Siońnia ES moža pašyryć śpis biełaruskich čynoŭnikaŭ, jakim zabaronieny ŭjezd u Jeŭropu
Siońnia na pasiadžeńni ŭ Brusieli Rada ministraŭ ES razhledzić pytańnie ab pašyreńni śpisa biełaruskich čynoŭnikaŭ, jakim zabaronieny ŭjezd na terytoryju Jeŭrasajuza.
Śpis sa 157 biełaruskich čynoŭnikaŭ, adkaznych za parušeńni pravoŭ čałavieka padčas prezidenckaj kampanii, byŭ zaćvierdžany 31 studzienia. Raniej paviedamlałasia, što jaho mohuć papoŭnić jašče 19 proźviščaŭ.
Jak zajaviła 18 sakavika viarchoŭny pradstaŭnik ES pa zamiežnych spravach i palitycy biaśpieki Ketryn Eštan, «u adpaviednaści z zaklučeńniami Savieta pa zamiežnych spravach 31 studzienia, śpis asob,
na jakich nakładzienyja abmiežavalnyja miery, zastajecca adkrytym i ŭvieś čas pierahladajecca z ulikam dalejšaha raźvićcia situacyi».
U pryvatnaści, pavodle słoŭ Eštan, ES maje namier praciahvać uklučać u śpis sudździaŭ i prakuroraŭ, jakija majuć niepasrednaje dačynieńnie da vyniasieńnia pryhavoraŭ pa palityčnych matyvach i represij suprać hramadzianskaj supolnaści. «U zaležnaści ad raźvićcia situacyi ŭ Biełarusi ES hatovy razhledzieć novyja adrasnyja miery va ŭsich abłaściach supracoŭnictva», — padkreśliła jana.
Viarchoŭny pradstaŭnik asudziła «praciahłaje zatrymańnie, sudy i vyniasieńnie sudovych pryhavoraŭ pa palityčnych matyvach pradstaŭnikam hramadzianskaj supolnaści i lidaram apazicyi», i vykazała hłybokuju zaniepakojenaść «zajavami ab katavańniach i inšych formach žorstkaha abychodžańnia, zapałochvańnia i parušeńniami padčas sudovych pracesaŭ» u Biełarusi.
Eštan zaklikała biełaruskija ŭłady paŭnacenna supracoŭničać z Upraŭleńniem viarchoŭnaha kamisara AAN pa pravach čałavieka i Savietam AAN pa pravach čałavieka, a taksama «admianić svajo rašeńnie ab niepraciahu mandata ofisa ABSIE ŭ Minsku».
Viarchoŭny pradstaŭnik nahadała pra patrabavańnie ES da biełaruskich uładaŭ «ab nieadkładnym i biezumoŭnym vyzvaleńni i reabilitacyi ŭsich, chto byŭ zatrymany pa palityčnych matyvach».
Kamientary