Jehipiet: demanstracyi praciahvajucca, lik achviaraŭ raście

Narodnaje paŭstańnie, Mubarak admaŭlajecca syści.

Najśviažejšyja karotkija paviedamleńni ź Jehipta ad reparcioraŭ telekanała «Al-Džazira», anhlijskaja viersija.

Anłajn-repartaž«Al-Džaziry».

Intervju z papularnym jehipieckim błohieram Hasamam al-Hamałaŭi.

16.00

Dziasiatki tysiač čałaviek manifiestavali ŭ centry Kaira pierad budynkam telebačańnia. Armija nie ŭmiešvałasia ŭ padziei. Demanstranty patrabujuć adstaŭki Mubaraka.

Horšyja viestki pra kolkaść achviaraŭ piatnicy. Ich lik pieravysiŭ 100 čałaviek, ź ich bolš za 30 čałaviek u Kairy, 36 -- u Aleksandryi.

Ułady abvieścili, što kamiendanckaja hadzina budzie raspačynacca ad 16-j.

11.30

Kolkaść achviar piatničnych sutyčak pieravysiła 50 čałaviek. Najbolš ludziej zahinuła ŭ Aleksandryi i Suecy.

U centry Kaira znoŭ hurtujucca manifiestanty.

9.30

Kair zastajecca pad achovaj vajskoŭcaŭ. Kamiendanckaja hadzina parušałasia da samaha apošniaha momantu.

Nadychodziać źviestki pra achviary piatničnych sutyčak. Pa ŭdakładnienych źviestkach, ludzi zahinuli nie tolki ŭ Suecy, ale i ŭ Aleksandryi.

Internet u Jehipcie zastajecca adklučany.

Kitaj zabłakavaŭ unutry krainy dostup da ŭsich internet-sajtaŭ, jakija apisvajuć padziei ŭ Jehipcie.

3.30

Abama mieŭ paŭhadzinnuju razmovu z Mubarakam. Paśla hetaha zrabiŭ karotkuju televizijnuju razmovu. «Spravy Mubaraka pavinny supadać sa słovami. Ja jasna zaklikaju ŭłady Jehipta admovicca ad nasilla suprać mirnych demanstrantaŭ. Ludzi majuć prava na svabodu schodaŭ. Ludzi majuć prava na svabodu słova. Pravy čałavieka ŭniviersalnyja. Hałoŭnaje ŭ Jehipcie — paźbiehnuć nasilla». Abama zaklikaŭ abodva baki da strymanaści.

0.30

Praz paru chvilinaŭ cišy na vulicach horada znoŭ vybuchnuli skandavańni: «Dałoŭ! Dałoŭ!»

0.20

Užyvuju na TV vystupiŭ prezident Chośni Mubarak. Jon vykazaŭ škadavańnie pra achviary za abodvuch bakoŭ — i z boku palicyi, i z boku hramadstva. Jon kaža: tonkaja linija adździalaje svabodu ad chaosu. Kaža, što jon razumieje stupień pakutaŭ naroda, razumieje hłybiniu prablem ź biespracoŭjem i karupcyjaj. Pieramienaŭ niemahčyma dasiahnuć šlacham chaosu, ich možna dasiahnuć tolki šlacham dyjałohu. Jon kaža: ja zaŭždy byŭ i budu na baku prostych ludziej. My nie źvierniem z darohi reformaŭ, kaža jon. Jon abiacaje znajści vyrašeńnie prablemie biespracoŭja i palepšyć situacyju z achovaj zdaroŭja i adukacyjaj. My adolejem ciapierašniuju situacyju, usie hetyja padpały, maradziorstva, kaža jon. Jon zaklikaŭ kožnaha mužčynu, kožnuju žančynu pracavać na ahulnaje dabro krainy, a nie padpalvać uradavyja budynki, skazaŭ Mubarak. «Heta zmova suprać Jehipta», — skazaŭ jon. Naprykancy vystupu jon abvieściŭ pra adstaŭku ŭrada i paabiacaŭ pryznačyć novy ŭrad zaŭtra. Ja nikudy nie sychodžu, zajaviŭ jon, i budu abaraniać paradak.

0.15

Tysiačy demanstrantaŭ hrupujucca vakoł budynka telebačańnia. Manifiestantam nie ŭdałosia zachapić budynki telebačańnia, parłamienta, śpiecnaz i adździeły Słužby achovy prezidenta adbili ataki. U toj ža čas u vialikaj častcy horada panuje chaos. Demanstranty bjucca abo bratajucca ź siłavikami. Maradziory rabujuć uradavyja budynki, harać pastarunki palicyi.

0.05

Situacyja zastajecca niapeŭnaj. Adnak dziaržaŭnaje TV pakazvaje karcinku vulic, jakaja demanstruje, što narod nie vykonvaje zahadu pra kamiendanckuju hadzinu. Pradstaŭniki ŭładaŭ źnikli z ekranaŭ, źnikli z horada. TV abvieściła, što čakajecca vystup kiraŭnika nižniaj pałaty kišennaha parłamienta krainy. Telebačańnie abvieściła taksama, što pažary padstupili ŭščylnuju da ŭnikalnaha Nacyjanalnaha muzieja krainy, u jakim zachoŭvajucca nieacennyja staražytnaści.

0.00

Dziaržaŭnaje TV abvieściła, što nieŭzabavie čakajecca važny vystup.

Bajcy Słužby achovy prezidenta ačapiła budynak TV.

Miedyki padviali vyniki dnia: u Kairy achviaraŭ nie zarehistravana. A voś u Suecy zahinuli 13 čałaviek. Usiaho ŭ krainie 1030 čałaviek źbita ci paraniena.

22.50

Aktyvisty maładziovych apazicyjnych arhanizacyj atačyli žyvym łancuhom Nacyjanalny muziej Jehipta. Jany chočuć abaranić jaho ad mahčymych pravakacyj i maradzioraŭ. Paźniej da ich dałučylisia vajskoŭcy.

Daharaje budynak dyktataravaj partyi. Kala jaho pratestoŭcy spalili taksama dziasiatak palicyjnych mašyn.

Apazicyja spaliła taksama dziasiatki pastarunkaŭ palicyi.

Armija nie ŭmiešvajecca, nie spyniaje demanstrantaŭ, choć i zaniała pazicyi kala klučavych budynkaŭ u jehipieckaj stalicy.

Toje samaje adbyvajecca ŭ druhim pa pamiery horadzie Jehipta — Aleksandryi.

U trecim pa značeńni horadzie, Suecy, u vyniku dzionnych sutyčak 11 čałaviek zahinuli, sotni paranieny. Armija pakinuła horad śledam za palicyjaj.

Armija atačyła pasolstvy ZŠA i Brytanii.

Dziasiatki tysiač manifiestantaŭ kantralujuć centr stalicy Jehipta i vitajuć sałdataŭ. Apošnija zachoŭvajuć niejtralitet.

Mubarak tak i nie vystupiŭ pa telebačańni. Jaho nie bačyli na TV ad času pačatku pratestaŭ.

19.40

Jehipieckaje TV abvieściła, što kamiendanckaja hadzina ŭvodzicca va ŭsioj krainie. U reparcioraŭ niama ŭražańnia, što palicyi ŭdajecca ŭziać situacyju pad kantrol.

Pieradajuć, što ŭ Kairy manifiestanty šturmujuć budynak Ministerstva zamiežnych spraŭ.

I ŭ Kairy, i ŭ Aleksandryi ludzi zastajucca na vulicach. Na zdymkach vidać, što aŭtamabili praciahvajuć jeździć pa vulicach. Vidać, jak demanstranty vitajuć vajskoŭcaŭ.

19.30

Stralanina čuvać va ŭsim Kairy.

19.20

Haryć budynak kirujučaj partyi ŭ Kairy. Na vulicach harać palicejskija hruzaviki. Stralanina dalataje z roznych kancoŭ horada.

Ludzi na vulicach vitajuć vajskoŭcaŭ, kidajuć kamiani ŭ śpiecnaz.

Chiłary Klintan u žyvym efiry TV asudziła hvałt, zaklikała ŭłady Jehipta adnavić suviaź i internet i nie čapać mirnych manifiestantaŭ.

18.00

Reparciory vymušana zastajucca ŭ ofisach paśla abviaščeńnia kamiendanckaj hadziny. U horadzie zaŭvažny šmatlikija pažary. Čuvać vybuchi i stralanina.

17.55

Ułady Jehipta abvieścili pra ŭviadzieńnie kamiendanckaj hadziny ŭ bujnych haradach, na vulicy vyviedziena armija. Demanstracyi ŭspychvajuć u roznych rajonach stalicy. Ułady abvieścili pra ŭviadzieńnie kamiendanckaj hadziny ŭ Kairy, Aleksandryi, Suecy ad 18.00. Na vulicach zastajecca jehipiecki śpiecnaz.

U toj ža čas niekalki haradoŭ krainy, zdajecca, pierajšli pad kantrol manifiestantaŭ. Heta druhi pa pamiery horad krainy Aleksandryja i klučavy port Suec. Demanstranty palać aŭtamabili palicyi i vadamioty. U niekalkich haradach spalenyja budynki kiraŭničaj partyi, jakaja była asnovaj jehipieckaj viertykali ŭłady.

Telekanał «Al-Džazira» pieradaje karcinku z vulicy: vajskovaja broniemašyna ŭ centry stalicy. Manifiestanty vitajuć jaje, abdymajuć sałdat.

U toj ža čas dziaržaŭnyja ŚMI pieradajuć, što armiejskija častki vyviedzieny na vulicy na zahad Mubaraka dla padtrymańnia paradku i padtrymki palicyi.

Čakajecca telezvarot Chośni Mubaraka, jaki kiruje krainaj amal 30 hadoŭ i źbiraŭsia pieradać uładu svajmu synu Hamalu.

Aficyjnyja asoby paćvierdzili fakt «chatniaha aryštu» lidara śvieckaj apazicyi Jehipta — fizika-jadzierščyka, byłoha kiraŭnika MAHATE Machamieda al-Baradei.

17:25

U Kair uvajšli vajennyja častki, u horadzie zaŭvažana braniatechnika.

Krychu raniej pratestoŭcy źviartalisia z zaklikam da armii dałučycca da masavych vystupaŭ suprać prezidenta krainy Chośni Mubaraka. Jany spadziajucca, što armiejskija častki buduć stavicca da ludziej miahčej, čym palicyja.

17:02

Aficyjnyja ŭłady Jehipta zajaŭlajuć, što były kiraŭnik MAHATE i Nobieleŭski łaŭreat Machamied al-Baradei znachodzicca pad chatnim aryštam.

Raniej źjaviłasia infarmacyja, što al-Baradei dałučyŭsia da demanstracyi pratestu ŭ Kairy i nastojvaŭ na jaje mirnym charaktary praviadzieńnia.

16:30

Demanstranty zachapili horad Suec.

U Kairy zakryta mietro, mabilnaja suviaź adklučana va ŭsich vialikich haradach.

Jehipiet absiok internet-dostup.

Tym nie mienš, jak pieradajuć praz spadarožnikavuju suviaź karespandenty telekanała «Al-Džazira», na vulicy Kaira vyjšli dziasiatki tysiač ludziej. Manifiestacyi pačalisia ad 70 miačeciaŭ i chryścijanskich cerkvaŭ. «Musulmanie i chryścijanie razam suprać karupcyi, biespracoŭja i niavoli», — taki zaklik sabraŭ dziasiatki tysiač podpisaŭ u internecie.

Miescy zboru kałonaŭ byli daviedzieny da viedama ludziej postarami, jakija apazicyja razdrukavała i raskleiła siońnia ŭnačy.

U krainu viarnuŭsia lidar śvieckaj apazicyi Jehipta Machamied al-Baradei. Palicyja sprabavała zatrymać jaho siońnia ŭranku. Ludzi baranili jaho, stvaryŭšy «žyvy ščyt». Jahonaje znachodžańnie na hety momant nieviadomaje.

15:46

U Jehipcie narastaje supraćstajańnie ŭładaŭ i pratestoŭcaŭ, palityki zaklikajuć Mubaraka pajści na sastupki

Situacyja ŭ Jehipcie abvastrajecca, telekanał Al Jazeera adklučany ad jehipieckaha spadarožnika, na vulicach Kaira praciahvajucca sutyknieńni manifiestantaŭ i palicyi, palityki zaklikajuć prezidenta Mubaraka pajści na sastupki.

Katarski telekanał Al Jazeera całkam adklučany ad jehipieckaha spadarožnika «Najłsat», tym nie mienš, pramyja tranślacyi demanstracyj, jakija achapili Jehipiet, praciahvajucca.

U Kairy narastaje supraćstajańnie. Na płoščy Abdel Munejma Ryjada ŭ Kairy natoŭp padpaliŭ palicejski aŭtamabil. Streły čuvać u rajonie płoščy at-Tachryr. Jość źviestki ab pieršym zahinułym.

Jehipiecki sienatar Mustafa al-Faki zaklikaŭ prezidenta Chośni Mubaraka źviarnucca da naroda z pramovaj, padkreśliŭšy, što «mierami biaśpieki ŭžo niemahčyma vyrašyć prablemy».

«Nieabchodna znajści inšy vychad z kryzisu: šlacham mužnych, chutkich i efiektyŭnych reform», — zajaviŭ jon.

15:32

Štab-kvatery kiroŭnaj Nacyjanalna-demakratyčnaj partyi (NDP) Jehipta razhromlenyja ŭ niekalkich haradach hetaj krainy, u stalicy palicyja ŭžyła humovyja kuli dla razhonu najbujniejšaj demanstracyi pratestu.

U horadzie Ismailija pratestoŭcy zachapili ofis NDP, paviedamlajuć vidavočcy ź miesca padziej.

Katarski telekanał Al Jazeera paviedamlaje, što ŭ horadzie El-Mansura mitynhoŭcy, kolkaściu da 40 tys. čałaviek, taksama zachapili ofis kiroŭnaj partyi.

U horadzie Suec demanstranty ŭvarvalisia ŭ palicejski pastarunak i vyzvalili ŭsich źniavolenych, zatrymanych u apošnija dni.

U Kairy palicyja stralała ŭ demanstrantaŭ humovymi kulami, sprabujučy razahnać samuju šmatlikuju akcyju pratestu ŭ hetaj krainie. Akcyi pratestu prachodziać na centralnaj płoščy Tachryr Demanstranty patrabujuć adstaŭki Mubaraka.

15:14

U Kairy adbyvajucca sutyknieńni palicyi z tysiačami demanstrantaŭ, jakija patrabujuć adstaŭki prezidenta Jehipta Chośni Mubaraka i jaho kabinieta.

Dla razhonu palicyja ŭžyvaje vadamioty i ślozaciečny haz; u adkaz u ich laciać kamiani. Masavyja pratesty prachodziać taksama ŭ partovych haradach Suec i Aleksandryja.

Ułady Jehipta zahadali mabilnym apierataram adklučyć suviaź u asobnych rajonach krainy.

14:31

U Jehipcie pačalisia sutyknieńni palicyi z šmattysiačnaj demanstracyjaj, eks-kiraŭniku MAHATE nie dazvolili dałučycca da akcyi pratestu.

U Jehipcie praciahvajucca akcyi pratestu, tysiačy demanstrantaŭ vyjšli na vulicy Kaira. Vidavočcy paviedamlajuć, pratestoŭcy sabralisia niepadalok ad rezidencyi prezidenta Chośni Mubaraka, paviedamlaje Reuters. Eks-kiraŭniku MAHATE Machamiedu Al-Baradei palicyjanty nie dazvolili dałučycca da akcyi apazicyi.

Na vulicach stalicy Jehipta znachodziacca tysiačy palicyjantaŭ, bližejšaja da rezidencyi prezidenta miačeć začynienaja z-za bojazi, što jana stanie miescam zboru pratestujučych. U Jehipcie nie pracuje internet i pieraboi z mabilnaj suviaźziu.

Vidavočcy paviedamlajuć ab raspačatych sutyknieńniach ź siłami pravaparadku.

Demanstranty patrabujuć adstaŭki prezidenta krainy Mubaraka, jaki znachodzicca la ŭłady 30 hadoŭ.

• 0
• 0
• 0
• 0
• 0
• 0
• 0
• 0