Studentka varšaŭskaj Akademii mastactvaŭ Taćciana Zarembiuk maryć abjechać z vystavaj usiu Jeŭropu.
Prajekt Taćciany Zarembiuk pryśviečany Łukašenku i jaho siabram-dyktataram...
...achviaram łukašenkaŭskaha režymu.
A taksama padziejam 19 śniežnia 2010.
Dypłom z hučnaj nazvaj «Apošni dyktatar Jeŭropy» abaraniła stypiendyjatka prahramy Kalinoŭskaha z Mastoŭ Taćciana Zarembiuk. U Biełarusi jana vučyłasia ŭ Instytucie sučasnych viedaŭ, paśla padziejaŭ 2006 h. była adličanaja. Źjechała na vučobu ŭ varšaŭskuju Akademiju mastactvaŭ.
Dypłom ujaŭlaje saboj prajekt multymiedyjnaj vystavy. Fotachronika budzie padmacavanaja infarmacyjnymi stendami i karotkimi videasiužetami.
Što ž pabačać naviedniki vystavy, kali prajekt biełaruskaj studentki budzie realizavany? Vystava abjadnaje niekalki temaŭ. Heta ŭłasna piersanaž, pra jakoha viadziecca ŭ naźvie prajektu. Jaho palityčnaja bijahrafija, a taksama karotkija historyi pra jaho siabroŭ-dyktataraŭ. Svajo miesca na vystavie zojmie apovied pra achviaraŭ «apošniaha dyktatara Jeŭropy» — źnikłych palitykaŭ i biźniesoŭcaŭ, palitźniavolenych. Asobny stend u prajekcie budzie adviedzieny padziejam 19 śniežnia 2010 hoda.
Što da hučnaj nazvy svajho prajektu, to Taćciana nie baicca abvinavačvańniaŭ u kanjunkturnaści: «Ja daŭno cikaŭlusia hetaj temaj, kolki hadoŭ maru zładzić vystavu Ideja pryśviacić dypłomnuju pracu hetaj temie naradziłasia ŭ mianie tady, kali raspačaŭsia aktyŭny dyjałoh Zachadu z dyktataram. Ja zaŭždy ličyła što z dyktataram nielha damovicca. I nie mahła zrazumieć, jak možna daravać i zamoŭčvać toje, što adbyłosia pry kancy 90-ch ź źnikłymi palitykami. Jak možna zabyć pra losy palitźniavolenych i ich siemjaŭ. Pra ciažki los syna Zavadskaha».
Pracu nad dypłomam Taćciana pačała ŭ mai minułaha hoda, abaraniła jaho 21 studzienia.
«Spadziajusia, što zdoleju arhanizavać vystavu ŭžo sioleta», — kaža Taćciana. Zhodna prajektu, vystava maje być mabilnaj. Studentka z Mastoŭ maryć abjechać sa svajoj pracaj Jeŭropu. Tym bolš, što peŭnaja zacikaŭlenaść, pa jaje słovach, na Zachadzie ŭžo jość.