Prablemy Mytnaha sajuza abmiarkujuć u Maskvie premjer-ministry Biełarusi, Kazachstana i Rasii

Sustreča Michaiła Miaśnikoviča, Karyma Masimava i Uładzimira Pucina adbudziecca siońnia ŭ miežach kanfierencyi «Ad Mytnaha sajuza da Adzinaj ekanamičnaj prastory: intaresy biźniesu», jakaja projdzie z udziełam ministraŭ ekanamičnaha błoka i kiraŭnikoŭ najbujniejšych biźnies-asacyjacyj troch krain.

Čakajecca, što pradstaŭniki ŭłady i biźniesu Biełarusi, Kazachstana i Rasii abmiarkujuć upłyŭ MS i AEP, jakoje pavinna pačać funkcyjanavać 1 studzienia 2012 hoda, na dziełavy klimat svaich krain.

Metami kanfierencyi źjaŭlajucca «infarmavańnie biźnies-supolnaści pra jakasna novyja mahčymaści viadzieńnia haspadarčaj dziejnaści paśla ŭtvareńnia AEP, a taksama abmierkavańnie najbolej važnych pytańniaŭ farmiravańnia ahulnaha rynku tavaraŭ, rabot, pasłuh, kapitału i pracoŭnaj siły ŭ miežach AEP», paviedamlaje pres-słužba ŭrada RF.

«Jak ličać sami pradprymalniki, novy ŭzrovień intehracyi dazvolić uzmacnić haspadarčyja suviazi vytvorcaŭ troch krain i, u kančatkovym vyniku, pavialičyć kankurentazdolnaść ekanomiki AEP na suśvietnym rynku», — adznačajecca ŭ paviedamleńni pres-słužby.

Heta budzie pieršaja sustreča prem'jer-ministraŭ troch krain paśla admieny z 1 lipienia ŭ miežach farmiravańnia AEP mytnaha kantrolu na ŭnutranych miežach MS. Kantrol ažyćciaŭlajecca na źniešnich miežach u adpaviednaści z adzinym mytnym taryfam.

RIA Novosti pryvodzić słovy pres-sakratara kiraŭnika rasijskaha ŭrada Dźmitryja Piaskova, jaki ŭ pačatku lipienia paviedamiŭ pra telefonnuju hutarku ŭ Pucina ź Miaśnikovičam i Masimavym. Rasijski premjer nazvaŭ farmiravańnie ahulnaj mytnaj prastory «samaj vialikaj padziejaj na terytoryi byłoha SSSR u pieryjad paśla jaho raspadu».

Tym časam ekśpierty ŭkazvajuć na surjoznyja roznahałośsi pamiž krainami pa šerahu pytańniaŭ ekanamičnaha supracoŭnictva. Havorka idzie najpierš ab roznahałośsiach pamiž Minskam i Maskvoj u halinie enierhietyki.

I kali situacyju z pahašeńniem zavinavačanaści Biełarusi pa pastaŭkach elektraenierhii ŭdałosia vyrašyć davoli apieratyŭna, to damovicca ab novaj formule cany na rasijski haz Maskvie i Minsku pakul nie atrymlivajecca.

Dziejny kantrakt pamiž AAT «Hazprom» i AAT «Biełtranshaz» na pastaŭku i tranzit hazu zakančvajecca 31 śniežnia 2011 hoda. Dakumientam vyznačana formuła cany z 1 studzienia 2008 hoda (adpaviednaja formule cany pry pastaŭkach rasijskaha hazu ŭ Jeŭropu), a taksama panižajučyja kaeficyjenty cany na 2008–2010 hady (0,67, 0,8 i 0,9 adpaviedna).

Padpisańnie novaha kantrakta ŭ Minsku ŭviazvajuć z padpisańniem dakumientaŭ pa kupli «Hazpromam» 50% akcyj AAT «Biełtranshaz». Z takoj pastanoŭkaj pytańnia nie zhodny rasijski bok.

«Hazprom», jaki vałodaje 50% akcyj «Biełtranshazu», zajaŭlaje, što hatovy zapłacić 2,5 młrd. dołaraŭ za astatnija akcyi. Tak, kiraŭnik hazavaha chołdynhu Alaksiej Miler niadaŭna zajaviŭ: kali biełaruski bok pahadzicca pradać pakiet «Biełtranshazu» biez usiakich dadatkovych umoŭ, to «kantrakt moža być padpisany choć zaŭtra».

Što da cany na haz dla Biełarusi, to Miler padkreśliŭ: havorka nie idzie pra pastaŭki rasijskaha hazu ŭ Biełaruś pa ŭnutryrasijskich cenach — «havorka idzie ab pryncypach roŭnadachodnaści».

U druhim kvartale 2011 hoda cana hazu dla Biełarusi składaje 244,7 dołara za tysiaču kubamietraŭ suprać 223 dołaraŭ u pieršym kvartale.«Hazprom» zajaŭlaŭ, što ŭ novym kantrakcie, jaki budzie dziejničać z 2012 hoda, buduć uličanyja realii adzinaj ekanamičnaj prastory, damoŭlenaści pa jakich Minsk ratyfikavaŭ u kancy 2010 hoda.

• 0
• 0
• 0
• 0
• 0
• 0
• 0
• 0