Rok-karanacyju ažyviŭ ŠOS

U minskim kłubie «Reaktar» prajšła 15-ja «Rok-karanacyja». N.R.M. — «hurt 15-hodździa» i «albom 15-hodździa». Biez Volskaha NRM mieładyčna byŭ toj samy, ale z horšymi tekstami.

Sioleta karanacyja prajšła biez uznaharodžavańniaŭ: arhanizatary vyrašyli zładzić hała-kancert, i simvalična vybrać najlepšy albom i najlepšy hurt za apošnija 15 hadoŭ.

Zdajecca, «Reaktar» dla karanacyi idealny: usio ž taki słuchać rok-muzyku ŭ kresłach, u absalutnaj ćviarozaści i biez mahčymaści tančyć mohuć, badaj što tolki ŭ nas.

na karanacyju pryjšło čałaviek 500.

Ad bluzu da ŠOSu

Viali mierapryjemstva Alaksandr Pamidoraŭ i Ina Kašyryna. Kali Pamidoraŭ užo zasłužany viadoŭca, jaki, kali što, zmoža vyciahnuć usio mierapryjemstva «na sabie», to spadarynia Kašyryna, vidać, troški ź inšaj opiery — takuju manieru vieści kancert zvykła było b bačyć u fiłarmonii, ale nijak nie na rok-kancercie. Raspačałosia ŭsio z vystupu Drum Ecstasy — try bubnačy i hitaryst. Vidać mienavita tak, z hučnaj i adnačasova ciažkaj noty i pavinien pačynacca rok-fest.

«Krama» (darečy, samyja pieršyja rok-karali) vydała kłasičnuju porcyju chard-bluzu, z tradycyjna mocnymi soła na hubnym harmoniku (darečy, u Biełarusi vielmi redka sustrakajecca). Publika paśpieła rassłabicca paśla pracoŭnaha dnia i z zadavalnieńniem padpiavała Varaškieviču. Ale tut i źjaviłasia toje adčuvańnie, jakoje trymałasia pieršuju hadzinu: jak byccam by prysutničaješ nie na rok-karanacyi, a na viečary pamiaci ŭ rokierskim razumieńni takoha paniatku. Paśla «Kramy» na scenu vyjšli Kriwi – čarhovy skład hurtu adnačasova źmiešvaje fołk-matyvy, fank, kabare, rok-n-roł, etniku dy i astatnija žanry. Vieranika Kruhłova ciaham adnoj pieśni pieraŭvasablajecca z Łajzy Mineli ŭ Bobi Makferyna i naadvarot.

Źmicier Vajciuškievič, adrazu ž paśla vitańnia, trojčy pramoviŭ: «ŠOS!» I aŭdytoryja adrazu ž pieramianiłasia: jak byccam trapiŭšy ŭ inšuju enerhietyčnuju płyń.

«Ja naradziŭsia tut» (z užo zvykłymi słovami pra pieciarburžca Skarynu) śpiavali choram, a Vajciuškievič «uzmacniaŭ» rytm ŠOSam.

Stary novy NRM

Pit Paŭłaŭ adrazu zajaviŭ, što siońnia prahučać pieśni z novaha alboma, jaki ciapier pišacca. Asnoŭnaje pytańnie – chto budzie na albomie adkaznym za vakał – takim čynam zakryłasia. Vystup NRM byŭ hałoŭnaj intryhaj mierapryjemstva: jak budzie hučać hurt biez Volskaha i ci varta ličyć taki hurt NRM. Niekatoryja pryncypova nie pajšli na karanacyju praz adsutnaść Volskaha.

NRM mieładyčna byŭ toj samy, ale teksty Volskaha našmat lepšyja.

Pieśniu «Aŭtaradyjo» razam z eneremaŭcami vykanała Iryna Lvova – prahramnaja dyrektarka radyjostancyi. Nieŭzabavie pieśnia źjavicca ŭ internecie. A voś «Try čarapachi» prahučali nie tak, jak raniej, chacia ŭ muzyčnym płanie tam ničoha nie źmianiłasia. Tolki kožny radok ciapier śpiavajuć papałam Paŭłaŭ i Dziemidovič. Ale, što nie dziŭna, publika reahavała stanoŭča – staryja pieśni sami saboj horšymi nie stali, i chaj śpiavaje lepš Paŭłaŭ, čym nichto. Tym bolš Lavon Volski ciapier pracuje z zusim inšaj muzykaj. Ale voś pusty vakalny mikrafon, jaki stajaŭ pasiaredzinie sceny ŭvieś čas nahadvaŭ, što kaliści heta byŭ inšy hurt. Chacia miełodyka i chitovaść kłasičnaha NRMu zastałasia i ŭ novych pieśniach.

NRM byli pryznanyja najlepšym hurtam 15-hodździa, z najlepšym albomam za toj ža pieryjad.

«Niejra Dziubiel» jak emacyjny centr

A narodnymi hierojami, jak i ŭ minułym hodzie, stali «Niejra Dziubiel». Jany ŭžo daŭno dakazali, što mohuć dazvolić sabie ŭsio: choć zapisvać i śpiavać kavier-viersii Davida Tuchmanava. Usie hetyja «Dzieci hałaktyki» ŭsio adno prahučać tak, jak byccam ich napisaŭ Kulinkovič. Takoje adčuvańnie, što ŭsio šou ładziłasia vyklučna, kab syhraŭ hety hurt: možna doŭha apisvać, jak litaralna za try chviliny «na vušy» padniałasia ŭsia zała, jak šamaniŭ sa sceny, sahnuŭšysia «pytalnikam» Kulinkovič, ale

kali na samym uskrajku tancpoła my zaŭvažyli mužčynu ŭ aficyjnym kaściumie, z załačonaj asadkaj u kišeni i ahromnistym čyrvona-zialonym značakam na łackanie, jaki, uskidvajučy ŭvierch ruki, śpiavaŭ «I tak možna žyć» – stała zrazumieła, chto tut sapraŭdnyja rok-karali.

Adrazu ž

paśla vystupleńnia «Niejra Dziubiel» na scenu vyjšła Kasia Kamockaja i pad hitarny akampaniemient Pamidorava, praśpiavała pieśniu «Maja kraina», u pamiać Taćciany Sapač. U kancy pieśni zała prakryčała «Žyvie Biełaruś».

• 0
• 0
• 0
• 0
• 0
• 0
• 0
• 0