Niaklajeŭ: «Tam było niaprosta. Dziakuj usim!»

Niaklajeŭ vyhladaje nie vielmi zdarova, ale ŭśmichajecca. Hołas badziory. Hebisty viali jaho pad ruki. Było ŭražańnie, što jon sam nie moža dobra iści.

U 22.35 eks-kandydata ŭ prezidenty Uładzimira Niaklajeva kahebisty zaviali ŭ jahonuju kvateru. Jana znachodzicca na vulicy Vielikamorskaj na paŭdniovym uschodzie biełaruskaj stalicy.

Niaklajeva pryvieźli na sinim mikraaŭtobusie «Falksvahien Transporter». Śpiarša dva supracoŭniki śpiecsłužbaŭ prajšli ŭ kvateru Niaklajevych i ačyścili jaje ad pabočnych asobaŭ.

Paśla dva inšyja śpiecsłužbisty vyvieli palityka. Niaklajeŭ vyhladaŭ nie vielmi zdarovym. Stvarałasia ŭražańnie, što jon nie moža sam dobra iści.

Karespandent «Našaj Nivy» paśpieŭ zadać Niaklajevu niekalki pytańniaŭ. Niaklajeŭ adrazu papiaredziŭ, što nie maje prava davać intervju. Kahebisty viali jaho nie spyniajučysia, vielmi chutka. Ale na chadu, ad mašyny da padjezda, Niaklajeŭ paśpieŭ skazać niekalki słovaŭ. Kahebisty pry hetym zachoŭvali maŭčańnie i chavali svaje tvary.

«Vialiki dziakuj usim! Udziačny za padtrymku», — skazaŭ jon najpierš. Da žurnalistaŭ Niaklajeŭ źviarnuŭsia badziora i z uśmieškaj.

«Jak Vy praviali hety miesiac u SIZA KDB?» — zapytaŭsia karespandent «Našaj Nivy». — «Tam było niaprosta», — paśpieŭ adkazać Niaklajeŭ. I jaho zaviali ŭ padjezd, kudy dostup žurnalistam byŭ pierakryty.

Kala budynka Niaklajeva čakali kala 15 žurnalistaŭ i čaćviora prychilnikaŭ apazicyi. Jany pravodzili eks-kandydata apładysmientami.

* * *

Siońnia z-pad varty pad chatni aryšt była vyzvalenaja taksama Iryna Chalip, žonka Andreja Sańnikava.

Jak paviedamlajuć łukašenkaŭskija ŚMI, rašeńnie ab źmienie miery strymańnia pryniaŭ Kamitet dziaržaŭnaj biaśpieki.

Rašeńnie było pryniata, adznačaje BiełTA, «hruntujučysia na vynikach praviedzienych raniej śledčych mierapryjemstvaŭ, ustanaŭleńni asnoŭnych abstavinaŭ kryminalnaj spravy pa fakcie masavych biesparadkaŭ u Miensku 19 śniežnia, roli kožnaha z abvinavačanych i ich linii pavodzin sa śledstvam, pa ŭzhadnieńni z orhanami prakuratury».

Vaźniak ža pieraličany ŭ adnym śpisie vypuščanych z Korbanam, Radzinaj, Paŭłavym, Kobiecam. Ich, jak viadoma, vypuścili pad padpisku pra niavyjezd ź pierabyvańniem u horadzie rehistracyi.

Niaklajevu i Chalip pad chatnim aryštam zabaroniena razmaŭlać praz telefon i vychodzić z domu.

Składanym psichałahičnym momantam budzie patłumačyć Daniku Sańnikavu, čamu mama nie moža vychodzić na dvor i čamu pobač uvieś čas prysutničaje varta. Ale, hałoŭnaje, Danik zaraz budzie pry mamie.

* * *

Chatni aryšt: što pra jaho piša Kryminalny kodeks

Zhodna z artykułam 125 Kryminalna-pracesualnaha kodeksa RB, chatni aryšt moža supravadžacca nastupnymi mierami, jakija ŭžyvajucca jak paasobku, tak i ŭ dapuščalnaj sukupnaści:

1) zabaronaj vychadu z žytła poŭnaściu abo ŭ peŭny čas;

2) zabaronaj telefonnych pieramoŭ, adpraŭleńnia karespandencyi i vykarystańnia srodkaŭ suviazi, za vyklučeńniem vypadkaŭ, praduhledžanych punktam 5 častki druhoj hetaha artykuła;

3) zabaronaj mieć znosiny z peŭnymi asobami i prymać kaho b tam ni było ŭ siabie;

4) karystańniem elektronnymi srodkami kantrolu i ŭskładańniem abaviazku nasić pry sabie hetyja srodki i absłuhoŭvać ich rabotu;

5) uskładańniem abaviazki adkazvać na kantrolnyja telefonnyja zvanki abo inšyja sihnały kantrolu, telefanavać pa telefonie ci asabista źjaŭlacca ŭ peŭny čas u orhan daznańnia ci inšy orhan, jaki ažyćciaŭlaje nahlad za pavodzinami padazronaha abo abvinavačanaha;

6) ustalavańniem nahladu za padazravanym ci abvinavačvanym abo jaho žyllom, a taksama achovaj jaho žylla abo adviedzienaha jamu ŭ žyllo pamiaškańnia;

7) inšymi padobnymi mierami, jakija zabiaśpiečvajuć naležnyja pavodziny i izalacyju padazravanaha, abvinavačanaha ad hramadstva.

• 0
• 0
• 0
• 0
• 0
• 0
• 0
• 0