U Babrujsku sudziać junakoŭ, jakija padpalili budynak KDB anłajn z zały suda 19

Paškodžanyja dźviery budynka KDB acanili ŭ miljard rubloŭ. Abvinavačanyja pryznali vinu, ale nie pahadžajucca z pamieram materyjalnaj škody.

Śviedka Ibrahimaŭ, jaki tak i nie źjaviŭsia na pracesie, raskazaŭ śledstvu, što, a 23.30 16 kastryčnika čakaŭ transpart na vulicy Puškina ŭ Babrujsku i pabačyŭ troch čałaviek. Potym u rukach adnaho ź ich šuhanuła połymia i ŭ bok uvachodnych dźviarej budynka babrujskaha ŭpraŭleńnia KDB niešta palacieła. Potym pačuŭsia huk bitaha škła, spałachnuŭ vialiki ahoń. Inšy junak taksama kinuŭ niešta zapalenaje. A potym usie troje pabiehli ŭ dvary.

Hetyja troje — Jaŭhien Vaśkovič, Arciom Prakapienka i Pavieł Syramłotaŭ — zatrymanyja. Ich abvinavačvajuć pa č.2 art. 339 KK — «Asabliva złosnaje chulihanstva». Im pahražaje ad 7 da 12 hadoŭ turemnaha źniavoleńnia.

Sudzić chłopcaŭ sudździa Pavieł Karcinin.

Adkazvajučy na pytańnie śledčych ab mecie akcyi, adzin z abvinavačanych, Jaŭhien Vaśkovič, adkazaŭ karotka — kab zapałochać KDB i vykazać svoj pratest.

Paškodžanyja dźviery pazoŭnik acaniŭ u miljard rubloŭ. Pieršapačatkova materyjalnyja straty budynka babrujskaha KDB aceńvalisia ŭ 85 tysiač rubloŭ, ale na sudovym pasiedžańni 5 maja fihuravała ŭžo ličba 1 miljard.

Abvinavačanyja pryznali vinu, ale nie pahadžajucca z pamieram materyjalnaj škody.

Svaje dziejańni jany paŭtaryli ŭ časie śledčaha ekśpierymientu, zafiksavanaha na videa.

Na videa Vaśkovič padrabiazna raspaviadaje ab etapach vyrabu «kaktejla Mołatava». Atrymanaje rečyva raźlivali ŭ butelki z-pad «čarniła», rylcy jakich zatykali tkaninaj. Raźliŭ adbyvaŭsia na 5-m bastyjonie Babrujskaj krepaści.

Sudździa začytaŭ pratakoł jaŭki z pavinnaj Syramłotava.

Było taksama paviedamlena, što na fłeš-dyskach, vyniatych u Vaśkoviča, sustrakałasia słova «padpał», a taksama tekstavy dakumient ab pryncypach partyzanskaj baraćby i vyrabie vybuchoŭki.

Vaśkovič skazaŭ, što hetyja słovy možna było znajści dzie zaŭhodna choć by ŭ ŚMI, a dakumientaŭ ab partyzanskaj baraćbie na jaho technicy nie było.

Vaśkovič pramaŭlaŭ pa-biełarusku. U sud jon źjaviŭsia ŭ sakołcy z nadpisam «Žyvie Biełaruś!» i bieł-čyrvona-biełym ściaham. Vaśkovič, jak vyhladaje, pierakanany praciŭnik isnujučaj dyktatury. Jon maje nacyjanalnyja i anarchisckija pohlady adnačasova.

Pra dvuch inšych fihurantaŭ spravy viadoma niašmat. Arciom Prakapienka sam z Hrodna. U Babrujsku jon vučyŭsia. Pavał Syramałotaŭ pracavaŭ stalarom. Prakapienka adnosiŭ siabie da anarchistaŭ. Syramłotaŭ nie naležaŭ ni da jakich arhanizacyj.

«Ja ŭžo padrychtavaŭsia atrymać jak minimum hod dziesiać», — napisaŭ Jaŭhien Vaśkovič u svaim poŭnym spakoju liście ŭ «Našu Nivu».

Napady na budynki śpiecsłužbaŭ, zafiksavanyja ŭ 2010 hodzie, byli, badaj, pieršymi ad 1950-ch hadoŭ.

Jany mieli, chutčej, simvaličny charaktar, ale sam fakt ich adlustroŭvaje rost sacyjalnaj napružanaści ŭ hramadstvie.

* * *

18.15

U pracesie abjaŭleny pierapynak da 18 maja. Adnovicca sud a 10.30.

17.51

Prakapienka metaj akcyi nazvaŭ salidarnaść z anarchistami, jakich zatrymali ŭ Minsku pa fakcie sproby padpału ambasady Rasijskaj Fiederacyi.

17.30

Adkazvajučy na pytańnie śledčych ab mecie akcyi padčas ekśpierymientu, Vaśkovič karotka adkazaŭ — zapałochać KDB i vykazać svoj pratest.

17.15

Za niekalki hadzin da padpału chłopcy znachodzilisia ŭ padjeździe doma, jaki mieściŭsia niepadalok. Tam jany padjeli i sčakali zručnaha času. Jak bačna na videa, Vaśkovič, Prakapienka i Syramłotaŭ vyrušyli da vulicy Puškina i zajšli za adzin z budynkaŭ dzie pakinuli ŭsie zaplečniki i niepatrebnyja rečy. Apranuli vopratku ciomnaha koleru i miedyčnyja maski kab zakryć tvary. Paśla rušyli da budynka KDB.

17.09

Na videa Vaśkovič padrabiazna raspaviadaje, jak vyrablać «kaktejl Mołatava». Jon zmoh jaho zrabić pry najaŭnaści ŭsich składnikaŭ za try hadziny za niekalki dzion da padpału.

17.04

Na videa demanstrujucca kadry śledčaha ekśpierymientu, jaki mieŭ na mecie adnavić chadu padziej, što adbylisia ŭ noč z 16 na 17 krasavika. Śledčy ekśpierymient pravodziŭsia 20 studzienia 2011 hoda, a 12 hadzinie. Na ekśpierymiencie prysutničała troje paniatych — žycharoŭ Babrujsku. Zdymki demanstrujuć miesca sustrečy chłopcaŭ u dzień padpału; miesca, dzie vyrablałasia vybuchoŭka — bastyjony Babrujskaj krepaści. Chada padziej, vyśvietlenaja padčas śledčaha ekśpierymientu, była nastupnaj: Vaśkovič z butelkaj haručaj sumiesi padbiahaje da hanka budynka KDB i spyniajecca za 3 mietry ad jaho i kamiery videanazirańnia. Kidaje butelku, ale taja nie dalataje i raźbivajecca na hanku.

U hety čas Prakapienka z druhoj butelkaj padbiahaje da ściany budynka KDB i kidaje «kaktejl» z metaj patrapić u vakno druhoha paviercha. Butelka, udaryŭšysia ab ścianu, raźbiłasia. Usie hetyja dziejańni Syramłotaŭ zdymaŭ na videa.

Paśla sproby padpału chłopcy raźbiehlisia, chavajučysia ŭ prylehłyh dvarach.

16.40

Praciahnutaje pasiedžańnie. Videa buduć demanstravać na zvyčajnym noŭtbuku.

16.30

Abjaŭleny pierapynak na 10 chvilin dla padrychtoŭki zały suda dla prahladu videamateryjałaŭ.

16.23

Prakapienka na pytańnie advakata ab stanie ścien pry praviadzieńni śledčaha ekśpierymienta adkazaŭ, što nijakich surjoznych paškodžańniaŭ budynka KDB nie zaŭvažyŭ, tolki niekalki miescaŭ sa śviežaj farbaj.

16.15

Sudździa čytaje pratakoł jaŭki z pavinnaj Syramłotava. Tam paviedamlajecca, što niedzie vosieńniu 2010 hoda jon sustreŭsia na vulicy z Vaśkovičam i Prakapienkam ź jakimi siabravaŭ užo niekalki hadoŭ. Pry razmovie ŭ ich uźnikła ideja «padureć». Atrymanaje rečyva raźlivałasia ŭ butelki z-pad tannaha vina, rylcy jakich zatykalisia tkaninaj. Na pytańni advakata Syramłotaŭ adkazaŭ, što jaho zatrymlivali niekalki čałaviek u maskach i niekalki, mahčyma, supracoŭnikaŭ KDB.

16.05

Sudździa Pavieł Karcinin pierapytaŭ u Vaśkoviča — ci heta toj fotaaparat, jaki znajšli 17 studzienia pry vobšuku ŭ jaho domie? Prakapienka skazaŭ, što paśla vyrabu «kaktejlu Mołatava» pieradaŭ jaho Vaśkoviču za čatyry dni da 16 krasavika.

15.53

Sudździa paviedamiŭ što na fłeš-dyskach vyniatych u Vaśkoviča sustrakalisia słovy «padpał», «podžoh», a taksama tečka z tekstavym dakumientam ab pryncypach partyzanskaj baraćby i vyrabie vybuchoŭki. Vaśkovič skazaŭ, što hetyja słovy možna było znajści dzie zaŭhodna choć by i ŭ ŚMI, a dakumientaŭ ab partyzanskaj baraćbie na jaho technicy nie było. Nijakaha dačynieńnia da spravy jany nie majuć.

15.40

Sprava ab padpale babrujskaha budynka KDB naličvaje bolš za 9 tamoŭ. Śviedka Ibrahimaŭ, jaki nie źjaviŭsia ŭ zale suda, papiarednie paviedamiŭ śledstvu što ŭ 23.30 16 kastryčnika čakaŭ transpart na vulicy Puškina ŭ Babrujsku, niedzie praz 50 chvilin ubačyŭ troch čałaviek. Chłopcy stajali blizka adzin da adnaho na adlehłaści da jaho mietraŭ 40–50. Potym Ibrahimaŭ pabačyŭ płamia ŭ rukach adnaho čałavieka i pabačyŭ, jak u bok uvachodnych dźviarej budynka KDB niešta palacieła. Potym pačuŭ huk bitaha škła i ahoń. Z druhohaha boku Ibrahimaŭ zaŭvažyŭ, jak inšy małady čałaviek taksama kinuŭ niešta zapalenaje, mahčyma, zapalnicu ŭ ścianu na ŭzroŭni druhoha paviercha. Potym pačuŭ huk jak šklanaja butelka adskočyła ad ściany i raźbiłasia ab tratuar. Potym usie troje pabiehli ŭ dvor žyłoha doma. Usio adbyłosia vielmi chutka.

15.25

Prakapienka na pytańnie sudździ ab papiarednich pakazańniach zajaviŭ, što padčas śledstva na jaho akazvaŭsia psichałahičny cisk. Chłopiec patłumačyŭ što z-za cisku daznavacielaŭ padpisvaŭ usio, što jamu kazali. Na adnym ź pieršych padobnych mierapryjemstvaŭ admoviŭsia ad dačy lubych pakazańniaŭ. Dakumientaŭ, jakija b heta paćviardžali, sudździa ŭ materyjałach spravy nie znajšoŭ.

Vaśkovič pramaŭlaje pa-biełarusku. Zajaviŭ, što vyrablaŭ «kaktejl Mołatava» ŭ siabie doma z Prakapienkam. Vaśkovič kaža, što raźlivaŭ haručuju vadkaść u butelki na «5-ym bastyjonie Babrujskaj krepaści».

15.10 Jaŭhien Vaśkovič znachodzicca ŭ kletcy zały suda ŭ sakołcy z nadpisam «Žyvie Biełaruś!» i bieł-čyrvona-biełym ściaham. Raspačaŭsia dopyt śviedak. Siarhiej Tarasik 1991 h.n., sałdat terminovaj słužby raskazaŭ, što viedaje Prakapienku ad 2007 h. Tarasik zajaviŭ, što Prakapienka raspavioŭ jamu ŭ Hrodna na Novy hod ab tym, što jon z kimści padpaliŭ budynak KDB.

14.56

Pačaŭsia sud. Pasiedžańnie było pieraniesienaje na hadzinu paźniej z-za spaźnieńnia advakata adnaho z padsudnych. Sudovaje pasiedžańnie abjaŭlena praciahnutym. Sudździa Pavieł Karcinin, na prośbu ab pytańni adnaho z słuchačoŭ u zale suda, vydaliŭ apošniaha z zały bieź nijakich tłumačeńniaŭ. Fota- i videazdymki zabaronienyja.

U Babrujsku ŭ 14.00 praciahnuŭsia sud nad abvinavačanymi ŭ padpale budynka miascovaha KDB. Paškodžanyja dźviery sud acaniŭ u miljard rubloŭ.

Jaŭhiena Vaśkoviča, Arcioma Prakapienku i Paŭła Syramłotava abvinavačvajuć u padpale budynka babrujskaha adździaleńnia KDB (č. 2 art. 339 KK — «Asabliva złosnaje chulihanstva»). Im pahražaje ad 7 da 12 hadoŭ turemnaha źniavoleńnia. Sudzić chłopcaŭ sudździa Pavieł Karcinin.

Na pieršym sudovym pasiedžańni prysutničali tolki svajaki abvinavačanych. Babrujskija pravaabaroncy i žurnalisty daviedalisia pra sud tolki pa skančeńni pasiedžańnia 5 maja ad maci Vaśkoviča Rušańni Ivanaŭny. Ź jaje słoŭ, na pieršym pasiedžańni byli dapytanyja śviedki.

Usie troje chłopcaŭ na pieršym sudovym pasiedžańni pryznali svaju vinu, ale nie zhadžajucca z pamieram naniesienaj materyjalnaj škody.

Pieršapačatkova materyjalnyja straty budynka babrujskaha KDB byli acenieny sudom u 85 tysiač rubloŭ, a na sudovym pasiedžańni 5 maja fihuravała ličba ŭžo bolš za 1 miljard. Jakim čynam źjaviłasia takaja summa, sud nie tłumačyŭ.

Jaŭhien Vaśkovič z Babrujsku. Jaho zatrymali 17 studzienia ŭ Mahilovie na nastupny dzień paśla ŭdziełu ŭ akcyi salidarnaści ź biełaruskimi palitviaźniami. U Mahiloŭskim dziaržaŭnym universytecie chłopiec zavočna vučycca na žurnalisckim adździaleńni fiłałahičnaha fakultetu. Jon pracuje ŭ niedziaržaŭnaj haziecie «Babrujski kurjer». Prychilnik stvaranaj partyi Biełaruskaja chryścijanskaha demakratyja. Udzielnik Płoščy-2010. Adsiadzieŭ 12 sutak u SIZA na Akreścina.

Pra jašče dvuch fihurantaŭ spravy viadoma niašmat. Arciom Prakapienka z Hrodna. U Babrujsku jon vučycca. Nie chavaje svajoj prychilnaści da anarchisckaha ruchu. Pavał Syramłotaŭ z Babrujsku. Siabram nivodnaha moładzievaha ruchu ci hrupoŭki siabie nie ličyć.

Nahadajem, što nieviadomyja asoby ŭ noč z 16 na 17 kastryčnika 2010 hoda ŭ Babrujsku zrabili napad na budynak KDB. Na hanak była kinutaja butelka z haručaj sumieśsiu, ahoń paškodziŭ dźviery.

Siarhiej Hudzilin, Babrujsk

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH