Aficyjny biełaruski lider užo pavinšavaŭ Uha Čavesa ź pieramohaj na prezydenckich vybarach. Chacia vyniki pakul što — papiarednija.
Hetak sama paśpiašalisia dasłać u Karakas vinšavańnie z Tehieranu. Siabry!
Radaść aficyjnaha Miensku možna zrazumieć. Takija plany! Pakłali voka na naftavyja radoviščy ŭ basejnie Arynoka, rychtujemsia zavalić kalijem i traktarami. Dyj uvohule — stratehičny chaŭrus. A pieramoh by Čavesaŭ kankurent — usie zadumy mahli b lasnucca.
Časta pravodziać paralel miž biełaruskim i venesuelskim kiraŭnikami: maŭlaŭ, u abodvuch kańki — papulizm dy aŭtarytaryzm.
Ale Čavesu jašče daloka da biełaruskaj madeli, jakuju jon abiacaŭ uziać za ŭzor.
U Venesuele papiaredni lik elektaralnaha spabornictva — trochi bolej za 60% u dziejnaha prezydenta i pad 40% u jahonaha kankurenta.
Jašče nia toj pakazčyk, kab šyrokim žestam daryć adsotki supiernikam!
Kali ž surjozna, to vynik całkam čakany.
Tamtejšaja apazycyja taksama nie abyšłasia biez zajaŭ pra padtasoŭki. Ale možna śćviardžać, što ŭ lubym razie nie jany schilili šalu vahaŭ na Čavesaŭ bok. Bo prykładna takuju praporcyju sympatyj pakazvali i apytańni hramadzkaje dumki.
Heta śviedčyć, pa-pieršaje, pra realnuju baraćbu, a pa-druhoje, pra sapraŭdy niezaležnuju sacyjalohiju.
Zvyš taho, u krainie dziejničajuć pryvatnyja telekanały i davoli mocnaja niezaležnaja presa.
Ci voś taki štrych: za tydzień da vybaraŭ apazycyja vyvieła na vulicy Karakasu paŭtara miljony čałaviek.
Bačycie, i heta nie dapamahło!
Na takim tle plany apanentaŭ biełaruskaha režymu zładzić rymejk płoščy Kalinoŭskaha ci až cełuju haračuju viasnu vyhladajuć, tak by mović, nia nadta hruntoŭnymi.
Kažu nia dziela taho, kab lišni raz kinuć kamień u apazycyju, jakuju nia beścić tolki łajdak.
Prosta navat na tle venesuelskich realijaŭ vyrazna bačna, što publičnaja palityka ŭ Biełarusi zabita, źniščana jak źjava. I palityki jak klasa, ličy, źlikvidavanyja. Tak niekali Stalin źlikvidavaŭ kułakoŭ.
Darečy, mienavita vypalenaje balšavizmam hramadzstva i stała najspryjalniejšaj hlebaj dla biełaruskaje madeli. Toje demakratyčnaje, što prarasło na pačatku 1990-ch, vytaptać było niaciažka.
Ulubioncu biednaty Čavesu ŭ hetym sensie ciažej: mocny supraciŭ ładzić klasa ŭłaśnikaŭ, jakaja vałodaje ŭ tym liku i surjoznaj medyjnaj zbrojaj.
Ich tak adrazu nia zvališ. Čavesu, jaki tolki maryć pra "revalucyjny sacyjalizm", jašče vučycca i vučycca ŭ svaich kumiraŭ!
