Sapraŭdnuju isteryju ŭ horadzie ŭčyniła siońnia padčas vizitu Alaksandra Milinkieviča ŭ Lidu miascovaja ŭłada. Dajšło navat da taho, što «nieviadomymi» była hruntoŭna razmalavanaja mašyna, jakoj pryjechaŭ lider abjadnanych demakratyčnych sił. U aŭtarstvie sumniavacca nie davodzicca, bo aŭtohrafy byli zroblenyja čyrvona-zialonaj farbaj.
U Lidzie Alaksandr Milinkievič praciahnuŭ palityčnuju kampaniju «miascovyja vybary». Jon pravioŭ naradu z pradstaŭnikami palityčnych partyj i patencyjnymi kandydatami ŭ deputaty miascovych savietaŭ. Akramia vybarčaj tematyki była abmierkavanaja padrychtoŭka łakalnych lidskich akcyj «Za Svabodu».
Uvieś čas znachodžańnia Alaksandra Milinkieviča ŭ Lidzie za im sačyła milicyja, ludzi ŭ cyvilnym, na jakich taksama pracavała kamiera i žurnalisty lidskaha TB. «Hledačy» pavodzili siabie vielmi nervova, časam navat isteryčna. Dajšło da taho, što «nieviadomyja» razmalavali mašynu, jakoj pryjechaŭ Alaksandr Milinkievič. Čyrvona-zialonymi pisiahami byŭ zafarbavany amal kožny kvadratny santymietr aŭtamabila. Mašyna stajała ŭ atačeńni aŭtamabilaŭ z taniravanymi šybami i ludziej u cyvilnym. Naturalna, što złačyncy nie byli zatrymanyja.
Ale razmalavanuju mašynu aktyŭna zdymała kamiera lidskaha TB. Napeŭna dla karcinki, kab paśla adspravazdačycca pierad zakazčykami: voś, maŭlaŭ, jak lidčuki sustrakajuć apazicyju.
Paśla Lidy Alaksandr Milinkievič nakiravaŭsia ŭ Słonim.