Ahlad za apošnija tydni.
Tvory mastactva žyvuć svaim žyćciom, apryčonym ad svaich tvorcaŭ. A časam losy hetych tvoraŭ stanoviacca nia mienyš cikavymi, čym losy ludskija.
Ci moh by syn kramnika z Narmandyi, maładzieńki žaŭnier Kłod Mane, jaki zachvareŭ na tyf u śpiakotnym Ałžyry, viedać, što stanie suśvietna słavutym mastakom? Ale praz paŭtary sotni hadoŭ jaho papularnaść stała vyklučnaj. I dasiońnia jon samy šanavany mastak u śviecie. Na tym tydni skončyłasia ŭnikalnaja vystava jaho tvoraŭ u Paryžy. Hetkaj pradstaŭničaj ekspazicyi tvoraŭ Mane ŭ Francyi nie było ciaham užo troch dziesiacihodździaŭ. U załach Vialikaha vystaŭnaha pałaca Paryža arhanizatary ekspazicyi pradstavili 170 pałotnaŭ, stvoranych znakamitym mastakom-impresijanistam za 60 hadoŭ tvorčaści. Blizu troch dziasiatkaŭ karcin, jakija pastupili z pryvatnych kalekcyj, u apošnija dziesiacihodździ amal nie vystaŭlalisia.
Tolki za try apošnija miescy na vystavie tvoraŭ Kloda Mane ŭ Paryžy pabyvali 911,6 tys. čałaviek. U apošnija čatyry dni zały Hran-Pale pracavali ŭ kruhłasutačnym režymie. Sotni ludziej, jak turysty, tak i paryžanie, pa šmat hadzin stajali ŭ čarzie, imknučysia patrapić na ŭnikalnuju ekspazicyju. U absalutnym rejtynhu rekordaŭ Francyi pakaz karcin Mane znachodzicca na druhim miescy, sastupajučy pa papularnaści adno skarbam Tutanchamona, pakaz jakich sabraŭ u 1967 hodzie ažno 1,2 młn. čałaviek. Praŭda, tady vystava pracavała nie try, a siem miesiacaŭ.
Jašče adnoj hučnaj navinoju ŭ Jeŭropie stała znachodka karciny Albrechta Dziurera "Samahubstva Kleapatry" . Jaje skrali jašče ŭ 1972 hodzie! Karcina hienijalnaha niamieckaha mastaka epochi Adradžeńnia vyjaviłasia, kali kalekcyjanier, jaki chacieŭ nabyć šedeŭr, źviarnuŭsia da italjanskaj palicyi z prośbaj pravieryć jaho pachodžańnie. Dalejšaje daznańnie pakazała, što "Samahubstva Kleapatry" zachoŭvałasia ŭ kvatery adnaho dyzajniera ŭ Rymie. Kalekcyja hetaha nienazvanaha dyzajniera naličvała kala 180 prac, ź jakich 16 byli skradzienyja z cerkvaŭ i pryvatnych kalekcyj. Ahulny košt vykradzienych karcin składaje blizu miljona jeŭra.
Ale i heta nie samaja vialikaja ličba za minuły tydzień. Uraziła śviet cana, za jakuju była pradadzienaja karcina Tycyjana na aŭkcyjonie Sotheby's u Ńju-Jorku. Pałatno "Śviataja biasieda. Madonna ź dziciem,Śviatym Łukoju i Kaciarynaju Aleksandryjskaj" pradadzienaja za $ 16.900.000. Heta rekordnaja cana dla karciny epochi Reniesansu. Karcina italjanskaha majstra stała, takim čynam,adnym z samych darahich pałotnaŭ, pryśviečanych relihijnaj tematycy, što byli pradadzienyja na volnym rynku. "Śviataja biasieda", napisanaja ŭ 1560 hodzie, na praciahu čatyroch z pałovaj stahodździaŭ zachoŭvałasia tolki ŭ pryvatnych kalekcyjach, tolki šeść razoŭ źmianiŭšy ŭładalnika. Jak paviedamiła pradstaŭnik aŭkcyjonnaha doma, pakupnikom top-łota ciapierašnich tarhoŭ staŭ ananimny kalekcyjanier ź Jeŭropy. Ahulnaja suma, atrymanaja padčas tarhoŭ rabot starych majstroŭ, jakija adbylisia na Sotheby's u minuły čaćvier, skłała $ 78,6 młn.
To bok, jość jašče i ŭ našaj častcy śvietu pakupniki, jakich nie biantežać takija ličby. I nie pierastajuć ździŭlać svaim losam tvory.
