdaroŭja, paviedamiŭ žurnalistam Viktar Ivaškievič.

U zajavie padkreślivajecca: mirny pratest hramadzian suprać «hrubych falsifikacyj vynikaŭ vybaraŭ prezidenta» ź`iaŭlajecca ich niead`iemnym pravam, a «nieadekvatnaje vykarystańnie ŭładami hrubaj siły suprać mirnych demanstrantaŭ — złačynstvam».

«Nijakija pravakacyi ŭ vyhladzie raźbitych dźviarej nie mohuć apraŭdać žorstkaje źbivańnie i aryšty tysiač ludziej», — upeŭnieny padpisanty.

Jany vykazvajuć salidarnaść z aryštavanymi kandydatami ŭ prezidenty Alesiem Michalevičam, Uładzimiram Niaklajevym, Vitalem Rymašeŭskim, Andrejem Sańnikavym, Mikałajem Statkievičam i patrabujuć ich nieadkładnaha vyzvaleńnia, a taksama vyzvaleńnia ŭsich udzielnikaŭ mirnaj akcyi.

«My nastojvajem na spraviadlivym i ab`iektyŭnym rasśledavańni ŭsich akaličnaściaŭ, ustanaŭleńni i pryciahnieńni da adkaznaści asob, jakija spłanavali i ažyćciavili šyrokamaštabnyja represii 19 śniežnia, i patrabujem pakarańnia słužbovych asob, jakija dapuścili niesuvymiernaje prymianieńnie siły ŭ dačynieńni da hramadzian Respubliki Biełaruś», — padkreślivajuć pradstaŭniki demakratyčnych sił.

U hety čas eks-kandydaty ŭ prezidenty Uładzimir Niaklajeŭ, Andrej Sańnikaŭ, Vital Rymašeŭski, Mikałaj Statkievič i Aleś Michalevič znachodziacca ŭ śledčym izalatary KDB.

U dačynieńni da arhanizataraŭ niesankcyjanavanaj akcyi raspačata sprava na padstavie artykuła 293 Kryminalnaha kodeksa (masavyja biesparadki). Palitykam pahražaje da 15 hadoŭ pazbaŭleńnia voli.

• 0
• 0
• 0
• 0
• 0
• 0
• 0
• 0