Sto viernikaŭ na čale z ksiandzom Alaksandram Šemietam patrabujuć dazvolić narešcie budaŭnictva chramu. Staršynia abłvykankamu Saŭčanka: niekatoryja katalickija śviatary nahniatajuć palityčnuju sytuacyju ŭ krainie.
Jašče adzin relihijny prychod abvieściŭ, što bližejšym časam raspačnie post-haładoŭku. Śledam za viernikami ź mienskaj pratestanckaj carkvy «Novaje žyćcio»; pra takuju akcyju pratestu zajaviŭ probašč katalickaha prychodu Najśviaciejšaj Panny Maryi, Maci miłasernaści Alaksandar Šemiet.
U piatnicu z ranicy hrupa viernikaŭ, jakaja naličvała bolš za sto čałaviek, nakiravałasia ŭ bok budynku Haradzienskaha abłasnoha vykanaŭčaha kamitetu. Sprava ŭ tym, što voś užo amal jak 10 hadoŭ haradzkija ŭłady nie dajuć dazvoł na budaŭnictva kaściołu.
Pra svaju akcyju kataliki zajavili jašče ŭ paniadziełak, tamu ichniaha prychodu da pryznačanaha miesca ŭžo čakaŭ staršynia haradzienskaha Abłvykankamu Ŭładzimier Saŭčanka, jaki zaprasiŭ viernikaŭ prajści ŭ budynak.
Ajciec Alaksandar Šemiet paviedamiŭ pra toje, što Saŭčanka zajaviŭ, što niekatoryja vierniki abkradvajuć kaścioły, i tamu ichniaje budaŭnictva idzie tak marudna. «Heta adkrytaje abvinavačvańnie ŭ tym, što my machlary i złodziei, – kaža Alaksandar Šemiet. – Paśla Saŭčanka pačaŭ havaryć pra toje, što vy ž sami viedajecie, što niekatoryja katalickija śviatary nahniatajuć palityčnuju sytuacyju ŭ krainie. Ja vielmi škaduju, što nia ŭziaŭ z saboj dyktafonu, kab zapisać hetyja vykazvańni čynoŭnika. Ale heta čuli ludzi, jaki pryjšli razam sa mnoj. Paśla takich słovaŭ ja nie pačaŭ spračacca, a prosta prapanavaŭ usim viernikam syści z budynku. Tady Saŭčanka pačaŭ u našyja śpiny kryčać, što dazvalaje budaŭnictva chramu. Ludzi ŭzradavalisia, pačuŭšy takija słovy, ale ja skazaŭ, što słovy zastajucca tolki słovami, a nam patrebien piśmovy dazvoł».
Ksiondz Šemiet nie ŭvažaje post-haładoŭku za krajniuju i najbolš radykalnuju formu pratestu. Jon kaža, što ciapier heta ledźvie nie adzinaja prymalnaja akcyja, jakaja moža zajmieć hramadzki rozhałas. «Heta naš svojeasablivy kryk dušy», – kaža śviatar. Razam z ksiandzom Alaksandram Šemietam 1 śniežnia post-haładoŭku majuć pačać jašče niekalki dziasiatkaŭ viernikaŭ. Jany haładaćmuć u budynku parafijalnaj kaplicy.
Pavodle słovaŭ Alaksandra Šemieta, raniej parafijanam nie chaciełasia vynosić śmiećcia z chaty, ale ciapier heta stała nieabchodnaściu.
Ajciec Šemiet kaža, što na post-haładoŭku ich natchniła padobnaja akcyja mienskich pratestantaŭ. «Dziakuj pratestantam, što jany dali nam mužnaści, my štodnia padčas ichniaj akcyi pratestu malilisia za haładoŭnikaŭ».
Pakul nieviadomaja reakcyja na hetyja padziei Haradzienskaj jeparchii. Maŭčyć pra haradzienskija padziei i hałoŭny katalicki partał Biełarusi www.catholic.by.
Kamientary