Łukašenka pryniaŭ Jermakovu i paśla hetaha stała viadoma pra jaje pryznačeńnie kiraŭnicaj Nacbanka. Adnak najbolš zaintryhavała vykazvańnie pra kurs.
«U Biełarusi ŭ bližejšy čas budzie pryniata kančatkovaje rašeńnie ab vychadzie na adziny abmienny kurs biełaruskaha rubla». Jak cytuje BiełTA, ab hetym zajaviŭ 27 lipienia Alaksandr Łukašenka na sustrečy sa staršynioj praŭleńnia AAT «AAB Biełarusbank» Nadziejaj Jermakovaj.
«Dumaju, što ŭ bližejšy čas nam treba budzie kančatkova pryniać rašeńnie, bo infarmacyi siońnia dastatkova dla taho, kab adkryta skazać, što my budziem rabić, jakoje rašeńnie budziem prymać», — skazaŭ jon.Jon paprasiŭ Nadzieju Jermakovu vykazać svoj punkt hledžańnia ab pierśpiektyvach «nie prosta stabilizacyi valutnaha rynku, ale vychadu na adziny abmienny kurs rubla ŭ krainie».
Łukašenka pacikaviŭsia i tym, jak zabiaśpiečvajecca valutaj nasielnictva.
«My damaŭlalisia ab tym, što Aščadny bank, ciapier užo i inšyja hetuju funkcyju na siabie biaruć, zabiaśpiečać prodaž valuty nasielnictvu pad nieabchodnyja patreby: chvaroba, vučoba». Pry hetym Łukašenka i tut padzialiŭ hramadzian na dyva hatunki:
«I toje — vučoba ź jakoj metaj, u intaresach dziaržavy abo dla papaŭnieńnia piataj kałony, jak u nas niekatoryja vučacca za miažoj».Jon dadaŭ: «Heta dziaržaŭnaja pasłuha, i jana pavinna akazvacca ŭ intaresach dziaržavy». Karaciej, valuty treba dobra paprasić i kali chto zasłužyć, tamu jaje pradaduć pa 5000.
Jak aficyjna paviedamlajecca,
Nadzieja Jermakova «adznačyła stabilizacyju» situacyi. Pavodle jaje słoŭ, «nasielnictva supakoiłasia i z 10 červienia idzie prytok układaŭ u bankaŭskuju sistemu» ŭ rublach. «Što datyčycca valutnych układaŭ, to ich adtok ŭ cełym taksama spyniŭsia»i «ŭžo ŭ asobnych bankach, dzie pracentnyja staŭki vyšejšyja, idzie nievialiki prytok».
Pavodle jaje słoŭ, kurs 5000 za dalar adlustroŭvaje realny ŭzrovień i nie strymlivajecca administracyjnymi mietadami.
Pierachodu na adziny kurs ad biełaruskich uładaŭ patrabujuć ich zamiežnyja fundatary: Rasija i MVF. Adziny kurs staŭ umovaj vydzialeńnia Biełarusi kredytu JeŭrAzES.
Nadzieja Jermakova adznačyłasia ŭ časie finansavaha kryzisu viasny 2011-ha jak addanaja prapahandystka.«Nu voś u mianie jaho [dalara] niama, i ja nie idu ŭ abmieńnik, mnie jon prosta nie patrebny, u mianie ŭ 90-ja nie było, i siońnia niama, — zajaviła jana na telebačańni. — Tak, abutak zavozicca impartny, tak, jon stanie krychu daražejšy, ale ničoha strašnaha, znosim zamiest dvuch tuflaŭ adny».
Pry hetym u vyniku devalvacyi ŭkładčyki jaje banka stracili kala miljarda dalaraŭ za košt abiasceńvańnia svaich rublovych depazitaŭ.
Jermakova pierajechała ŭ Minsk z pasady zahadčycy finadździeła Škłoŭskaha rajvykankama.
Jermakovaj 58 hadoŭ, naradziłasia jana ŭ vioscy Razalmaŭ Chocimskaha rajona, što na krajnim uschodzie Biełarusi.
