Taćciana Sieviaryniec aštrafavana na 700 tys. rubloŭ

Sud Kastryčnickaha rajona Viciebska 11 lipienia aštrafavaŭ na 20 bazavych vieličyń (700 tys. rubloŭ) abłasnoha kaardynatara arhkamiteta pa stvareńni partyi «Biełaruskaja chryścijanskaja demakratyja» (BCHD) Taćcianu Sieviaryniec.

8 lipienia ŭ Kastryčnickim RAUS u dačynieńni da Sieviaryniec byŭ składzieny pratakoł na padstavie artykuła 23.34 Kodeksa ab administracyjnych pravaparušeńniach (parušeńnie paradku arhanizacyi ci praviadzieńnia masavaha mierapryjemstva abo pikietavańnia). Sudździa Jaŭhien Burunoŭ, razhledzieŭšy materyjały spravy, u tym liku videazapis, pryznaŭ žančynu vinavataj u arhanizacyi niesankcyjanavanaha šeścia 3 lipienia.

Viečaram 8 lipienia da Taćciany Sieviaryniec pryjechali supracoŭniki milicyi i ŭručyli pozvu na dopyt, jaki pavinien byŭ adbycca ŭ hety ž čas. Žančynu dastavili ŭ Kastryčnicki RAUS, dzie abvinavacili va ŭdziele ŭ šeści da kryža-pomnika kala Śviata-Uśpienskaha sabora, jakoje prajšło 3 lipienia paśla akcyi maŭklivaha pratestu. Z 16 červienia kala hetaha kryža ŭ Viciebsku kožny viečar, jak i kala Čyrvonaha kaścioła ŭ Minsku, pravodziacca nabaženstvy za palitźniavolenych. Noč z 8 na 9 lipienia Taćciana Sieviaryniec praviała ŭ izalatary, a 9 lipienia pavinien byŭ adbycca sud, ale sudździa pryniaŭ rašeńnie pieranieści jaho na 11 lipienia, bo Sieviaryniec zapatrabavała advakata.

Na sudovaje pasiadžeńnie ŭ paniadziełak jana pryjšła biez advakata, bo, pavodle jaje słoŭ, abaronca, jakoha jana zaprasiła, byŭ zaniaty. Sudździa zadavoliŭ jaje chadajnictva ab pradstaŭniku — im staŭ syn Taćciany, sustaršynia arhkamiteta pa stvareńni BCHD Pavieł Sieviaryniec.

Pasiadžeńnie doŭžyłasia pryblizna dźvie z pałovaj hadziny.

Bolšuju častku času zaniaŭ prahlad videazapisu, jaki, pavodle słoŭ sudździ, byŭ pieradadzieny «supracoŭnikami UUS Viciebskaha abłvykankama». Videamateryjał adlustroŭvaŭ šlach, pa jakim Sieviaryniec 3 lipienia pieramiaščałasia pa centry horada, kali išła da Uśpienskaha sabora, kab uziać udzieł u štodzionnym nabaženstvie za palitźniavolenych kala kryža na Uśpienskaj horcy, a taksama samo nabaženstva. Videazapis taksama ŭtrymlivaje frahmienty hutarak supracoŭnikaŭ pravaachoŭnych orhanaŭ. U adzin z momantaŭ zapisu vyrazna čutny hołas: «Jaje tut niama», — paśla čaho čuvać niecenzurnuju łajanku. Na pytańnie pradstaŭnika abvinavačanaj Paŭła Sieviarynca: «Chto hetyja ludzi, jakija ŭ hetym videamateryjale maciukajucca? Heta supracoŭniki UUS abłvykankama?» — sudździa Burunoŭ adkazaŭ: «Napeŭna».

Sieviaryniec źviarnuŭ uvahu sudździ taksama na taki momant: «Na videa vidać, što milicyja niezadavolena tym, jak ludzi iduć. Milicyja pierahavorvajecca: „Jany iduć nie tak, heta nie budzie vyhladać jak šeście, a što potym inkryminavać Sieviaryniec?“ Heta značyć supracoŭniki milicyi sami nie razumiejuć, dzie pačynajecca heta „šeście“, dzie jano zakančvajecca, ci jość jano naohuł. A mat-pieramat na videa ŭkazvaje na toje, što zakon kali i byŭ parušany, to z boku supracoŭnikaŭ pravaachoŭnych orhanaŭ».

Padčas razhladu Pavieł Sieviaryniec pryvodziŭ i inšyja fakty, jakija ŭkazvajuć na toje, što jaho maci nie mieła dačynieńnia da arhanizacyi i praviadzieńnia niesankcyjanavanaha šeścia.

Pierad vyniasieńniem sudovaha rašeńnia Taćciana Sieviaryniec zajaviła: «Rastłumačycie mnie, nastaŭniku z 36-hadovym stažam, maci troch darosłych dziaciej, babuli piaci ŭnukaŭ, čamu ja apynułasia na narach? 3 lipienia ja išła malicca jak zvyčajny čałaviek, ale praviała noč u IČU. Ja rasceńvaju heta jak pomstu za maju aktyŭnuju hramadzianskuju pazicyju. Jany chacieli źniavažyć mianie, ale źniavažyli tolki samich siabie. Hety sud, hety videazapis — heta hańba dla majoj niaščasnaj Biełarusi!»

• 0
• 0
• 0
• 0
• 0
• 0
• 0
• 0