Ukraina moža ŭdaryć Biełaruś pa samym balučym

Ministerstva enierhietyki Ukrainy vystupaje za ŭviadzieńnie mytaŭ na impartavanyja ŭ krainu naftapradukty. Bolš za inšych moža paciarpieć Biełaruś, jakaja źjaŭlajecca najbujniejšym zamiežnym pastaŭščykom naftapraduktaŭ na ŭkrainski rynak.

Naftapradukty, jak ni pahladzi, źjaŭlajucca hałoŭnym ekspartnym tavaram Biełarusi. U ahulnym abjomie biełaruskaha ekspartu dola naftapraduktaŭ składaje kala 23%. Biełaruski ekspart va Ukrainu bolš čym napałovu składajecca z naftapraduktaŭ.

U vypadku, kali Kijeŭ prymie rašeńnie ab uviadzieńni mytaŭ na zamiežnaje paliva, heta moža vielmi niehatyŭna adbicca na stanoviščy biełaruskaj pradukcyi va Ukrainie.

Ministerstva enierhietyki Ukrainy na minułym tydni zajaviła ab tym, što myty na impartavanaje ŭ krainu paliva mohuć być uviedzienyja ŭ najbližejšyja paŭtara miesiaca. Dyrektar departamienta naftavaj, hazavaj i naftapierapracoŭčaj pramysłovaści ŭkrainskaha Minenierha Kanstancin Baradzin navat dadaŭ, što myty mohuć być uviedzienyja i raniej.

Uviadzieńnie mytaŭ ukrainski čynoŭnik arhumientavaŭ tym, što nieabchodna abaranić intaresy ŭkrainskich vytvorcaŭ naftapraduktaŭ ad kankurencyi zvonku.

Pazityŭ dla biełaruskich vytvorcaŭ zaklučajecca ŭ tym, što nie ŭsie va ŭkrainskim ŭradzie padzialajuć prapanovu Minenierha. Suprać uviadzieńnia mytaŭ vystupaje Ministerstva finansaŭ, jakoj ličyć, što abmiežavalnyja miery pryviaduć da źnižeńnia pastupleńniaŭ u biudžet.

Pierśpiektyvy pastavak pradukcyi biełaruskich NPZ va Ukrainu zastajucca nieakreślenymi. Pradstaŭnik biełaruskaha trejdara, jaki zajmajecca realizacyjaj naftapraduktaŭ na ŭkrainskim rynku, vykazaŭ surjoznuju zaniepakojenaść situacyjaj, jakaja skłałasia.

«U vypadku kali jany svaju prapanovu prasunuć, budzie ciažka Biełarusi, i kankretna — Mazyrskamu NPZ», — padkreśliŭ surazmoŭca Naviny.by. Jon adznačyŭ, što ŭviadzieńnie mytaŭ łabirujuć ukrainskija pastaŭščyki paliva — hrupa «Pryvat» i TNK-BP.

«Jany chočuć prybrać z ukrainskaha rynku Mazyrski NPZ»,

Ekśpierty ŭkrainskaha naftavaha rynku taksama adznačajuć, što ŭviadzieńnie mytaŭ abciažaryć dostup na ŭnutrany rynak Ukrainy pradukcyi mazyrskaha pradpryjemstva.

«Ja razmaŭlaŭ minułaj vosieńniu z hiendyrektaram Mazyrskaha NPZ, i jon padkreślivaŭ, što ŭkrainski napramak dla pradpryjemstva — adzin z samych pryjarytetnych», — uzhadvaje dyrektar kansałtynhavaj kampanii «A-95» Siarhiej Kujun.

Pavodle jaho słovaŭ, pastaŭki pradukcyi va Ukrainu dla biełaruskaha zavoda siońnia źjaŭlajucca «samymi cikavymi». «Tamu, kali myty na paliva va Ukrainie buduć uviedzienyja, intaresy mazyrskaha pradpryjemstva, viadoma, pacierpiać», — kaža Siarhiej Kujun.

U toj ža čas jon adznačyŭ, što pradukcyja mazyrskaha pradpryjemstva pieraŭzychodzić pa jakaści tyja naftapradukty, jakija vypuskajuć siońnia ŭkrainskija NPZ.

Darečy, u kancernie «Biełnaftachim» BiełaPAN paviedamili, što dyzielnaje paliva, jakoje vypuskajuć biełaruskija NPZ, adnosicca siońnia da standartaŭ Jeŭra-4 i Jeŭra-5. Bienzin, jaki vypuskajecca Mazyrskim NPZ, adnosicca taksama da standartu Jeŭra-5.

Na dumku S. Kujuna, uviadzieńnie mytaŭ moža pryvieści da taho, što ŭkrainski rynak zastaniecca bieź jakasnaj pradukcyi. «Padziei mohuć pajści pa niepažadanym scenary, kali my budziem mieć darahoje paliva nizkaj jakaści», — prahnazuje Siarhiej Kujun.

Varta adznačyć, što Ukraina źjaŭlajecca adnym z asnoŭnych spažyŭcoŭ biełaruskich naftapraduktaŭ na zamiežnym rynku. Abjom vytvorčaści biełaruskich naftapraduktaŭ u 2010 hodzie skłaŭ 14,2 młn ton. Na ekspart było pastaŭlena kala 10 młn ton naftapraduktaŭ, u tym liku va Ukrainu — amal 2 młn. ton.

Najbolšy abjom biełaruskich naftapraduktaŭ, spažytych Ukrainaj, prypaŭ na dyzielnaje paliva. Paŭdniovaj susiedcy Biełaruś pradała ŭ 2010 hodzie 1 młn 75 tys. ton dyzpaliva. Akramia hetaha, va Ukrainu ŭ minułym hodzie było pastaŭlena bolš za 200 tys. ton biełaruskaha bienzinu A-95, a taksama 644,5 tys. ton bienzinu A-92. Jašče kala 76 tys. ton biełaruskaha paliva, pastaŭlenaha ŭ Ukrainu, prypała na bienzin A-80.

Pa vynikach 2010 hoda dola biełaruskich naftapraduktaŭ na ŭkrainskim rynku atrymałasia dosyć važkaj. Z ulikam taho, što na ŭnutrany rynak Ukrainy ŭ minułym hodzie było pastaŭlena 9,63 młn ton naftapraduktaŭ, dola Biełarusi skłała 20,7%.

De-fakta Biełaruś źjaŭlajecca najbujniejšym zamiežnym pastaŭščykom naftapraduktaŭ va Ukrainu, i stračvać takija vysokija pazicyi biełaruskamu ŭradu nie chaciełasia b.

• 0
• 0
• 0
• 0
• 0
• 0
• 0
• 0