«Nie mahu vybracca, tut pažar. Ja vas usich lublu»

U časie pažaru pad Brestam 23-hadovy mužčyna paśpieŭ patelefanavać z-pad zavałaŭ pierad śmierciu. Stanoviacca viadomymi horkija padrabiaznaści trahiedyi.

Trahiedyja zdaryłasia 21 lutaha ŭ vioscy Bujaki, što za paru kiłamietraŭ na ŭschod ad Bresta, kala trasy Brest-Minsk. Na pryvatnym pradpryjemstvie adbyŭsia pažar. U budynku mieściŭsia skład kvietak i ofis.

Spačatku prahrymieŭ vybuch, paviedamlaje sajt Ministerstva pa nadzvyčajnych situacyjach. U vyniku zdareńnia adzin čałaviek zahinuŭ, dvoje — paranienyja. Razburanyja apornyja ścieny 1 i 2 pavierchaŭ, abrynulisia plity pierakryćcia, dachavymi kanstrukcyjami źniščany hruzavy aŭtamabil «Mersedes», jaki znachodziŭsia ŭ haražy budynka. Płošča abrušeńnia skłała 180 kv. mietraŭ.

Sihnał pra zdareńnie ad vidavočcy pastupiŭ u MNS u 17.25. Na miescy byli nieadkładna arhanizavanyja raboty pa pošuku i vyratavańni dvuch čałaviek, što apynulisia pad zavałami. Adnačasova viałosia tušeńnie pažaru. Siem čałaviek, jakija na momant vybuchu znachodzilisia ŭ budynku, vybralisia ź jaho samastojna, adzin ź ich paźniej źviarnuŭsia pa dapamohu da miedykaŭ.

Užo praz 12 chvilin paśla pačatku pošukaŭ z-pad zavałaŭ supracoŭniki MNS vyniali mužčynu. Jon špitalizavany ŭ reanimacyjnaje adździaleńnie Bresckaj abłasnoj balnicy. Cieła chłopca, jaki zahinuŭ, znajšli paźniej, kali bolšaja častku zavałaŭ razabrali.

— U toj dzień u adnoj z supracoŭnic našaha pradpryjemstva byŭ dzień naradžeńnia. Adśviatkavać jaho na kuchni sabrałasia dzieviać čałaviek. Mnie raskazali, što moj stryječny brat i jašče adzin kiroŭca vyjšli ŭ inšy pakoj. U hety momant usio i zdaryłasia, — raspavioŭ «Kamsamolskaj pravdie» Vital, syn dyrektara pradpryjemstva. — Ci to vybuch, ci to pavaliłasia dach, ludzi nie zrazumieli. Ale budynak razburyŭsia. Tych, chto byŭ na kuchni, vykinuła chvalaj na vulicu. Adnaho mužčynu vyjavili pad zavałam adrazu. A majho brata Vitalika niama…

Jon klikaŭ na dapamohu, ale jaho nidzie nie mahli znajści. Šukaŭ jaho i moj baćka, jaki byŭ taksama ŭ budynku. A potym usio zaharełasia. Z-pad zavałaŭ brat patelefanavaŭ svajoj žoncy, baćkam i raźvitaŭsia. Skazaŭ: «Nie mahu vybracca, tut pažar. Ja vas usich lublu».

Vyratavalniki šukali Vitala navat u časie pažaru. Marna. Cieła znajšli tolki ŭnačy.

U mužčyny zastałasia paŭtarahadovaja dačka.

Prakuror Bresckaha rajona Viktar Chałapovič nazvaŭ mahčymaj pryčynaj vybuchu ŭciečku hazu na cokalnym paviersie.

• 0
• 0
• 0
• 0
• 0