WikiLeaks: Kadafi naviedvaŭ Biełaruś, kab źbić canu zbrojevych pahadnieńniaŭ

Vizit livijskaha lidara Muamara Kadafi ŭ Biełaruś u listapadzie 2008 amierykanskija dypłamaty razhladali jak sprobu źnizić ceny pa pahadnieńniach u śfiery ŭzbrajeńniaŭ ź inšymi krainami.

Hety dakumient, datavany 5 sakavika 2009 h., ujaŭlaje saboj pamiatku da vizitu ŭ Liviju kamandujučaha ŭzbrojenymi siłami ZŠA ŭ Afrycy hienierała Uiljama Uorda. Padčas vizitu płanavałasia abmierkavańnie takich temaŭ, jak transnacyjanalny teraryzm, humanitarnaja dapamoha, staršyniavańnie Livii ŭ Afrykanskim sajuzie, kryzisnaja situacyja ŭ šerahu krain Afryki, raźvićcio pracoŭnych suviaziaŭ i kupla Livijaj zbroi.

Aŭtary depiešy nahadvajuć kamandujučamu Uordu, što syny Kadafi Saif al-Isłam (kiraŭnik dabračynnaha «Fondu Kadafi») i Mutasim (daradca pa pytańniach nacyjanalnaj biaśpieki) razhladajucca ŭ jakaści mahčymych pierajemnikaŭ svajho baćki. Pasolstva paviedamlaje, što Mutasim — prychilnik palapšeńnia adnosin Livii z ZŠA, jon imkniecca da zakupak uzbrajeńniaŭ u hetaj krainie.

Paviedamlajecca taksama, što livijskija čynoŭniki vykazvali zacikaŭlenaść u nabyćci vajennaha abstalavańnia ZŠA (śmiarotnaha i nieśmiarotnaha) padčas pieramovaŭ ab adnaŭleńni livijska-amierykanskaha supracoŭnictva.

Padčas vizitu dziaržsakratara ZŠA Kandalizy Rajs u Liviju ŭ vieraśni 2008 Mutasim Kadafi sustreŭsia ŭ kułuarach ź jaje pamočnikam Devidam Uełčam, i livijskija słužbovyja asoby pieradali dypłamatu «śpisy pažadańniaŭ» u kantekście padpisańnia miemaranduma ab uzajemarazumieńni ŭ vajennaj śfiery.

Hetyja śpisy «ŭklučali jak śmiarotnuju, tak i nieśmiarotnuju vajennuju techniku, i my skazali ŭradu Livii, što prodažy buduć razhladacca ŭ indyvidualnym paradku, u pryvatnaści tamu, što nie ŭsie vysokapastaŭlenyja kiraŭniki ŭrada ZŠA, jakija mahli b vykazacca pa hetym pytańni, pryznačanyja novaj [amierykanskaj] administracyjaj».

Dypłamaty paviedamlajuć, što «Mutasim supravadžaŭ svajho baćku padčas vizitu ŭ Maskvu na vysokim uzroŭni ŭ kastryčniku dla abmierkavańnia mahčymych pahadnieńniaŭ, adnak pajezdki jaho baćki ŭ Biełaruś i Ukrainu razhladalisia jak sproba źnizić ustalavanuju canu pa zbrojevych kantraktach».

Aŭtary depiešy adznačajuć, što Kadafi i pradstaŭniki jaho režymu «ceniać adnosiny z vysokapastaŭlenymi zachodnimi čynoŭnikami», tamu vizit Uorda «daje vydatnuju mahčymaść raźvić parazumieńnie, nieabchodnaje dla vyroščvańnia tut budučych vyhadaŭ». Uord pavinien stać pieršym amierykanskim «kamandujučym vojskami, jaki naviedaje Liviju» z pačatku 1970-ch hh. Vizitu papiaredničali vieraśniovaja pajezdka ŭ Liviju Kandalizy Rajs i padpisańnie krainami miemaranduma ab uzajemarazumieńni ŭ vajennaj śfiery ŭ studzieni 2009 h.

Supracoŭniki pasolstva ZŠA ŭ Trypali apisvajuć Kadafi jak lidara, jaki «niadaŭna schiliŭsia da panafrykanizmu, sprabujučy pašyryć svoj upłyŭ u krainach, dzie padtrymku možna prydbać niadoraha. Vielmi imavierna, što jon vieryć svajoj ułasnaj rytorycy ab tym, što jon — abaronca kantynienta, jaki na praciahu 400 hadoŭ pakutavaŭ ad kałanizacyi».

Jany adznačajuć, što «kiraŭnictva Livii naściarožana stavicca da zamiežnaha ŭpłyvu ŭ miežach svajoj ułasnaj śfiery ŭpłyvu». Kadafi «bałansuje pamiž pošukam vajennaj dapamohi z boku jeŭrapiejskich dziaržavaŭ, jakija jon ličyć adkaznymi za biedy Afryki, pry hetym pravodziačy žorstkuju liniju palityki nacyjanalnaha suvierenitetu».

Pasolstva ZŠA vykazvaje ŭpeŭnienaść u tym, što vizit Uorda ŭ Liviju źnizić aściarohi kansiervatyŭnych pradstaŭnikoŭ livijskaha režymu i paspryjaje pośpiechu Abjadnanaha kamandavańnia ŭzbrojenych sił ZŠA ŭ Afrycy.

• 0
• 0
• 0
• 0
• 0