U niadzielu 3 śniežnia 2006 h. Apostalski Administratar Mienska-Mahiloŭskaj archidyjacezii biskup Antoni Dziamjanka ździejśniŭ uračystuju rekansekracyju kaściołu Najśviaciejšaj Trojcy ŭ Radaškovičach, dzie niekali byŭ achryščany Janka Kupała.
Upieršyniu ŭ histaryčnych dakumientach Radaškovičy zhadvajucca pad 1447 h., kali tut byŭ fundavany kaścioł pad tytułam Najśviaciejšaj Trojcy. U 1740 h. u miastečku adbyłasia kansekracyja novaha draŭlanaha kaścioła pad tytułami Najśviaciejšaj Trojcy i sv. pieršamučanika Stefana. Heta była vieličnaja baročnaja śviatynia, nad jakoju ŭznosiłasia až 6 viežaŭ, a interjer upryhožvali 7 bahata azdoblenych ałtaroŭ. Pry kaściole dziejničali škoła i špital, a taksama byli zasnavanyja 3 bractvy.
Na žal, taja cudoŭnaja śviatynia zhareła ŭ pažary, i ŭ 1855 h. na srodki parafijanaŭ pačałosia budaŭnictva novaha muravanaha kaścioła ŭ styli poźniaha kłasicyzmu. Praz čatyry hady budaŭnictva zaviaršyłasia, i 3 vieraśnia 1860 h. kaścioł byŭ kansekravany pad histaryčnym tytułam Najśviaciejšaj Trojcy. Mienavita ŭ hetaj śviatyni byŭ achryščany narodny piaśniar Janka Kupała.
U 1946 h. kaścioł byŭ začynieny i prystasavany pad cech zavoda «Biełaruskaja kieramika». Niahledziačy na toje, što budynak byŭ abjaŭleny pomnikam architektury, jon pastupova pryjšoŭ u avaryjny stan. U 1990 h. kaścioł byŭ viernuty katalikam, adrestaŭravany, a ŭ hałoŭnym ałtary byŭ źmieščany abraz Najśviaciejšaj Trojcy. Paśla viartańnia śviatyni ŭ joj pracavali ks. prałat Edmund Daŭhiłovič-Navicki, sv. pamiaci ks. Zyhmunt Abartuch, ks. Piotr Piatraha i, da niadaŭniaha času, ks. Alaksandr Tarasievič. Siońnia probaščam u Radaškovičach źjaŭlajecca ks. Valancin Stankievič.
Radaść rekansekracyi śviatyni dapoŭniłasia radaściu sakramentu kanfirmacyi, jaki padčas uračystaj śviatoj Imšy pryniali kala 100 radaškovickich parafijanaŭ. Biskup Antoni nahadaŭ im, a taksama ŭsim prysutnym, što jany, u sakramencie chrostu uklučanyja ŭ supolnaść naroda Božaha, praz sakrament kanfirmacyi paćvierdzili svajo imknieńnie da śviataści i pryniali na siabie adkaznaść kłopatu pra patreby Kaścioła. U svajoj hamilii Apostalski Administratar adznačyŭ taksama, što Advent, jaki raspačaŭsia ŭ minułuju niadzielu, dla kožnaha viernika źjaŭlajecca śviatym časam, asabliva spryjalnym dla naviadzieńnia mastoŭ i ŭmacavańnia suviazi z Boham.
Na zakančeńnie liturhii, kamientar da jakoj byŭ padrychtavany vice-rektaram Miždyjacezijalnaj vyšejšaj duchoŭnaj sieminaryi ŭ Pinsku ksiandzom doktaram Janam Kremisam, biskup Antoni pažadaŭ viernikam i ich pastyru, kab hetaja śviatynia ŭžo nikoli bolš nie vykarystoŭvałasia dla inšych metaŭ, a zaŭsiody zastavałasia śviatym miescam i domam Božym. Na ŭračystaści prysutničaŭ taksama ks. Alaksandr Tarasievič, niadaŭna pryznačany probaščam u Barysaŭ, dzie jon raspačynaje budaŭnictva novaha kaścioła na druhim bierazie Biareziny.
Fota Aleha Cižoŭki
