ANT: «My b daŭno na roŭnych kantaktavali ź Jeŭropaj, kab nie vapiaščyja rožy»

Viečaram u paniadziełak na telekanale ANT u efir źjaviŭsia prapahandyscki film «Jak jość: Technałohija pieravarotaŭ». Jaje aŭtar — žurnalist telekanała Alaksiej Michalčanka.

U pieradačy najpierš havorycca, što z Zachadu nam idzie nianaviść da ŭsich i da ŭsiaho. I raspaŭsiudžvać hetuju nianaviść u krainie ŭzialisia miascovyja apazicyjaniery. A chto ich padtrymlivaje? «Zboryšča biežancaŭ, jak ZŠA».

Film azdobleny vialikaj kolkaściu kadraŭ ź niezaležnych ŚMI, jak Biełsat, NN, Jeŭraradyjo.

Šmat uvahi addajecca Alaksandru Fiadutu, jak čałavieku, jaki vybivaŭ hrošy pad Niaklajeva. «Moj dziadzia samych česnych pravił — heta jaŭna nie pra Fiadutu», — kazaŭ žurnalist.

Znoŭ zaviedzienaja staraja katrynka, što za vyłučeńniem Sańnikava stajała jahonaja žonka Iryna Chalip. Taksama było vyłučana dva «zic-staršyni»: Vital Rymašeŭski i Jarasłaŭ Ramančuk, za jakimi stajali «nacyjanał-idealist» Pavieł Sieviaryniec i «vieteran apazicyi» Alaksandr (tak u filmie) Labiedźka.

Filmy na telekanale NTV «Chrosny baćka» byli nazvanyja psichałahičnaj atakaj na biełarusaŭ, ź vialikaj kolkaściu śpiekulacyj. Jak prykład, ANT pryviało spravu byłoha śpiecnazaŭca Dźmitryja Novička. Telekanał paćvierdziŭ, što taki čałaviek sapraŭdy słužyŭ u vajskovaj častcy 32-14, a potym u turmie sustrakaŭsia z aficeram Vasiljevym.

Praŭda, Vasiljeŭ zusim nie major, a lejtenant, i nie z SOBRa, i nijakaha dačynieńnia da «eskadronaŭ śmierci» nie maje.

Abvinavačańnie ŭ finansavańni apazicyi znoŭ sypiecca na Polšču i Niamieččynu, jakija nibyta dla hetaha stvarali šmatlikija humanitarnyja fondy.

Demanstrujucca kadry ź vizitu Viesterviele i Sikorskaha. Vyryvajecca z kantekstu šmat zajavaŭ palitykaŭ, jak Milinkievič. Jak dokaz pieramohi Łukašenki, pryvodziacca słovy sacyjołaha Aleha Manajeŭ u efiry «Biełsata» ŭ viečar vybaraŭ.

Adnym z hierojaŭ filmu staŭ pretendent u prezidenctva Piatro Barysaŭ, jakomu nie zapłaciŭ hrošy za zbor podpisaŭ Uładzimir Niaklajeŭ. Barysaŭ ciapier źbirajecca šukać praŭdy ŭ sudzie.

«My b daŭno na roŭnych kantaktavali ź Jeŭropaj, kab nie vapiaščyja rožy», — robić vysnovu Michalčanka, u kadry ŭ hety čas tvar Mikoły Statkieviča.

Aŭtar filmu prychodzić da vysnovy, što scenar z patrabavańniem novych vybaraŭ daŭno byŭ raspracavany apazicyjaj i jeŭrapiejskimi čynoŭnikami. U pryvatnaści, Ježy Buzkam, jakomu zvykła z časoŭ «Salidarnaści» zmahacca za hrošy CRU.

Jak prykład niesumlennaści Buzka, pryvodzicca fakt, što jon stajaŭ za aryštam adyjoznaha polskaha palityka Andžeja Lepiera, jakoha časam nazyvajuć polskim Žyrynoŭskim.

Tym nie mienš, «biełakačannyja i bruselskija revalucyi» ŭ nas nie projduć, bo my nie niejki «bananavy Ekvador» robić vysnovu aŭtar.

Uvohule, padałosia, što ŭ pieradačy namiašana ŭsiaho z roznych kučaŭ, bob z harocham.

• 0
• 0
• 0
• 0
• 0
• 0
• 0
• 0