Padatkovaja inśpiekcyja Maskoŭskaha rajona pasprabavała apisać majomaść BCHK
Padatkovaja inśpiekcyja Maskoŭskaha rajona 24 maja pasprabavała apisać majomaść respublikanskaha pravaabarončaha hramadskaha abjadnańnia «Biełaruski Chielsinski kamitet». Pra heta BiełaPAN paviedamiŭ kiraŭnik jurydyčnaj kamisii BCHK Hary Pahaniajła.
Kanflikt pamiž padatkovaj inśpiekcyjaj i pravaabarončaj arhanizacyjaj ciahniecca ŭžo bolš jak piać hadoŭ. Padatkovaja inśpiekcyja vyłučyła pretenzii da BCHK za niapłatu padatkaŭ na srodki, atrymanyja ŭ jakaści humanitarnaj dapamohi pa prahramie TASIS. Letam 2004 hoda haspadarčy sud Minska źniaŭ z BCHK abvinavačańni va ŭchileńni ad płaty padatkaŭ pa srodkach, zadziejničanych u miežach prahramy TASIS, adnak hetaje rašeńnie apratestavaŭ namieśnik staršyni Vyšejšaha haspadarčaha suda Jaŭhien Śmirnoŭ. U śniežni 2004 hoda prezidyum Viarchoŭnaha suda zadavoliŭ jaho pratest i abaviazaŭ BCHK vypłacić padatki i štrafnyja sankcyi ŭ sumie, ekvivalentnaj prykładna 75.000 dołaraŭ ZŠA. 1 listapada 2006 hoda haspadarčy sud Minska pastanaviŭ kanfiskavać častku majomaści BCHK na 255 tysiač rubloŭ u lik vypłaty 160 młn. rubloŭ štrafu i padatkovych zapazyčanaściaŭ.
Miž tym, na dumku BCHK, hetyja hrošy nie abkładajucca padatkam.
«Nam čas ad času nahadvajuć ab niavypłačanaj sumie. My rehularna chodzim i ŭ prakuraturu, i ŭ padatkovuju inśpiekcyju, dzie śćviardžajem, što hrošy, atrymanyja ŭ miežach prahramy TASIS, nie abkładalisia padatkam. U toj čas kali my atrymlivali hrošy pa hetaj prahramie, Saviet ministraŭ nie pryvioŭ biełaruskaje zakanadaŭstva ŭ adpaviednaść z ukazam prezidenta, zhodna ź jakim humanitarnaja dapamoha, jakaja atrymlivajecca ŭ miežach prahramy TASIS, pavinna abkładacca padatkam. Tamu vinavatymi ŭ niaŭpłacie padatkaŭ my siabie nie ličym», — skazaŭ Pahaniajła.
Pavodle jaho słoŭ, usie rachunki arhanizacyi zabłakiravanyja, arhanizacyja ž nie maje nijakaj ułasnaści — usio abstalavańnie i majomaść jana aranduje. Tamu, jak zajaviŭ Pahaniajła, u adpaviednaści z zakonam apisać u BCHK niama čaho.
Kamientary