Mytnaja pošlina na ŭvoz lehkavych aŭtamabilaŭ dla fizičnych asob Biełarusi ŭzraście z 1 lipienia 2011 hoda bolš jak u 4 razy. Ab hetym paviedamili ŭ Dziaržaŭnym mytnym kamitecie.
Staŭka mytnych pošlin, padatkaŭ z 1 lipienia 2011 hoda na aŭtamabili da 3 hadoŭ z abjomam ruchavika 1400 kub.sm koštam 8 tys. jeŭra składzie 54 pracenty ad mytnaha koštu, ale nie mienš jak 2,5 jeŭra za kub.sm. Ciapier dziejučaja mytnaja staŭka na novyja aŭtamabili składaje 0,6 jeŭra/kub.sm.
Takim čynam, ahulnaja suma mytnaj pošliny na aŭtamabili da 3 hadoŭ pavialičycca paśla 1 lipienia 2011 hoda z 840 jeŭra da 4320 jeŭra (ad koštu) abo da 3500 jeŭra (ad abjomu).
Što datyčycca patrymanych aŭtamabilaŭ ad 3 da 5 hadoŭ z abjomam ruchavika 2000 kub.sm, to tut staŭka pavialičycca z 0,4 jeŭra da 2,7 jeŭra. Ahulnaja suma pošliny ŭzraście z 800 jeŭra da 5400 jeŭra.
Na aficyjnych sajtach Dziaržaŭnaha mytnaha kamiteta Biełarusi, a taksama Kamisii Mytnaha sajuza možna bolš padrabiazna aznajomicca ź dziejučymi staŭkami mytnych pošlin, padatkaŭ na lehkavyja aŭtamabili dla asabistaha karystańnia, jakija pieramiaščajucca praz mytnuju hranicu lubym sposabam, da 1 lipienia 2011 hoda, a taksama sa staŭkami mytnych pošlin i padatkaŭ, jakija buduć dziejničać paśla hetaha terminu.
Jak paviedamlałasia, namieśnik staršyni Dziaržaŭnaha mytnaha kamiteta Biełarusi Siarhiej Barysiuk na pasiadžeńni Pastajannaj kamisii Pałaty pradstaŭnikoŭ pa mižnarodnych spravach i suviaziach z SND 24 lutaha paviedamiŭ, što mytnyja pošliny na ŭvoz aŭtamabilaŭ dla fizičnych asob u Biełarusi z 1 lipienia 2011 hoda ŭźnimucca da ŭzroŭniu pošlin u krainach Mytnaha sajuza.
Pradstaŭlajučy na pasiadžeńni kamisii zakonaprajekt ab ratyfikacyi pahadnieńnia ab paradku pieramiaščeńnia fizičnymi asobami tavaraŭ dla asabistaha karystańnia praz hranicu MS, Siarhiej Barysiuk adznačyŭ, što hety dakumient, u pryvatnaści, vyznačaje staŭki mytnych pošlin na transpartnyja srodki, jakija ŭvoziacca. Heta pahadnieńnie časova prymianiałasia na terytoryi MS z daty padpisańnia. Adnačasova byŭ padpisany pratakoł časovych vyklučeńniaŭ, jakim pradoŭžana dziejańnie nacyjanalnaha zakanadaŭstva adnosna ŭvozu transpartnych srodkaŭ na terytoryju Biełarusi da 1 lipienia 2011 hoda. Z hetaha času dziejańnie pratakoła ab časovych vyklučeńniach zavieršycca. A heta značyć, što adnosna ŭvozimych lehkavych aŭtamabilaŭ buduć dziejničać adzinyja dla ŭsich krain MS staŭki mytnych pošlin i padatki.
Za asnovu takich pošlin i padatkaŭ byli pryniaty dziejučyja ciapier u Rasii mytnyja pošliny i padatki. Na dumku ekśpiertaŭ, jany ŭ čatyry i bolš razoŭ pierasiahajuć staŭki mytnych pošlin na ŭvoz aŭtamabilaŭ, dziejučyja ciapier u Biełarusi.
Pahadnieńnie źmiaščaje pierachodnyja pałažeńni, pa jakich aŭtamabili, uviezienyja ŭ Biełaruś i Kazachstan paśla 1 studzienia 2010 hoda pa staŭkach, što adroźnivajucca ad rasijskich abo ad ustanoŭlenych adzinym mytnym taryfam, pry prodažy ŭ Rasii padlahajuć abkładańniu mytnymi płaciažami ŭ pamiery roźnicy niedapłačanych płaciažoŭ. Heta abmiežavańnie budzie dziejničać da 1 studzienia 2013 hoda.-0-
Kamientary