Hurt «Lapis Trubiackoj» prezientavaŭ pieśniu «Ja vieru».
Hurt «Lapis Trubiackoj» prezientavaŭ pieśniu «Ja vieru». Jana ŭvojdzie ŭ novy albom «Viesiołyje kartinki», reliz jakoha zapłanavany na 11 sakavika.
«Ja vieru ŭ Isusa Chrysta, ja vieru ŭ Haŭtamu Budu, ja vieru ŭ praroka Muchamada...»,
— śpiavaje Siarhiej Michałok. Akramia taho ŭ novaj pieśni zhadvajucca Kryšna, Tor, Dža i jašče ceły šerah bahoŭ roznych epoch i kantynientaŭ.
«Multykanfiesijnaść» novaha treku prakamientavaŭ lidar «Lapisaŭ» Siarhiej Michałok:
— Usio, što datyčyć relihii, viery, u nas albo abrastaje patryjarchalnym pafasam, albo ludzi pra heta ŭvohule imknucca nie havaryć: adniekvajucca, adžartoŭvajucca, chichikajuć... Tamu mnie i zachaciełasia zrabić pieśniu, pryśviečanuju hetaj składanaj i navat, ja b skazaŭ, dalikatnaj temie. Pryčym takuju pop-piesieńku, u zrazumiełym i dastupnym dla ŭsich trochchvilinnym farmacie.
Mahčyma, ludziam, jakija surjozna cikaviacca fiłasofijaj, ezaterykaj, mistykaj, jana padasca prymityŭnaj, ale ŭ mianie nie było žadańnia zanuracca ŭ teałahičnyja niuansy.
Ja prosta chacieŭ zrabić pieśniu, u jakoj by dastupna i jasna, ledź nie ŭ duchu dziciačych ličyłak, havaryłasia pra toje, jak ja ŭjaŭlaju sabie ŭładkavańnie Suśvietu.
Ja ŭpeŭnieny, što kožny narod i kožny čałaviek niasie ŭ sabie čaścinku niejkaj sakralnaj iściny, usio roŭna, adukavany heta čałaviek ci niepiśmienny, zły ci dobry, prezident abo šachcior, relihijny dziejač abo ateist. I tolki prysłuchoŭvajučysia adno da adnaho, tolki razam, u salidarnaści, siabroŭstvie i ŭzajemnaj pavazie my možam pasprabavać chacia b na krok nablizicca da boskaj zadumy. Heta vielmi surjoznaja reč, i ja ŭ heta vieru.
A kali my budziem pa-raniejšamu znachodzić zahany ŭ viery inšych ludziej, u ich maralna-etyčnych pryncypach, u kolery skury, u razrezie vačej, kali my budziem budavać uzajemaadnosiny na asnovie hvałtu, to praciahniem addalacca ad ideałaŭ, u tym liku i relihijnych, jakim na słovach słužym.
Pry hetym Michałok nie choča, kab jaho ŭsprymali jak navajaŭlenaha prapaviednika, «rok-zorku ŭ sutanie».
— Ja — vakalist hurtu «Lapis Trubiackoj», a ŭ lubym našym tvory jość dola ironii. Ja navat sa svaich ułasnych pierakanańniaŭ zaŭsiody hatovy paśmiajacca, bo čałaviečyja pohlady — heta strumień, raka.
Jany źmienlivyja, tamu što evalucyja čałavieka, jaki myślić, hruntujecca na sumnievach, a nie na pierakanańniach. A ludzi ź ćviordymi, vyraznymi, raz i nazaŭsiody sfarmavanymi pierakanańniami — palityčnymi, relihijnymi — jakraz jany i vybuchajuć u aeraportach.
Konkurs «Budź svabodnym!»
Pasłuchajcie novuju pieśniu hurtu «Lapis Trubiackoj» «Ja vieru» i stvarycie vizualny pradukt pa jaje matyvach (heta moža być videa, fota, animacyja, hrafika, žyvapis, kałaž, dematyvatar — usio, što padychodzić dla retranślacyi z manitora ci ekrana).
Siabrami žury, u jakoje ŭvojduć muzyki «Lapisa Trubiackoha» i kampanii «Budźma razam!», u pieršuju čarhu budzie aceńvacca tvorčaja ideja kožnaj pracy.
10 finalistaŭ konkursu atrymajuć padarunki z aŭtohrafami ad hurtu, a taksama pa dva kvitki na luby z kancertaŭ turu «Viesiołyje kartinki».
Najlepšyja pracy abo ich frahmienty buduć vykarystanyja ŭ videainstalacyi padčas turu.
A hałoŭnym pryzam konkursu budzie pajezdka na prezientacyju alboma «Viesiełyje kartinki» ŭ Maskvu, Sankt-Pieciarburh ci Minsk.
Pieramožcu budzie apłočana daroha tudy i nazad ź luboha punkta SND, pražyvańnie ŭ Maskvie, Piciery ci Minsku, a taksama ŭručany VIP-kvitok na kancert «Lapisaŭ».
Pracy prymajucca da 25 lutaha pa adrasie: [email protected] z paznakajj «Budź svabodnym!». (Prośba ŭkazvać svajo imia abo psieŭdanim, uzrost, paštovy adras i numar mabilnaha telefona).
Abjom dasłanaha fajła nie pavinien pieravyšać 25 Mb.
Tur «Viesiołyje kartinki»
10 lutaha – Lida, Biełaruś. «RDK»
11 lutaha – Hrodna, Biełaruś. «Parłamient»
12 lutaha – Brest, Biełaruś. «DK prafsajuzaŭ»
13 lutaha – Viciebsk, Biełaruś. «Enierhija»
16 lutaha – Baranavičy, Biełaruś. «HDK»
18 lutaha – Kijeŭ, Ukraina. «Binho»
19 lutaha – Simfieropal, Ukraina. «Vitamin»
20 lutaha – Adesa, Ukraina. «Sady pobiedy»
22 lutaha – Dnieprapiatroŭsk, Ukraina. «Tajm-aut»
23 lutaha – Łuhansk, Ukraina. «Colosseum»
25 lutaha — Zaparožža, Ukraina. «ZimaProject»
26 lutaha — Danieck, Ukraina. «Liverpool»
27 lutaha — Charkaŭ, Ukraina. «Žara»
28 lutaha — Nikałajeŭ, Ukraina. «Illuzion'»
4 sakavika — Mahiloŭ, Biełaruś. «Liha»
5 sakavika — Maskva, Rasija. «Olimpijskij». Fiestyval «Čartova Diužina»
6 sakavika — Sankt-Pieciarburh, Rasija. «Jubilejnyj». Fiestyval «Čartova Diužina»
7 sakavika — Jarasłaŭl, Rasija. «Avanhard»
8 sakavika — Ćvier, Rasija. «Ot zakata do rasśvieta»
11 sakavika — Maskva, Rasija. «A2»
13 sakavika — Homiel, Biełaruś. Lohkaatletyčny maniež «Dynama»
18 sakavika — Sankt-Pieciarburh, Rasija. «HłavCLUB»
30 sakavika — Varšava, Polšča. «Stodola»
1 krasavika — Minsk, Biełaruś. «Reaktar»
2 krasavika — Minsk, Biełaruś. «Reaktar»
Kvitki na kancerty ŭ Minsku: 55 tys. (tolki tancplacoŭka). U prodažy z 15 lutaha. Daviedka: (017) 288 61 60.
-
«Najhoršy kancert u maim žyćci»: biełaruska paskardziłasia na vystup «Ivanušak» u Minsku i nabrała 2 miljony prahladaŭ
-
Premija MTV: tryumf Tejłar Śvift i emacyjnaja pramova Ryty Ory ab udzielniku One Direction
-
«Ja nie viarnuś dadomu, Vaŭkałak!». Historyja kachańnia i pieraradžeńnia ŭ novym fentezijnym klipie hurta Irdorath
Stała viadoma, čamu pieramožca biełaruskaha adboru «Mis Suśviet» nie jedzie na konkurs. Jana znajšłasia ŭ SIZA9
Kamientary