Što ciapier pavinna rabić apazicyja? Adkazvaje ekśpiert Centra ŭschodnich daśledavańniaŭ, polski analityk Rafał Sadoŭski.
— Stan apazicyi vielmi ciažki, a ŭ vyniku dziaržaŭnych represij jaje dziejańni byli całkam paralizavanyja. U hetym kantekście ja chacieŭ by źviarnuć uvahu na dźvie prablemy, jakija, dumaju, u ciapierašniaj situacyi vielmi važnyja. Mnie zdajecca, što pierš za ŭsio važna zachavać i padkreślić salidarnaść usich demakratyčnych sił, niahledziačy na isnujučyja adroźnieńni pamiž ich palitykaj i prahramami. Usie kanflikty i sprečki ŭ apazicyi buduć usio bolš padryvać jaje palityčnyja pazicyi ŭnutry krainy i ŭ mižnarodnych adnosinach. Heta taksama hulaje na ruku kirujučaj hrupoŭcy, vykarystoŭvajecca suprać apazicyi. I ŭ hety momant važna padtrymać adzinstva i akazać uzajemnuju padtrymku ŭ baraćbie suprać aŭtarytaryzmu i imknieńniach da demakratyi.
Druhaja važnaja reč — aktyŭna pracavać razam, kab abaranić represavanych i dać im usiu nieabchodnuju dapamohu i padtrymku. Najpierš pravavuju dapamohu, kab vyciahnuć ludziej z turmy, ale i materyjalnuju. Ludzi, jakija pieražyli represii, pavinny viedać, što jany nie zastalisia adny i mohuć raźličvać na inšych. Niahledziačy na ŭsie ciažkaści, apazicyjnyja siły pavinny raspačać sumiesnyja dziejańni ŭ hetym napramku. Akramia taho, takoje supracoŭnictva stanie prajavaj adzinstva demakratyčnych sił, biez čaho im ciažka budavać svaje pazicyi i aŭtarytet u vačach hramadstva.
Kamientary