Na žal, spadziavańni na toje, što Natallu Iljinič adnoviać na pracy albo prapanujuć miesca nastaŭnicy ŭ inšaj škole Puchavickaha rajona, nie spraŭdzilisia.
Na minułym tydni Natalla Iljinič atrymała z rajonnaha adździeła adukacyi adkaz na svaju zajavu, u jakoj prasiła dapamahčy joj z pracaŭładkavańniem.
Cynizm situacyi ŭražvaje.
«Nanimatielem piedahohov v učrieždienijach obrazovanija javlajutsia rukovoditieli učrieždienij obrazovanija, — havorycca ŭ adkazie, jaki padpisany zahadčykam RAA Taćcianaj Čarnyšovaj. — Po sostojaniju na 1 fievrala 2011 h.
śviedienija o vakansijach učitielej istorii v učrieždienijach obrazovanija Puchovičskoho rajona v otdieł obrazovanija nie postupali».
Zaraz zastajecca tolki čakać adkazu ministra adukacyi Siarhieja Maskieviča, da jakoha Natalla Iljinič taksama źviarnułasia z prośbaj ab pracaŭładkavańni. Moža, jon abaronić pravy vysokaprafiesijnaha nastaŭnika, jakich tak brakuje Biełarusi navat pa aficyjnych acenkach?
Jak pisała «Narodnaja Vola», z nastaŭnicaj historyi Natallaj Iljinič dyrektar Talkaŭskaj siaredniaj škoły Natalla Mierkul, pryznačanaja na pasadu tolki 1 vieraśnia 2010 hoda, nie praciahnuła pracoŭny kantrakt pasiaredzinie navučalnaha hoda. Jak ličyć Natalla, z pryčyny jaje hramadzianskaj pazicyi — na minułych prezidenckich vybarach Iljinič źbirała podpisy za kandydataŭ u prezidenty Kastusiova i Michaleviča. A ŭ minułym hodzie, kali Natalli načalnik Minskaha abłasnoha ŭpraŭleńnia adukacyi Taisa Danilevič ultymatyŭna prapanavała — albo praca ŭ škole, albo členstva ŭ partyi BNF, jana zaniała pryncypovuju pazicyju i z partyi nie vyjšła. Bolej za toje, jana źviarnułasia ŭ prakuraturu z prośbaj pravieści prakurorskuju pravierku taho, što adbyłosia ŭ kabiniecie Danilevič. I tady svaje pravy Natalla adstajała. Prakuratura pryznała, što nijakich zakonaŭ nastaŭnica z Talki nie parušyła, a były dyrektar Talkaŭskaj škoły Danuta Bahdzievič padoŭžyła ź jeju pracoŭny kantrakt. Ale čamuści tolki na hod…
Z 27 studzienia Natalla Iljinič biespracoŭnaja. Byłyja vučni i kalehi nastaŭnicy, baćki dziaciej, u jakich jana vykładała historyju, pisali listy spadaryni Mierkul z prośbaj nie zvalniać z pracy takoha piedahoha jak Iljinič. Listy padtrymki išli ad byłych adnakurśnikaŭ Iljinič, vykładčykaŭ minskaha pieduniviersiteta. Ale, vidać, u rajonnaha načalstva svoj pohlad na padbor kadraŭ, na toje, chto musić vučyć našych dziaciej