Niaklajeŭ uziaŭsia za staroje

31 maja, praź dziesiać dzion paśla vyzvaleńnia, Uładzimir Niaklajeŭ razam z aktyvistami kampanii «Havary praŭdu» raspačaŭ akcyju «Sto pytańniaŭ uradu».

Miescam jaje pačatku byŭ abrany Červieński rynak stalicy. Aktyvisty kampanii vyrašyli pravieryć, na kolki chopić 295 tysiač — minimalnaj sumy, adviedzienaj dziaržavaj na miesiačny zapas praduktaŭ. Niaklajevu ich chapiła na 20 chvilin.

Pachod na rynak, jaki nieŭzabavie zakryjuć, pačaŭsia niervova. Na samoha Niaklajeva i nievialikuju hrupu žurnalistaŭ adrazu nakinuŭsia načalnik achovy rynka.

«Što vy tut zdymajecie? Chto vam dazvoliŭ? Ja načalnik achovy, ja vam zabaraniaju!», — niervova kryčaŭ nievialiki mužčyna i chapaŭsia rukami za abjektyŭ fotakamiery.

Tym časam lidar «Havary praŭdu» imkliva traciŭ svoj nievialiki biudžet. Viandlina, sała, kaŭbasa, syr, tvaroh — pa kiłahramie ŭsiaho hetaha ŭmiaściłasia ŭ nievialikuju torbu, a hrošaj zastałosia tolki na harodninu. Pryčym nabyć miasa i rybu nie ŭdałosia — pieršaha na rynku ŭvohule nie było, a jakaść ryby (jakoj taksama było vobmal) kupcoŭ nie zadavoliła.

«Zdymajcie, zdymajcie hetyja ceny, hetyja pustyja pryłaŭki. Heta ŭžo niemahčyma tryvać», — padhavorvali žurnalistaŭ niekatoryja ludzi.

Hrošy ŭ Niaklajeva tym časam skančalisia. Paśla nabyćcia kiłahrama jabłykaŭ, bulby, kapusty, radyski i zielaniny ź miesiačnaha biudžetu zastałosia tolki 120 tysiač. «Chopić. Chacia b na niekalki dzion jašče pakinuć treba. Jak ni ličy i jak ni starajsia zachavać fihuru — miesiac pražyć za heta prosta niemahčyma», — zajaviŭ jon i nakiravaŭsia z žonkaj da mašyny, kab pakinuć tam pakunki z praduktami. Heta asabliva ŭściešyła mocnych chłopcaŭ u cyvilnym, jakija vidavočna nie viedali, što im rabić z hetym klijentam.

«Kali paraŭnoŭvać ceny daturemnyja i siońniašnija, to jany papaŭźli. Ja patraciŭ amal pałovu minimalnaha siamiejnaha biudžetu za raz». Paskardziŭsia i na niemahčymaść pahavaryć ź ludźmi: «Zapałochali ludziej, razahnali ich. Ja chacieŭ pahavaryć pra los samoha rynku, jaki pojdzie pad znos. 1300 pracoŭnych miescaŭ, u sto razoŭ bolš ludziej, jakija karystajucca jaho pasłuhami — paŭstaje kanfliktnaja situacyja pamiž uładaj i ludźmi, jakija chočuć mieć tut rynak».

Skončyŭsia vizit Niaklajeva na Červieński rynak karotkaj razmovaj z emacyjnym piensijanieram, jaki nazvaŭ lidara «Havary praŭdu» «miunchiencam» i zajaviŭ, što «dalary jamu «na ch. nie patrebnyja».

• 0
• 0
• 0
• 0
• 0
• 0
• 0
• 0