Minskija himnazii nie źmiaścili ŭsich razumnikaŭ i razumnic

Sioleta ŭ himnazii školniki pastupali pa novych praviłach i pakazali niadrennyja vyniki.

Prachadny bał u himnazii ciapier składajecca nie tolki z adznak, atrymanych na ŭstupnych ekzamienach, ale i z hadavych adznak pa matematycy, ruskaj i biełaruskaj movach. Raniej u himnazii zaličvali tolki pa bałach, atrymanych na ŭstupnych vyprabavańniach.

Na ŭstupnych ekzamienach u himnazii biełaruskaj stalicy čaćvierakłaśniki pakazali zdavalniajučyja vyniki. Na adznaki «7» i vyšejšyja ekzamien pa ruskaj movie zdali 92% školnikaŭ, pa matematycy i biełaruskaj — 77%, paviedamlaje ahienctva «Minsk-Naviny».

Načalnik adździeła daškolnaj i ahulnaj siaredniaj adukacyi kamiteta pa adukacyi Minharvykankama Taćciana Charužaja paviedamiła, što ŭ siarednim na dastatkovym i vysokim uzroŭni z zadańniami spravilisia 83% pretendentaŭ na navučańnie ŭ himnazii, a 65% paćvierdzili abo palepšyli svaje hadavyja adznaki.

Pieravažnaje prava pry zaličeńni ŭ himnaziju pry roŭnaj ahulnaj kolkaści bałaŭ mieli navučency, u jakich vyšejšy siaredni bał. Dla tych, chto pastupaŭ u himnazii-kaledžy mastactvaŭ, faktaram pieravahi byŭ bolš vysoki ŭzrovień zdolnaściaŭ u halinie asobnych vidaŭ mastactva.

Takim čynam, maksimalnaja suma bałaŭ, jakuju moža nabrać vučań, składaje 60. Maksimalnuju kolkaść bałaŭ nabrali 48 dziaciej.

Siaredni prachadny bał dla kandydataŭ u himnazisty skłaŭ 46 z mahčymych 60. Heta značyć, chapiła b čatyroch vaśmiorak i dźviuch siamiorak. U 13 ustanovach adukacyi pretendentam patrabavałasia nabrać bolš za 50 bałaŭ, a ŭ himnazii № 2 — ad 55 i vyšej.

Usiaho ŭ himnazii zaličana bolš za 3150 minskich školnikaŭ. U zaležnaści ad himnazii konkurs skłaŭ ad 2 da 2,5 čałavieki na miesca.

Pavodle dadzienych Minadukacyi, u Biełarusi pracuje 212 himnazij, a taksama šeść navučalna-piedahahičnych kompleksaŭ siaredniaja škoła (himnazija) — kaledž. Kolkaść himnazij ŭ apošnija hady tolki pavialičvałasia. Kali ŭ 2006/2007 navučalnym hodzie ich było 165, to ŭ 2007/2008 — užo 184, a ŭ minułym navučalnym hodzie — 212.

Płanujecca, što 1 vieraśnia ŭ Minsku buduć adkrytyja jašče dźvie himnazii — na bazie škoły № 52 Kastryčnickaha rajona i škoły № 166 Centralnaha rajona.

Baćki spadziajucca, što dzieci atrymajuć u himnazijach dobruju adukacyju, jakaja daść im mahčymaść pastupić u VNU. Z hoda ŭ hod vyniki centralizavanaha testavańnia pakazvajuć, što takija nadziei całkam apraŭdanyja. Naprykład, u minułym hodzie siaredni bał za CT pa matematycy skłaŭ 21,76. Pry hetym u vypusknikoŭ siarednich škoł — 23,5, u vypusknikoŭ himnazij i licejaŭ — 36, SSNU — 16,7, PTV i prafiesijnych licejaŭ, kaledžaŭ — 13.

U centralizavanym testavańni pa fizicy ŭ 2010 hodzie siaredni testavy bał pa pradmiecie skłaŭ 18,1. Vyniki vypusknikoŭ himnazij — 29,8, krychu nižejšy vynik vypusknikoŭ licejaŭ — 27,9, ahulnaadukacyjnych škoł — 19,5, SSNU — 14,45.

Pa vynikach testavańnia hetaha hoda raźbiŭki pa vidach ustanovaŭ, jakija skončyli abituryjenty, pakul niama, adnak možna vykazać zdahadku, što himnazisty nie padviali i hetym razam.

• 0
• 0
• 0
• 0
• 0
• 0
• 0
• 0