Michaiłu Harbačovu spoŭniłasia 80 hadoŭ

U dzień svajho 80-hodździa pieršy prezident SSSR Michaił Harbačoŭ znoŭ raskrytykavaŭ prezidenta i premjera. Raniej jon abvinavaciŭ kiroŭny tandem u manapalizacyi ŭłady i simulacyi demakratyi, ciapier zajaviŭ ab prafanacyi madernizacyi i parušeńni hramadzianskich pravoŭ i svabodaŭ.

Napiaredadni svajho 80-hodździa pieršy i adziny prezident SSSR Michaił Harbačoŭ daŭ niekalki intervju, u jakich znoŭ raskrytykavaŭ kirujučy tandem.

«Apošnim časam davodzicca nazirać nastup na pravy i svabody rasiejcaŭ, — panarakaŭ Harbačoŭ u intervju «Interfaksu», nie ŭdakładniajučy, jakija mienavita epizody ŭščamleńnia hramadzianskich svabod źviarnuli na siabie jaho ŭvahu. — Heta niedapuščalna. Ułada pavinna harantavać hramadzianam ich pravy i dumać pra toje, jak paŭnavartasna harantavać biaśpieku. Na žal, tut pakul my čujem šmat razmovaŭ, ale kankretnych spraŭ jaŭna niedastatkova «.

Padobnyja prablemy jość i ŭ ekanamičnaj śfiery, ličyć Harbačoŭ.

«U nas usio bolš aktyŭna kažuć pra nieabchodnaść madernizacyi, ale, znoŭ ža, kankretnych spraŭ pakul vielmi mała. I heta mianie taksama niepakoić»,

«Šmat čaho nie chapaje, a toje, što jość, pastajanna daražeje — pasłuhi ŽKH, leki, pradukty charčavańnia, tavary dla dziaciej dy inšaje. Ciapierašniuju situacyju ŭ krainie ja aceńvaju jak biespakojnuju, što šmat u čym źviazana z sacyjalna-bytavymi prablemami», — pieraściaroh Harbačoŭ.

Jon čakaje stanoŭčych źmienaŭ ad budučych vybaraŭ u Dziarždumu, «ale tolki pry ŭmovie, što jany projduć sumlenna, a ŭsie sproby skazić ich vyniki buduć pieršapačatkova žorstka spyniacca. Narod sam raźbiarecca, kaho vybrać, chto, na jaho dumku, znachodziačysia va ŭładzie, moža vyrašać jaho prablemy».

Michaił Harbačoŭ niadaŭna pryznaŭsia, što i sam vynošvaŭ płany stvareńnia novaj partyi, adnak jaho ideja nie atrymała padtrymki ŭ administracyi prezidenta. Pra heta jon raspavioŭ u intervju anhielskamu telekanału Sky News.

Na minułym tydni Harbačoŭ byŭ kudy bolš rezki ŭ acency adnosiny kirujučaha tandemu da majučych adbycca ŭ 2012 hodzie vybarach prezidenta. «Mnie heta nie padabajecca. Nu, mnie nie padabajecca, jak jany pavodziać siabie «, — skazaŭ Harbačoŭ u adkaz na pytańnie, što jon dumaje ab płanach prezidenta i premjera pryniać rašeńnie ab vyłučeńni na vybary pa ŭzhadnieńni adzin z adnym. «Heta nie sprava Pucina, heta sprava tych, chto budzie abirać. Ja dumaju, što heta niaścipła, kali adkazvaje Uładzimir Uładzimiravič kamuści, što my siadziem ź Dźmitryjem Anatoljevičam i damovimsia, kamu iści ŭ prezidenty. Heta ŭžo nievierahodnaje zaznajstva», — zajaviŭ tady Harbačoŭ.

Pieršy prezident SSSR taksama abvinavaciŭ

tandem ŭ simulacyi demakratyčnych pracesaŭ i manapalizacyi ŭłady. «U nas jość parłamient, jość sudy, jość prezident i premjer, ale viedajecie — bolš imitacyi, a efiektyŭnaj pracy niama, asabliva sudoŭ i parłamienta», — skazaŭ jon.

Tandem nieefiektyŭny, miarkuje Harbačoŭ: «Manapolija zahnivaje, nie daje raźvivacca demakratyčnym pracesam».

Kiroŭnaja partyja nahadvaje jamu KPSS, što ŭ vusnach Harbačova naŭrad ci možna ličyć kamplimientam: «Vielmi škada, što sučasnyja kiraŭniki nie vielmi sučasnyja».

Jak paviedamili ŭ Fondzie Harbačova, prezident SSSR źbirajecca adznačyć svoj 80-y dzień naradžeńnia ŭ kole siamji. Ci pryjeduć raskrytykavanyja im prezident i premjer pavinšavać jubilara, nie paviedamlajecca. Zhadak pra nakiravanych Harbačovu vinšavalnych telehramach na aficyjnych sajtach Dźmitryja Miadźviedzieva i Uładzimira Pucina ranicaj 2 sakavika jašče nie było.

• 0
• 0
• 0
• 0
• 0
• 0
• 0
• 0