Represii vyklikali chvalu emihracyi ź Biełarusi

Krainu pakinuli mnohija viadomyja asoby.

Padziei 19 śniežnia i asabliva paślavybarčyja represii vyklikali čarhovuju chvalu emihracyi. Aktyvisty štaboŭ kandydataŭ, a taksama viadomyja ludzi vymušanyja byli pakinuć miežy Biełarusi. Pakul niajasna, ci heta časovaja źjava, ci na bolš praciahły termin.

Pakinuli miežy krainy adrazu niekalki aktyvistaŭ «Havary praŭdu». Nie pieršaha źviana, ale prybližanych da kiraŭnictva. Pa našaj infarmacyi, u Bruseli znachodziacca pradprymalnicki lidar Viktar Harbačoŭ z Barysava i Aleh Miacielica ź Białynič. Jany byli davieranymi asobami kandydata ŭ prezidenty Uładzimira Niaklajeva. U brata Aleha Mikałaja Miacielicy ŭ Białyničach prajšoŭ pieratrus.

Niejki čas u bielhijskaj stalicy znachodziŭsia i kiraŭnik štaba «Havary praŭdu» pa Minsku Juryj Alejnik, adzin z ruchavikoŭ kampanii Niaklajeva. Ale ciapier chłopiec — u Vilni.

Tamsama apynulisia lidar ruchu «Volnaja moładź» Mikita Krasnoŭ i kiraŭnik «Ruchu budučyni» Viačasłaŭ Dzijanaŭ. Jany supracoŭničali z kandydatami Michalevičam i Ramančukom.

Krasnoŭ razam ź siabrami dabiraŭsia ŭ Vilniu praz Maskvu, Pieciarburh, Estoniju. «Usiudy nas sustrakali dobryja ludzi, jakija nam dapamahali: heta i moładzievyja arhanizacyi ŭ Rasii i Estonii, a taksama pravaabaroncy. Ciapier my adčuvajem sapraŭdnuju salidarnaść ludziej z represavanymi biełarusami», — kaža Mikita Krasnoŭ.

Chłopiec navučajecca ŭ EHU. Krasnoŭ i Dzijanaŭ pierad vybarami zasnavali inicyjatyvu «Hramadzianin»

Darečy, u Rasiju jany źjazdžali razam z kaardynatarami štaba Uładzimira Niaklajeva Uładzimiram Kumcom i Paŭłam Markaŭcovym.

Były palitviazień i lidar moładzi Andrej Kim taksama vymušany na niejki čas «zalehčy» ŭ Rasii. Kim adbyŭ 10-sutkavaje pakarańnie za ŭdzieł u Płoščy. Adnak paśla vyzvaleńnia jon nie pajšoŭ dadomu. Zrabiŭ abačliva, bo tam jaho ŭžo čakali ź pieratrusam.

Kim adklučyŭ mabilny telefon i pacichu źjechaŭ u Rasiju. U intervju dla «Hrani-TV» jon zajaviŭ: «Ja, naturalna, viarnusia ŭ Biełaruś. Ale ciapier treba ahledziecca».

U Kijeŭ vyjechaŭ lidar «Pravaha aljansu» Juryj Karetnikaŭ. Mienavita chłopcy z hetaj arhanizacyi byli ŭ achovie Uładzimira Niaklajeva.

U nadrukavanym u «SB» «kampramacie» na apazicyju siarod inšaha zhadvajecca i Karetnikaŭ. Najpierš, što jon ździajśniaŭ pajezdki ŭ rehijony z metaj pryciahnieńnia ludziej na Płošču. A potym pisałasia, što Karetnikaŭ arhanizoŭvaŭ «bajavyja atrady».

U Varšavu pryjechali davieranyja asoby Andreja Sańnikava — Źmicier Barodka i Andrej Babicki. Jany vyjechali adrazu paśla padziej na Płoščy. U chacie ŭ Barodki i jahonaj cieščy praviali pieratrusy.

Meryja Varšavy, tym časam, vydzieliła dla pracy sajta «Chartyja-97» siadzibu. Nie vyklučana, što mienavita Barodka i Babicki buduć tam pracavać.

Były achoŭnik Andreja Sańnikava Leanid Navicki taksama za miažoj. Chłopiec siadzieŭ na Akreścina, a pa vychadzie chucieńka sabraŭ manatki i źjechaŭ ź Biełarusi. Pieršy čas Navicki byŭ taksama ŭ Varšavie.

Adnak na fotkach z apošniaha dnia salidarnaści 16 studzienia jon trymaŭ płakat «Viarnicie baćkoŭ dzieciam» padčas pikietavańnia ŭ hałandskaj Haazie.

Adciahvajuć svajo viartańnie na radzimu i kiraŭniki «Svabodnaha teatra» Mikałaj Chalezin i Natalla Kalada. U ich zapłanavanyja praciahłyja hastroli ŭ ZŠA, Azii i praca ŭ Brytanii.

U Biełarusi ž tym časam na Navickaha była zaviedzienaja kryminalnaja sprava za ŭdzieł u «masavych biesparadkach».

Palityčnaha prytułku va Ukrainie paprasiŭ davieranaja asoba Mikoły Statkieviča Viktar Kancavienka. Bližejšymi dniami stanie jasna, ci zadavolać jahonaje prašeńnie. Ciapier Kancavienka trymaje haładoŭku ŭ znak salidarnaści z aryštavanym Statkievičam.

Pavodle infarmacyi «Našaj Nivy», zastajecca za miežami Biełarusi i šerah viadomych žurnalistaŭ i sacyjołahaŭ. U pryvatnaści, nie viartaŭsia ŭ Biełaruś paśla vybaraŭ prafiesar Andrej Vardamacki, kiraŭnik łabaratoryi «Novak».

Takim čynam, bačna, što apazicyi naniesieny ŭdar nie tolki praz aryštavanych, ale i praz tych, chto pakinuŭ krainu. Adnym sapraŭdy pahražała kryminalnaja sprava, inšyja pierastrachavalisia.

Za hetym pieralikam imionaŭ chavajucca čałaviečyja trahiedyi. Źjechać u čužuju krainu ad svajakoŭ i rodnych — heta nialohkaje rašeńnie. Ale jany paličyli, što tak budzie lepš. Zrešty, chutčej za ŭsio, što častka z hetych ludziej usio adno vierniecca nazad u Biełaruś.

• 0
• 0
• 0
• 0
• 0
• 0
• 0
• 0