U 2010 hodzie Biełaruś pradavała zvyčajnaje ŭzbrajeńnie ŭ Jemien, Sudan, Nihieryju, Uhandu i Azierbajdžan

19 lipienia ŭ Rehistry AAN pa zvyčajnych uzbrajeńniach ź`iavilisia źviestki pra ździełki Biełarusi na suśvietnym zbrojevym rynku ŭ 2010 hodzie.

Pavodle hetych danych, letaś Biełaruś pradavała zvyčajnyja ŭzbrajeńni ŭ Jemien, Sudan, Nihieryju, Uhandu i Azierbajdžan. Danyja pra zakupki ŭzbrajeńniaŭ i vajennaj techniki, jakija kvalifikujucca jak zvyčajnyja, adsutničajuć.

Tak, u Jemien u 2010 hodzie było pastaŭlena 66 tankaŭ T-80, u Sudan — adzin šturmavik Su-25, u Nihieryju — dva ŭdarnyja viertaloty Mi-24, va Uhandu — adzin Mi-24, u Azierbajdžan — adzin šturmavik Su-25 i 30 122-milimietrovych haŭbic D-30, što buksirujucca. Usia zbroja — vytvorčaści Rasii (SSSR). Sumy kantraktaŭ nie nazyvajucca.

Nahadajem, u 2009 hodzie Biełaruś pastaviła va Uhandu 23 tanki T-55, u Azierbajdžan — piać šturmavikoŭ Su-25 i dzieviać samachodnych haŭbic 2S7 "Pion" 203 mm, u Sudan — try šturmaviki Su-25.

U 2008 hodzie ŭ Azierbajdžan byli pastaŭleny try samachodnyja haŭbicy 2S7 "Pion" 203 mm. U Siryju pradadziena 33 šmatcelevyja źniščalniki sa źmiennaj strałapadobnaściu kryła MiH-23. 11 šturmavikoŭ Su-25 pastaŭlena ŭ Sudan. Rasija zakupiła ŭ Biełarusi 15 rakiet "pavietra-pavietra" R27-R dla źniščalnikaŭ Su-27 i MiH-29.

U 2007 hodzie Biełaruś pradała ŭ Sudan dva bronietransparciory BTR-70, madernizavanyja da ŭzroŭniu "Kobra K2K" i "Kobra K2". U Armieniju — 10 122-milimietrovyja haŭbicy D-30, jakija buksirujucca, u Erytreju — dzieviać reaktyŭnych sistem załpavaha ahniu "Urahan".

U 2006 hodzie Biełaruś pastaviła ŭ Azierbajdžan 41 tank T-72.

U 2005 hodzie Biełaruś pastaviła ŭ Azierbajdžan 19 tankaŭ T-72, u Słavakiju — dva vajenna-transpartnyja viertaloty Mi-8, u Džybuci — dva ŭdarnyja viertaloty Mi-24. Heta infarmacyja była źmieščana ŭ Rehistry AAN pa zvyčajnych uzbrajeńniach u pačatku červienia 2006 hoda. Potym danyja pra ździełki sa Słavakijaj źnikli.

U 1996—2004 hadach Biełaruś pastaŭlała zbroju ŭ Pieru (samaloty), Konha (artsistemy), Papua — Novuju Hvinieju (viertaloty), Śjera-Leone (viertaloty), Efiopiju (tanki), Zair (artsistemy), Uhandu (viertaloty), Maroka (tanki), AAE (bajavyja braniravanyja mašyny), Ukrainu (samaloty), Iran (tanki), Ałžyr (samaloty), Sudan (artsistemy, bajavyja braniravanyja mašyny), Kot-d`Ivuar (bajavyja braniravanyja mašyny, artsistemy, minamioty, viertaloty, samaloty), Šviecyju (rakiety da PZRK).

• 0
• 0
• 0
• 0
• 0
• 0
• 0
• 0