Sukała paabiacaŭ sustrecca z kožnaj žančynaj, nie zhodnaj z rašeńniem suda

Staršynia Viarchoŭnaha suda Valancin Sukała paabiacaŭ u sakaviku asabista sustrecca z kožnym pradstaŭnikom hrupy žančyn, jakija padpisali čarhovy zvarot na jaho imia, paviedamiła juryst Tamara Siarhiej.

Pavodle jaje słoŭ, 7 lutaha 19 pradstaŭnikoŭ hrupy žančyn, jakija paciarpieli ad asabliva ciažkich złačynstvaŭ, nie zhodnyja z rašeńniami sudoŭ pa svaich hramadzianskich spravach i kryminalnych spravach blizkich, pieradali Sukału kalektyŭny zvarot — 17-y ź lipienia 2009 hoda. Padaču zvarotu jany matyvavali tym, što na indyvidualnyja skarhi ŭ paradku nahladu praciahvajuć atrymlivać farmalnyja adpiski, u jakich niama adkazu na pastaŭlenyja pytańni.

«13 i 14 śniežnia 2010 hoda bolšaść padpisantaŭ byli ŭ Vas na asabistym pryjomie. Vy abiacali dać adkazy na našy skarhi ŭ adpaviednaści z zakanadaŭstvam krainy. Adnak, na žal, hetaha znoŭ nie adbyłosia», — havorycca ŭ zvarocie.

Jaho aŭtary padkreślivajuć, što Sukała parušaje pravy hramadzian, dadzienyja artykułam 40 Kanstytucyi.

Tamara Siarhiej vykazała nadzieju, što ŭ nastupnym miesiacy Sukała prymie ŭsich, chto padpisaŭ zvaroty, i kožnamu ź ich asabista daść adkaz u adpaviednaści z zakanadaŭstvam.

7 śniežnia 2010 na IV Usiebiełaruskim narodnym schodzie Alaksandr Łukašenka daručyŭ kiraŭniku svajoj administracyi Uładzimiru Makieju i hienieralnamu prakuroru Ryhoru Vasileviču razabracca z pytańniami, jakija pastavili pierad uładami pradstaŭniki hrupy žančyn na pikiecie 6 śniežnia na płoščy Svabody ŭ Minsku.

Juryst nahadała, što 7 lutaha 2007 hoda hrupa žančyn upieršyniu zajaviła pra siabie praviadzieńniem pres-kanfierencyi, padčas jakoj źviarnułasia da hramadstva pa padtrymku ŭ abaronu svaich pravoŭ, parušanych čynoŭnikami suda i prakuratury. Za čatyry hady hrupa praviała dziasiatki akcyj i damahłasia vyniasieńnia 22 prakurorskich pratestaŭ na sudovyja pastanovy. «Častka hetych pratestaŭ užo zadavolena. Usio heta havoryć pra toje, što možna damahčysia spraviadlivaści ŭ orhanach suda i prakuratury, kali hramadzianie, pieraadolvajučy strach, paśladoŭna i metanakiravana adstojvajuć svaje pravy», — padkreśliła Tamara Siarhiej.

• 0
• 0
• 0
• 0
• 0
• 0