Viernikam «Novaha žyćcia» nie davali prajechać na vielikodnuju słužbu
U niadzielu, 24 krasavika, supracoŭniki Dziaržaŭtainśpiekcyi Frunzienskaha RUUS Minska dvojčy spyniali pryvatnyja aŭtobusy, jakija vieźli viernikaŭ na vielikodnyja nabaženstvy ŭ pratestanckuju carkvu «Novaje žyćcio».
Vadzicielam aŭtobusaŭ zajavili, što jany niepravamierna vykarystoŭvajuć hetyja transpartnyja srodki dla pieravozki ludziej. Pra heta paviedamiŭ juryst carkvy Siarhiej Łukanin.
Śviatočnyja nabaženstvy byli zapłanavany na 09:00 i 12:00. Užo niekalki hadoŭ ad stancyi mietro «Kamiennaja Horka» viernikaŭ padvozić da carkvy pryvatny aŭtobus adnaho ź viernikaŭ. «Kiroŭca aŭtobusa nieadnarazova prachodziŭ techahlad i instruktaž ŭ DAI Frunzienskaha RUUS. Pakolki pieravozki viernikaŭ na nabaženstvy źjaŭlajucca dabračynnymi i nie nosiać kamiercyjny charaktar, supracoŭniki DAI tłumačyli, što dadatkovyja dakumienty na praviadzieńnie takich pajezdak nie patrabujucca», — pryvodzić BiełaPAN słovy Siarhieja Łukanina.
Niahledziačy na heta, kala 09:00 rabotniki DAI spynili aŭtobus z prychadžanami la ŭjezdu na vulicu Jankoŭskaha — za paŭtara kiłamietry ad carkvy. «Kapitan DAI, jaki nie pradstaviŭsia, zapatrabavaŭ ad kiroŭcy pradjavić dakumienty ab jaho rehistracyi ŭ padatkovaj inśpiekcyi ŭ jakaści indyvidualnaha pradprymalnika i dazvoł na pieravozki pasažyraŭ, što supiarečyć raniejšym patrabavańniam, jakija pradjaŭlalisia da kiroŭcy aŭtobusa supracoŭnikami taho ž DAI», — raspavioŭ juryst «Novaha žyćcia». Kala 50 viernikaŭ vysadzili z aŭtobusa, da carkvy jany dabralisia pieššu.
Pakolki kiroŭcu papiaredzili nakont niepravamiernaści vykarystańnia dadzienaha aŭtobusa dla pasažyrskich pieravozak, na druhoje nabaženstva viernikaŭ padvoziŭ inšy aŭtobus, jaki naležyć adnoj ź minskich pratestanckich cerkvaŭ. «Adnak i hety aŭtobus byŭ spynieny supracoŭnikami rajonnaha DAI la ŭjezdu na vulicu Jankoŭskaha. Kiroŭcu byli pradjaŭleny anałahičnyja pretenzii, viernikaŭ vysadzili, i jany taksama vymušany byli pieššu dabiracca da carkvy», — adznačyŭ Siarhiej Łukanin.
Na jaho dumku, dziejańni supracoŭnikaŭ DAI źjaŭlajucca «spłanavanaj akcyjaj, jakaja pieraškadžaje praviadzieńniu ŭ carkvie śviatočnych vielikodnych nabaženstvaŭ». «Adnak im nie ŭdałosia sarvać praviadzieńnie nabaženstvaŭ i azmročyć śviatočny nastroj viernikaŭ», — dadaŭ juryst carkvy.
Nahadajem, što staličnyja ŭłady apošnija piać hadoŭ pradprymajuć sproby vysielić carkvu z budynka pa vulicy Kavalova, 72.
Kamientary