Za kvartał MAZ pavialičyŭ dolu na rasijskim rynku ŭ 1,5 razu

Biełaruski ŭrad abmierkavaŭ siarednieterminovyja i doŭhaterminovyja pierśpiektyvy raźvićcia MAZa — adnaho z dvuch pradpryjemstvaŭ sa «śpisu Miaśnikoviča», pa jakim patencyjny pakupnik («Rastechnałohii») nie staŭ abviarhać svajoj cikavaści.

Cikavaść rasijcaŭ pavinnaja padmacoŭvacca pavieličeńniem doli biełaruskaha vytvorcy na rynku Rasii.

De-fakta ciapier MAZ u tym liku pracuje na acenku, jakuju budzie pravodzić dla «Rastechnałohij» viadomaja kansałtynhavaja kampanija Ernst & Young. Ciapier abmiarkoŭvajecca novy varyjant stvareńnia sumiesnaha pradpryjemstva z udziełam MAZa i KaMAZa. Prapanoŭvajecca, u pryvatnaści, unieści ŭ statutny fond SP pa 49,9% akcyj MAZa i KaMAZa.

Ale kapitalizacyja KaMAZa bolšaja, čym MAZa. U jakaści prykładu: vałavy prybytak MAZa za 2010 hod byŭ kala 82 młn dalaraŭ, KaMAZa — kala 228 dalaraŭ, pa vynikach 1-ha kvartała 2011 hoda hetyja suadnosiny vyhladaje tak: adpaviedna 20 młn i 54 młn dalaraŭ. Tamu rasijski bok nastojvaje, kab u skład SP uvajšli i inšyja biełaruskija pradpryjemstvy. Razhladajecca, naprykład, udzieł MMZ, mahčyma, BATE.

Raniej pieršy vice-prem `ier biełaruskaha ŭrada Uładzimir Siamaška zajaŭlaŭ, što SP z udziełam MAZa i KaMAZa moža być stvorana da kanca biahučaha hoda.

A pakul MAZ adnaŭlaje svaje pazicyi na rynku Rasii, dzie jaho dola ŭ pieryjad kryzisu źniziłasia da rekordnaha minimumu. Hety minimum — 3,4% ad usiaho abjomu prodažaŭ — prypaŭ na 2009 hod, u 2010 hodzie dola skłała 9,5%, choć u 2005 hodzie jana była 17,7%.

Pavodle apošnich dadzienych, dola MAZa ŭ pieršym kvartale 2011 hoda vyrasła ŭ siehmiencie aŭtamabilaŭ poŭnaj masy 14–40 ton z 8,8% (dadzienyja pieršych troch miesiacaŭ 2010 hoda) da 14,3%.

Takim čynam, pa vynikach 1-ha kvartała 2011 hoda MAZ zaniaŭ u Rasii treciaje miesca pa abjomach prodažaŭ hruzavikoŭ. Napieradzie jaho KaMAZ i zamiežnyja vytvorcy (35,2%). Dola KaMAZa ŭ paraŭnańni ź pieršymi tryma miesiacami 2010 hoda i ŭ cełym 2010-m hodam skaraciłasia. U 1-m kvartale 2010 hoda jana składała 59%, pa vynikach 2010 hoda — 46,8%. A voś prodažy zamiežnych vytvorcaŭ, naadvarot, vyraśli. Dla paraŭnańnia: u 1-m kvartale 2010 hoda ich prodažy składali 11,3%, pa vynikach 2010 hoda — 25,1%.

Na pasiedžańni ŭrada, jakoje adbyłosia 19 lipienia, była ŭchvalenaja inviestycyjnaja prahrama dla MAZa na 2011 hod. Jaje abjom składzie 131,3 młrd rubloŭ. Pa siońniašnim kursie heta kala 25 młn dalaraŭ, da kanca 2011 hoda hetaja suma, nie vyklučana, moža ŭ dalaravym ekvivalencie źnizicca ŭ razy. U hetym płanie, kab zachavać kankurentazdolnaść nie tolki na rasijskim rynku, ale i ŭnutry rynku Mytnaha sajuza, MAZu treba šukać stratehičnaha partniora z dobraj nie tolki techničnaj, ale i finansavaj bazaj. Pieryjad, kali abmiarkoŭvałasia mahčymaść dałučeńnia KaMAZa da MAZa (kaniec 1990 — pačatak 2000) niezvarotna stračany. I zastajecca tolki šukać najbolš spryjalnyja mahčymaści supracoŭnictva pad ehidaj svajho hałoŭnaha kankurenta. KaMAZ, u adroźnieńnie ad MAZa, nie straciŭ zamiežnaha partniora (kancern MAN), a znajšoŭ i ŭmacoŭvaje i pahłyblaje stratehičnyja adnosiny ź im, nie bajučysia ŭ tym liku pradavać akcyi. Akcyjanieram KaMAZa źjaŭlajecca kampanija Daimler-Benz (11% u statutnym fondzie), jakaja z sakavika 2011 hoda ŭ ramkach TAA «Mersedes Bienc Trans Uschod» pačała vytvorčaść niamieckich hruzavikoŭ u Nabiarežnych Čaŭnach.

• 0
• 0
• 0
• 0
• 0
• 0
• 0
• 0