Pakul pretenzij da jaho niama.
Minskaja transpartnaja prakuratura apytała Antona Pijeva, aŭtara načnych zdymak u Minskim mietrapalitenie.
Pijeŭ paviedamiŭ, što supracoŭniki pravaachoŭnych orhanaŭ nie majuć da jaho pretenzij u suviazi ź jaho naviedvańniem mietro paśla jaho aficyjnaha zakryćcia.
Ad padrabiaznych kamientaryjaŭ nakont pravierki prakuratury Pijeŭ pakul ustrymlivajecca.
Nahadajem, 31 maja na naradzie ab chodzie rasśledavańnia abstavin vybuchu na stancyi «Kastryčnickaja» Minskaha mietrapalitena Alaksandr Łukašenka zajaviŭ, što jaho prainfarmavali ab videaroliku, jaki demanstruje, jak hrupa maładych ludziej nočču svabodna praź niezačynienyja dźviery zachodzić na stancyju mietro «Maskoŭskaja».
Videarolik źniaty ŭ noč na 29 maja i zatym raźmieščany ŭ internecie. Maładyja ludzi vyjavili na videa viestybiul i pieron stancyi, hadzińnik, na jakim ŭkazany čas — 3.49. Ni milicyi, ni rabotnikaŭ mietrapalitena nidzie nie było.
«Jany z chłopcami pranikli nočču ŭ mietrapaliten i zdymali heta ŭsio na videa. Vykłali heta ŭ internet: hladzicie — voś jak pracuje naša milicyja i ŭsie inšyja na čale z Malcavym (dziaržaŭnym sakratar Savieta biaśpieki Biełarusi. — BiełaPAN.), jak jany zabiaśpiečvajuć vykanańnie daručeńniaŭ prezidenta», — zajaviŭ Łukašenka.
«Jak mianie prainfarmavali, rasśledavańnie nakont hetaha pravodzicca. Dumaju, i nakont hetaha mianie siońnia prainfarmujuć. Ja nikoha pakul nie paprakaju i paprakać nie budu. Kali hetyja fakty paćvierdziacca — zaŭtra biez pahon zastaniaciesia», — zajaviŭ kiraŭnik dziaržavy.
Infarmacyja ab svabodnym dostupie ŭ mietro paśla terakta na stancyi «Kastryčnickaja» 11 krasavika pasłužyła padstavaj dla «nieadkładnaj pravierki vykanańnia słužbovymi asobami Minskaha mietrapalitena zakanadaŭstva, nakiravanaha na arhanizacyju biaśpieki ruchu i pasažyraŭ». Pravieści takuju pravierku hienprakuror Biełarusi daručyŭ biełaruskamu transpartnamu prakuroru.
Jak paviedamili ŭ Biełaruskaj transpartnaj prakuratury, takaja pravierka ŭžo pravodzicca.
U vyniku vybuchu ŭ minskim mietro na stancyi «Kastryčnickaja» 11 krasavika zahinuli 15 čałaviek, kala 200 byli paranienyja. U terakcie abvinavačvajucca dva maładyja čałavieki, žychary Viciebska.
Kamientary