Fiaduta i Niaklajeŭ prapanujuć Łukašenku dyjałoh

Prynižanyja katavańniami ŭ «amierykancy» palitołah Fiaduta i eks-kandydat Niaklajeŭ prapanujuć uładzie dyjałoh u abmien na svabodu palitviaźniaŭ. Puškinist i palitołah ličyć, što va ŭmovach ekanamičnaha kryzisu ŭ Biełarusi sacyjalnaja revalucyja nie moža być alternatyvaj dyjałohu.

Pakul asudžany Uładzimir Niaklajeŭ i «rycary kruhłaha stała» pracujuć nad stvareńniem palityčnaj partyi, karty prablemaŭ Biełarusi i Kamiteta nacyjanalnaha vyratavańnia, Alaksandr Fiaduta prasoŭvaje ideju dyjałohu z Łukašenkam u svaim błohu ŭ Žyvym časopisie.

Na dumku Fiaduty, treba kryčać pra dyjałoh, «tamu što narodnyja masy buduć patrabavać dalary ŭ valutnych punktach, ale nijak nie svabody Statkieviču i Usu. Jak buduć jany patrabavać tannaj hrečki i myła, ale zusim nie pašyreńnia ŭłasnych vybarčych pravoŭ».

«Salidarnaść» zadała niekalki pytańniaŭ błohieru Fiadutu na temu dyjałohu.

— Prynižanyja katavańniami ŭ «amierykancy» chočuć sieści za stoł pieramovaŭ z tymi, chto ich arhanizavaŭ. Heta ŭsio roŭna, što achviaram pajści na dyjałoh z katami. Eks-kandydataŭ i ludziej ź ich kamand źniavažyli, a razam ź imi źniavažyli ŭsich, chto za ich hałasavaŭ. Ni na jotu nie vieru, što samym strašnym katavańniem dla Niaklajeva ŭ SIZA byŭ prahlad navahodniaha telezvarotu Łukašenki. I paśla taho, jak Vas stavili na raściažki, pazbavili na niekalki miesiacaŭ znosin z rodnymi, nie davali mahčymaści bačycca z advakatami, vy chočacie ab niečym damovicca z arhanizatarami hetaha publičnaha prynižeńnia?

— Adam Michnik siadzieŭ daŭžej za mianie i ciarpieŭ bolš za mianie (Adam Michnik — viadomy polski hramadski dziejač, adzin ź lidaraŭ ruchu «Salidarnaść» — red.). Ale mienavita jon vypakutavaŭ ideju «kruhłaha stała».

— Chrystos tryvaŭ i nam zahadaŭ. Ułasna, ja zdahadvajusia, što pryčyna, ź jakoj Niaklajeŭ prapanavaŭ dyjałoh z uładaj, — taja ž, što dazvoliła Labiedźku pavieryć Ramančuku.

— Prabačcie za hrubaść, ale z masonami zmahacca Vy nie sprabavali? Vy alternatyŭnyja prapanovy sfarmulujcie, a nie zdahadki vykazvajcie. Jakija prapanovy? Sumnievy Vašy ja baču, abhruntavanaść ich pryznaju. Ale alternatyŭnych prapanovaŭ nichto tak i nie sfarmulavaŭ.

— Pa-mojmu, hetyja alternatyŭnyja prapanovy pavinnyja sfarmulavać palitołahi, nie ličycie? Na žal, ja nie ź ich liku. I baraćba z masonami — nie maja funkcyja. Cikava, kaho vy adnosicie da masonskaj łožy ŭ Biełarusi?

— Mianie adnosiać da masonskaj łožy, da špijonskaj sietki, da «piataj kałony», da «zdradnikaŭ Biełarusi» i h.d. Mianie.

Z nahody alternatyŭnych prapanovaŭ ja z vami zhodny. Ja svaje sfarmulavaŭ. Mnie ciapier čakać sustrečnych abo viešacca, nie dačakaŭšysia? U mianie ŭ jakaści arhumientu — dośvied Polščy. U vas — vysokija maralnyja kaštoŭnaści. Tak taksama možna. Ale tak było ŭsie apošnija siamnaccać hadoŭ: maralnyja pieramohi na baku apazicyi, a palitviaźni ŭsio siadziać i siadziać. I revalucyju nichto nie moža arhanizavać.

Što rabić? Čaho nie rabić — ja viedaju, zdahadvajusia ci vy mnie padkažacie. A što rabić?

• 0
• 0
• 0
• 0
• 0
• 0
• 0
• 0