Homielskija ŭłady zabaranili pravodzić pikiety salidarnaści z palitźniavolenymi
Čatyry aktyvisty hramadzianskaj kampanii «Havary praŭdu» atrymali admovu z Homielskaha harvykankama na zajaŭki ab praviadzieńni pikietaŭ salidarnaści z palitźniavolenymi. Masavyja mierapryjemstvy byli zapłanavanyja na 25 sakavika — Dzień Voli.
U adkazie harvykankama havorycca, što pikiety zabaronieny, bo «źmiest zajavaŭ nie adpaviadaje patrabavańniam punktaŭ 1,2 rašeńnia harvykankama «Ab masavych mierapryjemstvach u horadzie Homieli».
Varta zaŭvažyć, što, zhodna punktu 1 dadzienaha rašeńnia, masavyja mierapryjemstvy, arhanizatarami jakich vystupajuć palityčnyja partyi, prafsajuzy i inšyja arhanizacyi možna pravodzić u amal paŭmiljonnym horadzie tolki na adnoj placoŭcy — kala DK «Vipra» tavarystva hłuchich. Aktyvisty hramadzianskaj kampanii «Havary praŭdu» chacieli pravieści pikiety ŭ šmatludnych miescach, a nie kala DK «Vipra» — placoŭcy ŭ spalnym rajonie, dzie tradycyjna vyhulvajuć sabak.
U punkcie 2 rašeńnia harvykankama havorycca pra toje, što kali arhanizacyja masavaha mierapryjemstva prachodzić biez udziełu orhanaŭ dziaržaŭnaj ułady, arhanizatary pavinny padpisać damovy z kamunalnymi słužbami, milicyjaj i chutkaj dapamohaj, i prykłaści hetyja damovy da rašeńnia.
Aktyvisty kampanii ličać, što dadzienaje rašeńnie harvykankama, jak i zabarona ŭładaŭ pravodzić pikiety, nie adpaviadajuć Kanstytucyi i parušajuć pravy hramadzianaŭ na mirnyja schody. Varta zaŭvažyć, što homielskija ŭłady z 2004 hoda nie davali dazvołu na praviadzieńnie ŭ horadzie pikietaŭ i mitynhaŭ, zajaŭki na jakija padavali pradstaŭniki palityčnych partyj i NDA.
Kamientary