Amal dva z pałovaj hady ciahnułasia sprava čatyroch połackich milicyjantaŭ i narešcie skončyłasia terminami pakarańnia: traim pa piać hadoŭ pazbaŭleńnia voli, a adnamu – čatyry.
Sud u Hłybokim raźhledzieŭ usie akaličnaści, zasłuchaŭ śviedak, praanalizavaŭ vyniki šmatlikich ekspertyzaŭ i pryjšoŭ da vysnovy, što 27-hadovy mužčyna pamior ŭ milicejskim pastarunku ŭ vyniku źbićcia asobami z pahonami. Sudmedeksperty paćvierdzili – hałoŭnaj pryčynaj byŭ mocny ŭdar u soniečnaje splacieńnie.
Śćviardžeńni milicyjantaŭ pra alkaholnaje atručvańnie, ciepłavy ŭdar, albo niečakanuju chvarobu abvierhli. Adnak asobu milicyjanta, jaki nanios śmiarotny ŭdar, vyśvietlić nie ŭdałosia, tamu svaje terminy ŭdzielniki raspravy atrymali, u pieršuju čarhu, za pieravyšeńnie słužbovych paŭnamoctvaŭ. Aperatyŭniki z parušeńniami skłali pratakoł, nie nakiravali padazronaha ŭ dziažurnuju častku ci izalatar časovaha ŭtrymańnia.
Zamiest hetaha pryvieźli dvuch zatrymanych bratoŭ, jakija śviatkavali dzień narodzinaŭ na bierazie raki Pałaty, u budynak adździełu ŭnutranych spravaŭ, dzie raźviali ich pa roznych pamiaškańniach i pačali patrabavać pryznańniaŭ u ździajśnieńni kradziažu. Paźniej da svaich supracoŭnikaŭ padklučyŭsia taksama namieśnik kiraŭnika kryminalnaha vyšuku. Pa słovach milicyjantaŭ, zatrymany imianińnik kidaŭsia na ich, brydka łajaŭsia, tamu na jaho načapili „branzalety», paśla čaho małady čałaviek «niečakana» zhubiŭ prytomnaść. Kali pryjechała chutkaja dapamoha, jon užo skanaŭ.
Maci zahinuŭšaha ŭ svoj dzień narodzinaŭ pałačanina haradzki adzieł unutranych spravaŭ vypłacić 7 młn. rubloŭ kampensacyi za maralnuju škodu. Krychu bolej 30 srebnych centaŭ za kožny dzień karotkaha žyćcia čałavieka, jakoha ŭžo nia viernieš.
